ಬೆಂಗಳೂರು: ಡಿಜಿಟಲ್ ಇಂಡಿಯಾ ಅಭಿಯಾನದ ಭಾಗವಾಗಿ ಕೇಂದ್ರ ಸರ್ಕಾರ ಹಲವು ಉಚಿತ ಮೊಬೈಲ್ ಆ್ಯಪ್ಗಳನ್ನು ಪರಿಚಯಿಸಿದೆ. ಸರ್ಕಾರಿ ಸೇವೆಗಳನ್ನು ಸುಲಭವಾಗಿ ಪಡೆಯುವುದರ ಜೊತೆಗೆ, ಸಮಯ ಮತ್ತು ಹಣ ಉಳಿತಾಯಕ್ಕೂ ಈ ಆ್ಯಪ್ಗಳು ಸಹಕಾರಿಯಾಗುತ್ತವೆ. ಪ್ರತಿಯೊಬ್ಬ ಭಾರತೀಯನಿಗೂ ಉಪಯುಕ್ತವಾಗಬಹುದಾದ 5 ಪ್ರಮುಖ ಸರ್ಕಾರಿ ಆ್ಯಪ್ಗಳು ಇಲ್ಲಿವೆ.
1. BIS Care ಆ್ಯಪ್
ಚಿನ್ನಾಭರಣ ಖರೀದಿಸುವಾಗ ಅದರ ಶುದ್ಧತೆ ಬಗ್ಗೆ ಅನುಮಾನವಿದ್ದರೆ BIS Care ಆ್ಯಪ್ ಸಹಾಯ ಮಾಡುತ್ತದೆ. ಆಭರಣದ ಮೇಲಿರುವ HUID ಸಂಖ್ಯೆಯನ್ನು ನಮೂದಿಸುವ ಮೂಲಕ ಅದರ ಹಾಲ್ಮಾರ್ಕ್ ಮತ್ತು ಶುದ್ಧತೆಯ ಮಾಹಿತಿಯನ್ನು ಪರಿಶೀಲಿಸಬಹುದು. ಇದರಿಂದ ನಕಲಿ ಅಥವಾ ಕಳಪೆ ಗುಣಮಟ್ಟದ ಚಿನ್ನ ಖರೀದಿಸುವ ಅಪಾಯವನ್ನು ಕಡಿಮೆ ಮಾಡಬಹುದು. ಎಲೆಕ್ಟ್ರಾನಿಕ್ ಉತ್ಪನ್ನಗಳ R-ನಂಬರ್ ಮೂಲಕ ಅವುಗಳ ಪ್ರಾಮಾಣಿಕತೆಯನ್ನೂ ಪರಿಶೀಲಿಸುವ ಸೌಲಭ್ಯವಿದೆ.
2. Aadhaar ಆ್ಯಪ್
ಆಧಾರ್ಗೆ ಸಂಬಂಧಿಸಿದ ಹಲವು ಕೆಲಸಗಳನ್ನು ಮೊಬೈಲ್ನಲ್ಲೇ ನಿರ್ವಹಿಸಲು Aadhaar ಆ್ಯಪ್ ನೆರವಾಗುತ್ತದೆ. ಇ-ಆಧಾರ್ ಡೌನ್ಲೋಡ್ ಮಾಡುವುದು, ಬಯೋಮೆಟ್ರಿಕ್ ಲಾಕ್ ಅಥವಾ ಅನ್ಲಾಕ್ ಮಾಡುವುದು ಸೇರಿದಂತೆ ವಿವಿಧ ಸೌಲಭ್ಯಗಳಿವೆ. ಅಗತ್ಯವಿರುವ ಮಾಹಿತಿಯನ್ನು ಮಾತ್ರ ಹಂಚಿಕೊಳ್ಳುವ ಆಯ್ಕೆಯೂ ಇದ್ದು, ವೈಯಕ್ತಿಕ ವಿವರಗಳ ಗೌಪ್ಯತೆಯನ್ನು ಕಾಪಾಡಲು ಇದು ಸಹಕಾರಿಯಾಗಿದೆ.
3. DigiLocker
ಪ್ರಮುಖ ದಾಖಲೆಗಳನ್ನು ಸುರಕ್ಷಿತವಾಗಿ ಡಿಜಿಟಲ್ ರೂಪದಲ್ಲಿ ಇಟ್ಟುಕೊಳ್ಳಲು DigiLocker ಬಹಳ ಉಪಯುಕ್ತವಾಗಿದೆ. ಡ್ರೈವಿಂಗ್ ಲೈಸೆನ್ಸ್, ವಾಹನದ RC, PAN ಕಾರ್ಡ್, ಶೈಕ್ಷಣಿಕ ಪ್ರಮಾಣಪತ್ರಗಳು ಸೇರಿದಂತೆ ಹಲವು ದಾಖಲೆಗಳನ್ನು ಇಲ್ಲಿ ಸಂಗ್ರಹಿಸಬಹುದು. DigiLockerನಲ್ಲಿ ಲಭ್ಯವಿರುವ ಮಾನ್ಯ ಡಿಜಿಟಲ್ ದಾಖಲೆಗಳನ್ನು ಅಗತ್ಯ ಸಂದರ್ಭಗಳಲ್ಲಿ ಬಳಸಬಹುದಾಗಿದ್ದು, ಪ್ರತಿಯೊಂದು ದಾಖಲೆಗಳ ಭೌತಿಕ ಪ್ರತಿಯನ್ನು ಜೊತೆಯಲ್ಲಿ ಇಟ್ಟುಕೊಳ್ಳುವ ಅಗತ್ಯ ಕಡಿಮೆಯಾಗುತ್ತದೆ.
4. Damini ಆ್ಯಪ್
ಮಿಂಚು ಮತ್ತು ಗುಡುಗಿನ ಅಪಾಯವಿರುವ ಸಂದರ್ಭಗಳಲ್ಲಿ Damini ಆ್ಯಪ್ ಪ್ರಮುಖ ಮಾಹಿತಿ ನೀಡುತ್ತದೆ. ಭಾರತೀಯ ಹವಾಮಾನ ಇಲಾಖೆ (IMD) ಅಭಿವೃದ್ಧಿಪಡಿಸಿರುವ ಈ ಆ್ಯಪ್, ನಿಮ್ಮ ಪ್ರದೇಶದಲ್ಲಿ ಸಿಡಿಲು ಬೀಳುವ ಸಾಧ್ಯತೆಯ ಬಗ್ಗೆ ಮುನ್ನೆಚ್ಚರಿಕೆ ನೀಡುತ್ತದೆ. ಬಣ್ಣಗಳ ಮೂಲಕ ಅಪಾಯದ ಮಟ್ಟ ಮತ್ತು ಸಿಡಿಲು ಸಂಭವಿಸುವ ಅಂದಾಜು ಸಮಯದ ಮಾಹಿತಿಯನ್ನು ನೀಡುತ್ತದೆ. ರೈತರು, ಕಟ್ಟಡ ಕಾರ್ಮಿಕರು ಹಾಗೂ ಹೊರಾಂಗಣದಲ್ಲಿ ಕೆಲಸ ಮಾಡುವವರಿಗೆ ಇದು ವಿಶೇಷವಾಗಿ ಉಪಯುಕ್ತವಾಗಬಹುದು.
5. Digi Yatra
ವಿಮಾನದಲ್ಲಿ ಪ್ರಯಾಣಿಸುವವರಿಗೆ Digi Yatra ಸಮಯ ಉಳಿಸುವ ಆ್ಯಪ್ ಆಗಿದೆ. ಬೋರ್ಡಿಂಗ್ ಪಾಸ್ ಅನ್ನು ಆ್ಯಪ್ಗೆ ಲಿಂಕ್ ಮಾಡಿಕೊಂಡು, ಮುಖದ ಬಯೋಮೆಟ್ರಿಕ್ ಗುರುತಿನ ಆಧಾರದ ಮೇಲೆ ವಿಮಾನ ನಿಲ್ದಾಣದ ಕೆಲವು ಹಂತಗಳಲ್ಲಿ ವೇಗವಾಗಿ ಮುಂದುವರಿಯಲು ಸಾಧ್ಯವಾಗುತ್ತದೆ. ಇದರಿಂದ ಕೆಲವು ಕಡೆಗಳಲ್ಲಿ ದಾಖಲೆ ಪರಿಶೀಲನೆ ಮತ್ತು ಸರತಿ ಸಾಲಿನಲ್ಲಿ ಕಾಯುವ ಸಮಯ ಕಡಿಮೆಯಾಗಬಹುದು.
ಅಧಿಕೃತ ಸ್ಟೋರ್ನಿಂದಲೇ ಡೌನ್ಲೋಡ್ ಮಾಡಿ
ಈ ಐದು ಆ್ಯಪ್ಗಳು ಸರ್ಕಾರಿ ಡಿಜಿಟಲ್ ಸೇವೆಗಳನ್ನು ಜನರಿಗೆ ಸುಲಭವಾಗಿ ತಲುಪಿಸುವ ಉದ್ದೇಶ ಹೊಂದಿವೆ. ಆದರೆ ಆ್ಯಪ್ಗಳನ್ನು ಡೌನ್ಲೋಡ್ ಮಾಡುವಾಗ ನಕಲಿ ಆ್ಯಪ್ಗಳ ಬಗ್ಗೆ ಎಚ್ಚರಿಕೆ ವಹಿಸುವುದು ಮುಖ್ಯ. Google Play Store ಅಥವಾ Apple App Storeನಲ್ಲಿರುವ ಅಧಿಕೃತ ಆ್ಯಪ್ಗಳನ್ನೇ ಡೌನ್ಲೋಡ್ ಮಾಡುವುದು ಸುರಕ್ಷಿತ.
