ಟ್ವಿಟರ್​ ಲೋಗೋ ಬದಲಾಯಿಸಲು ಮಸ್ಕ್​ ಪ್ಲ್ಯಾನ್​

ನವದೆಹಲಿ : ವಿಶ್ವದ ನಂ 1 ಶ್ರೀಮಂತ ಟ್ವಿಟರ್​ ಮಾಲೀಕ ಎಲನ್​ ಮಸ್ಕ್​ (ಜುಲೈ 23) ರಂದು ಟ್ವಿಟರ್​ ಜಾಲತಾಣ ವೇದಿಕೆಯಲ್ಲಿ ಮಹತ್ವದ ಬದಲಾವಣೆಗೆ ಮುಂದಾಗಿದ್ದಾರೆ. ಟ್ವಿಟರ್​ ಲೋಗೋ ಬದಲಾಯಿಸಿ, ಟ್ವಿಟರ್​ ಬರ್ಡ್​ಗೆ ವಿದಾಯ ಹೇಳುವ ಮೂಲಕ ಇಡೀ ವೇದಿಕೆಯನ್ನು ರೀಬ್ರ್ಯಾಂಡ್​ ಮಾಡಲು ಸಜ್ಜಾಗಿದ್ದಾರೆ. ಟ್ವಿಟರ್ ಬರ್ಡ್​​ ಬದಲು ಎಕ್ಷ್​ (X) ಲೋಗೋ ಮೊರೆ ಹೋಗುವ ಸುಳಿವನ್ನು ವಿಡಿಯೋ ಮೂಲಕ ನೀಡಿದ್ದಾರೆ. ಶೀಘ್ರದಲ್ಲೇ ನಾವು ಟ್ವಿಟರ್ ಬ್ರಾಂಡ್‌ಗೆ ವಿದಾಯ ಹೇಳುತ್ತೇವೆ. ಉತ್ತಮವಾದ ಎಕ್ಷ್​ ಲೋಗೋವನ್ನು ಪೋಸ್ಟ್​ ಮಾಡಿದ್ದಲ್ಲಿ, ನಾಳೆಯಿಂದ ಅದೇ ಲೋಗೋದೊಂದಿಗೆ ಮುಂದುವರಿಯಲಿದ್ದೇವೆ ಎಂದು ಮಸ್ಕ್​ ಟ್ವೀಟ್​ ಮೂಲಕ ತಿಳಿಸಿದ್ದಾರೆ. ಆದರೆ, ಈ ಬಗ್ಗೆ ಮಸ್ಕ್ ಹೆಚ್ಚಿನ ಮಾಹಿತಿ ​ ಹಂಚಿಕೊಂಡಿಲ್ಲ. ಮಸ್ಕ್​ ಅವರು ಕಳೆದ ವರ್ಷ ಟ್ವಿಟರ್​ ಅನ್ನು ಖರೀದಿ ಮಾಡಿ ಅನೇಕ ಉದ್ಯೋಗಿಗಳನ್ನು ಕೆಲಸದಿಂದ ವಜಾ ಮಾಡಿದ ಬಳಿಕ ಟ್ವಿಟರ್​ ನಿರಂತರವಾಗಿ ತಾಂತ್ರಿಕ ವೈಫಲ್ಯವನ್ನು ಅನುಭವಿಸುತ್ತಿದೆ. ಜಾಹೀರಾತು ಆದಾಯವು ಸ್ಥಿರವಾಗಿ ಕ್ಷೀಣಿಸುತ್ತಿರುವಾಗ ಸಾಮಾಜಿಕ ಜಾಲತಾಣ ಕಂಪನಿಯು ತನ್ನ ವೇದಿಕೆಯನ್ನು ಪುನರುಜ್ಜೀವನಗೊಳಿಸಲು ಅನೇಕ ಪ್ರಯತ್ನಗಳನ್ನು ಮಾಡುತ್ತಿದೆ. ಈಗಲೂ ಟ್ವಿಟರ್​ ಕಂಪನಿ ಜಾಹೀರಾತಿಗೆ ಪರ್ಯಾಯವಾದ ವ್ಯಾಪಾರ ಮಾದರಿಗಳೊಂದಿಗೆ ಬರಲು ಪ್ರಯತ್ನಿಸುತ್ತಿದೆ. ಟ್ವಿಟರ್​ ಬ್ಲ್ಯೂಟಿಕ್​ ಸಬ್​ಸ್ಕ್ರಿಪ್ಸನ್​ ಪರಿಚಯಿಸಿದೆ. ತಿಂಗಳಿಗೆ 8 ಡಾಲರ್​ ನೀಡಿ ಬ್ಲ್ಯೂಟಿಕ್​ ಪಡೆಯುವ ವ್ಯವಸ್ಥೆ ಇದಾಗಿದೆ. ಈಗಾಗಲೇ ಹಲವರು ಈ ಸೇವೆ ಪಡೆಯುತ್ತಿದ್ದು, ಇದರಿಂದ ಟ್ವಿಟರ್​ಗೆ ಕೊಂಚ ಹಣ ಬರುತ್ತಿದೆ.