ಬೆಳಗಾವಿ : ಶಹಾಪುರದ ಸರಸ್ವತಿ ರಸ್ತೆಯಲ್ಲಿರುವ ಪ್ರಜಾಪಿತ ಬ್ರಹ್ಮಾಕುಮಾರಿ ಈಶ್ವರೀಯ ವಿಶ್ವ ವಿದ್ಯಾಲಯದ ಶಹಾಪುರ ಕೇಂದ್ರದಲ್ಲಿ ಗುರುವಾರ ಬೆಳಿಗ್ಗೆ ಶ್ರೀಕೃಷ್ಣ ಜನ್ಮಾಷ್ಟಮಿ ಪ್ರಯುಕ್ತ ವಿಶೇಷ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು.
ಶಹಾಪುರ ಕೇಂದ್ರದ ಮುಖ್ಯಸ್ಥೆ ಬ್ರಹ್ಮಾಕುಮಾರಿ ಮೀನಾಕ್ಷಿ ದೀದಿ, ಬ್ರಹ್ಮಾಕುಮಾರಿ ಅನ್ನಪೂರ್ಣಾ ದೀದಿ, ಬ್ರಹ್ಮಾಕುಮಾರಿ ರಾಧಿಕಾ ದೀದಿ ಮತ್ತು ಬ್ರಹ್ಮಾಕುಮಾರ್ ಕಾಶಿನಾಥ್ ಭಾಯಿ ಉಪಸ್ಥಿತರಿದ್ದರು.
ಈ ಸಂದರ್ಭದಲ್ಲಿ ಮಾತನಾಡಿದ ಬ್ರಹ್ಮಾಕುಮಾರಿ ಮೀನಾಕ್ಷಿ ದೀದಿ ಅವರು, ಭಗವಾನ್ ಶ್ರೀಕೃಷ್ಣನ ವಿವಿಧ ಲೀಲೆಗಳು, ಅವತಾರಗಳು ಮತ್ತು ಶ್ರೀಕೃಷ್ಣ ಜನ್ಮಾಷ್ಟಮಿಯ ಮಹತ್ವವನ್ನು ವಿವರಿಸಿದರು. ಸಂಸ್ಕಾರಗಳ ವಿನಿಮಯವೇ ಶ್ರೀಕೃಷ್ಣ ಜನ್ಮಾಷ್ಟಮಿಯ ಮೂಲ ಸಂದೇಶವಾಗಿದೆ ಎಂದು ಅವರು ತಿಳಿಸಿದರು.
ಮನುಷ್ಯನು ತನ್ನ ಜೀವನವನ್ನು ಸತ್ಕಾರ್ಯಕ್ಕಾಗಿ ಮುಡಿಪಾಗಿಡಲು ಅಹಂಕಾರ ಮತ್ತು ಅಭಿಮಾನವನ್ನು ತ್ಯಜಿಸಬೇಕು. ಭಗವಾನ್ ಶ್ರೀಕೃಷ್ಣನ ವಿವಿಧ ಲೀಲೆಗಳಿಂದ ಮನುಷ್ಯನಿಗೆ ಉತ್ತಮ ರೀತಿಯಲ್ಲಿ ಜೀವನ ನಡೆಸಲು ಪ್ರೇರಣೆ ಸಿಗುತ್ತದೆ. ಭಗವಾನ್ ಶ್ರೀಕೃಷ್ಣನು ಒಬ್ಬ ಒಳ್ಳೆಯ ಪುತ್ರ, ಒಬ್ಬ ಒಳ್ಳೆಯ ಮಿತ್ರ, ಒಬ್ಬ ಒಳ್ಳೆಯ ಪತಿಯಾಗಿದ್ದರು, ಅವರಂತೆ ಆಗಬೇಕು ಎಂಬ ದೃಢ ಇಚ್ಛೆ ಪ್ರತಿಯೊಬ್ಬರ ಮನದಲ್ಲಿರಬೇಕು ಎಂದು ಹೇಳಿದರು.
ಉಪಸ್ಥಿತರಿಗೆ ಧ್ಯಾನ ಧಾರಣೆಯ ಮಹತ್ವವನ್ನು ಸಹ ತಿಳಿಸಿಕೊಡಲಾಯಿತು.
ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾಗಿ ಪುಟ್ಟ ಮಕ್ಕಳು ಕೃಷ್ಣನ ವೇಷದಲ್ಲಿ ಉಪಸ್ಥಿತರಿದ್ದರು. ಅವರಿಂದ ಕೃಷ್ಣ ಲೀಲೆ ಆಧಾರಿತ ಸಾಂಸ್ಕೃತಿಕ ಕಾರ್ಯಕ್ರಮ ನಡೆಯಿತು.
ಪ್ರಜಾಪಿತ ಬ್ರಹ್ಮಾಕುಮಾರಿ ವತಿಯಿಂದ ಕೆಎಲ್ಇ ಶತಾಬ್ದಿ ಆಸ್ಪತ್ರೆಯಲ್ಲಿ ಹಮ್ಮಿಕೊಂಡಿದ್ದ ರಕ್ತದಾನ ಶಿಬಿರದಲ್ಲಿ ಭಾಗವಹಿಸಿದ ರಕ್ತದಾನಿಗಳಿಗೆ ಪ್ರಮಾಣ ಪತ್ರಗಳನ್ನು ನೀಡಿ ಗೌರವಿಸಲಾಯಿತು.
ಬ್ರಹ್ಮಾಕುಮಾರ್ ಶ್ರೀಕಾಂತ್ ಭಾಯಿ, ಬ್ರಹ್ಮಾಕುಮಾರ್ ದತ್ತಾತ್ರೇಯ ಭಾಯಿ, ಬ್ರಹ್ಮಾಕುಮಾರ್ ಮನೋಹರ್ ಭಾಯಿ, ರಜಪೂತ್ ಭಾಯಿ, ಬಸವರಾಜ ಸದಲಗಿ, ದಾನಪ್ಪ ಕಟ್ಟಿಮನಿ ಸೇರಿದಂತೆ ಹೆಚ್ಚಿನ ಸಂಖ್ಯೆಯಲ್ಲಿ ಸಹೋದರ-ಸಹೋದರಿಯರು ಉಪಸ್ಥಿತರಿದ್ದರು.
