ಬೆಂಗಳೂರು: ಗ್ರಾಹಕರ ಹಿತರಕ್ಷಣೆ ಹಾಗೂ ನಿಖರ ತೂಕದ ಮಾಪನವನ್ನು ಖಚಿತಪಡಿಸಿಕೊಳ್ಳುವ ಉದ್ದೇಶದಿಂದ ಆಹಾರ, ನಾಗರಿಕ ಸರಬರಾಜು ಮತ್ತು ಗ್ರಾಹಕರ ವ್ಯವಹಾರಗಳ ಸಚಿವ ರಿಜ್ವಾನ್ ಅರ್ಷದ್ ಘೋಷಿಸಿದ 'ಮಿಷನ್ ನಿಖರ' ಅಭಿಯಾನದಡಿಯಲ್ಲಿ ರಾಜ್ಯಾದ್ಯಂತ ಎಲ್ಪಿಜಿ ಬಾಟ್ಲಿಂಗ್ ಘಟಕಗಳ ಮೇಲೆ ದಿಢೀರ್ ತಪಾಸಣೆ ನಡೆಸಲಾಗಿದೆ.
ಕಾನೂನು ಮಾಪನಶಾಸ್ತ್ರ ಇಲಾಖೆಯು ಸೆಪ್ಟೆಂಬರ್ 24 ರಂದು ಕರ್ನಾಟಕದ ವಿವಿಧ ಭಾಗಗಳಲ್ಲಿರುವ ಎಲ್ಪಿಜಿ ಸಿಲಿಂಡರ್ ಭರ್ತಿ ಮಾಡುವ ಘಟಕಗಳಿಗೆ ಭೇಟಿ ನೀಡಿ, ಒಟ್ಟು 1,530 ಸಿಲಿಂಡರ್ಗಳ ತೂಕವನ್ನು ಪರಿಶೀಲನೆಗೆ ಒಳಪಡಿಸಿತು.
ಶೇ. 25 ರಷ್ಟು ಸಿಲಿಂಡರ್ಗಳಲ್ಲಿ ನಿಗದಿತ ಪ್ರಮಾಣಕ್ಕಿಂತ ಕಡಿಮೆ ಅನಿಲ!
ಇಲಾಖೆಯ ತಪಾಸಣೆ ವೇಳೆ ಅಚ್ಚರಿಯ ಮಾಹಿತಿ ಬೆಳಕಿಗೆ ಬಂದಿದೆ:
-
ಪರಿಶೀಲಿಸಿದ ಸಿಲಿಂಡರ್ಗಳ ಪೈಕಿ 382 ಸಿಲಿಂಡರ್ಗಳಲ್ಲಿ (ಶೇ. 25) ನಿಗದಿತ ತೂಕಕ್ಕಿಂತ ಕಡಿಮೆ ಪ್ರಮಾಣದ ಅನಿಲ ಇರುವುದು ಪತ್ತೆಯಾಗಿದ್ದು, ಇವು ಅನುಮತಿಸಲಾದ ದೋಷ ಮಿತಿಯೊಳಗೆ (Permissible error limit) ಇರುವುದು ಕಂಡುಬಂದಿದೆ.
-
205 ಸಿಲಿಂಡರ್ಗಳಲ್ಲಿ (ಶೇ. 13.4) ಕರಾರುವಾಕ್ಕಾಗಿ ನಿಗದಿತ ತೂಕ ದಾಖಲಾಗಿದೆ.
-
943 ಸಿಲಿಂಡರ್ಗಳಲ್ಲಿ (ಶೇ. 61.6) ನಿಗದಿತ ಪ್ರಮಾಣಕ್ಕಿಂತ ಹೆಚ್ಚಿನ ಅನಿಲ ಇರುವುದು ಪತ್ತೆಯಾಗಿದೆ.
ತಪಾಸಣೆಯ ಸಂದರ್ಭದಲ್ಲಿ ಗಂಭೀರ ನಿಯಮ ಉಲ್ಲಂಘನೆ ಕಂಡುಬಂದ ಹಿನ್ನೆಲೆಯಲ್ಲಿ 3 ಪ್ರತ್ಯೇಕ ಪ್ರಕರಣಗಳನ್ನು ದಾಖಲಿಸಲಾಗಿದ್ದು, ಒಟ್ಟು ₹79,000 ದಂಡ ವಸೂಲಿ ಮಾಡಲಾಗಿದೆ ಎಂದು ಇಲಾಖೆ ತಿಳಿಸಿದೆ.
17 ಬಾಟ್ಲಿಂಗ್ ಘಟಕಗಳಲ್ಲಿ ಕಾರ್ಯಾಚರಣೆ
ರಾಜ್ಯದಲ್ಲಿ ಕಾರ್ಯಾಚರಣೆ ನಡೆಸುತ್ತಿರುವ ಒಟ್ಟು 17 ಬಾಟ್ಲಿಂಗ್ ಘಟಕಗಳಲ್ಲಿ ಈ ಪರಿಶೀಲನೆ ನಡೆದಿದೆ. ಇವುಗಳಲ್ಲಿ ಭಾರತ್ ಪೆಟ್ರೋಲಿಯಂ (BPCL), ಹಿಂದೂಸ್ತಾನ್ ಪೆಟ್ರೋಲಿಯಂ (HPCL) ಹಾಗೂ ಇಂಡಿಯನ್ ಆಯಿಲ್ (IOCL) ಸಂಸ್ಥೆಗಳ ತಲಾ ನಾಲ್ಕು ಘಟಕಗಳು, ಟೋಟಲ್ ಎನರ್ಜೀಸ್ನ (TotalEnergies) ಎರಡು ಘಟಕಗಳು ಹಾಗೂ ಮೂರು ಖಾಸಗಿ ಬಾಟ್ಲಿಂಗ್ ಘಟಕಗಳು ಒಳಗೊಂಡಿವೆ. ಪಟ್ಟಿಯಲ್ಲಿದ್ದ ಮತ್ತೊಂದು ಖಾಸಗಿ ಘಟಕವು ಕಾರ್ಯನಿರ್ವಹಿಸುತ್ತಿರಲಿಲ್ಲ ಎಂದು ಇಲಾಖೆ ಸ್ಪಷ್ಟಪಡಿಸಿದೆ.
ಸಿಲಿಂಡರ್ ತೂಕ ಪರಿಶೀಲಿಸಿ ಪಡೆಯಲು ಸಚಿವರ ಕರೆ
ಗ್ರಾಹಕರು ತಾವು ಪಾವತಿಸುವ ಹಣಕ್ಕೆ ತಕ್ಕಂತೆ ನಿಗದಿತ ತೂಕದ ಅನಿಲವನ್ನು ಪಡೆಯುವುದು ಅವರ ಮೂಲಭೂತ ಹಕ್ಕು ಎಂದು ಸಚಿವ ರಿಜ್ವಾನ್ ಅರ್ಷದ್ ತಿಳಿಸಿದ್ದಾರೆ. ಮನೆ ಬಾಗಿಲಿಗೆ ಸಿಲಿಂಡರ್ ವಿತರಣೆ ಮಾಡುವ ಸಂದರ್ಭದಲ್ಲಿಯೇ ಸಿಲಿಂಡರ್ ತೂಕವನ್ನು ಪರಿಶೀಲಿಸಿ ಸ್ವೀಕರಿಸುವಂತೆ ಅವರು ಸಾರ್ವಜನಿಕರಿಗೆ ಕರೆ ನೀಡಿದ್ದಾರೆ.
ಸರ್ಕಾರದ ನಿಯಮಗಳ ಪ್ರಕಾರ, ಎಲ್ಪಿಜಿ ವಿತರಣಾ ಸಿಬ್ಬಂದಿಯು ಕಡ್ಡಾಯವಾಗಿ ತಮ್ಮೊಂದಿಗೆ ತೂಕ ಮಾಪಕ ಸಾಧನವನ್ನು (Weighing instrument) ಹೊಂದಿರಬೇಕು. ಗ್ರಾಹಕರು ಸಿಲಿಂಡರ್ ಪಡೆಯುವ ಮುನ್ನ ತೂಕ ಪರೀಕ್ಷಿಸುವಂತೆ ಸಿಬ್ಬಂದಿಯನ್ನು ಕೇಳಬಹುದು. ಒಂದು ವೇಳೆ ತೂಕದಲ್ಲಿ ವ್ಯತ್ಯಾಸ ಕಂಡುಬಂದರೆ ಅಥವಾ ನಿಯಮ ಉಲ್ಲಂಘನೆ ಶಂಕೆ ಬಂದರೆ, ಗ್ರಾಹಕರು ತಕ್ಷಣವೇ ಕಾನೂನು ಮಾಪನಶಾಸ್ತ್ರ ಇಲಾಖೆಯ ಸಹಾಯವಾಣಿ ಸಂಖ್ಯೆ 1800 599 1100 ಗೆ ಕರೆ ಮಾಡಿ ದೂರು ದಾಖಲಿಸಬಹುದು ಎಂದು ಇಲಾಖೆ ತಿಳಿಸಿದೆ.
