ವಾಷಿಂಗ್ಟನ್: ಉದ್ಯೋಗ ಆಧಾರಿತ ಗ್ರೀನ್ ಕಾರ್ಡ್ ವಿತರಣೆಯಲ್ಲಿ ಪ್ರಸ್ತುತ ಜಾರಿಯಲ್ಲಿರುವ 'ದೇಶವಾರು ಕೋಟಾ' (ಪರ್-ಕಂಟ್ರಿ ಕ್ಯಾಪ್) ನಿಯಮವನ್ನು ತಕ್ಷಣವೇ ರದ್ದುಗೊಳಿಸಬೇಕು ಎಂದು ಅಮೆರಿಕದ ಪ್ರಭಾವಿ ಸಂಸದ ಜೋಶ್ ಗೋಥೈಮರ್ ಪುನರುಚ್ಚರಿಸಿದ್ದಾರೆ.
ಅಮೆರಿಕ ವಿದೇಶಾಂಗ ಇಲಾಖೆಯ ಇತ್ತೀಚಿನ ವೀಸಾ ಬುಲೆಟಿನ್ ಪ್ರಕಾರ, ಭಾರತದ ಉನ್ನತ ಶಿಕ್ಷಣ ಪಡೆದ ನುರಿತ ವೃತ್ತಿಪರರು ಬರೋಬ್ಬರಿ 13 ವರ್ಷಗಳ ಹಿಂದೆ ಸಲ್ಲಿಸಿದ ಅರ್ಜಿಗಳು ಈಗಷ್ಟೇ ಪ್ರಕ್ರಿಯೆಗೆ ಬರುತ್ತಿರುವುದನ್ನು ಉಲ್ಲೇಖಿಸಿ ಅವರು ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ.
ನ್ಯೂಜೆರ್ಸಿಯ ಡೆಮಾಕ್ರಟಿಕ್ ಸಂಸದರಾಗಿರುವ ಜೋಶ್ ಗೋಥೈಮರ್ ತಮ್ಮ 'ಎಕ್ಸ್' (ಟ್ವಿಟರ್) ಖಾತೆಯಲ್ಲಿ ಪೋಸ್ಟ್ ಮಾಡಿದ್ದು, "ಗ್ರೀನ್ ಕಾರ್ಡ್ ಪಡೆಯಲು ಬರೋಬ್ಬರಿ 179 ವರ್ಷ ಕಾಯಬೇಕಾದ ಪರಿಸ್ಥಿತಿಯನ್ನು ಒಮ್ಮೆ ಕಲ್ಪಿಸಿಕೊಳ್ಳಿ. ಸದ್ಯ ಭಾರತೀಯ ಅರ್ಜಿದಾರರು ಎದುರಿಸುತ್ತಿರುವ ಅಂದಾಜು ಕಾಯುವಿಕೆ ಅವಧಿ ಇದು. ಈ ವಿಳಂಬವನ್ನು ತಪ್ಪಿಸಿ ಪ್ರಕ್ರಿಯೆಯನ್ನು ತ್ವರಿತಗೊಳಿಸಲು ನಾನು ದೇಶವಾರು ಮಿತಿಯನ್ನು ತೆಗೆದುಹಾಕುವ ಪರವಾಗಿ ಮತ ಚಲಾಯಿಸಿದ್ದೇನೆ. ಕಾನೂನನ್ನು ಕಟ್ಟುನಿಟ್ಟಾಗಿ ಪಾಲಿಸುವುದರ ಜತೆಗೆ ಅಮೆರಿಕದ ವಲಸೆ ಮೌಲ್ಯಗಳನ್ನು ನಾವು ಎತ್ತಿಹಿಡಿಯಬೇಕಿದೆ" ಎಂದು ಪ್ರತಿಪಾದಿಸಿದ್ದಾರೆ.
ವರ್ಜೀನಿಯಾದ ಆರ್ಲಿಂಗ್ಟನ್ ಮೂಲದ ಸಂಶೋಧನಾ ಸಂಸ್ಥೆಯಾದ 'ನ್ಯಾಷನಲ್ ಫೌಂಡೇಶನ್ ಫಾರ್ ಅಮೇರಿಕನ್ ಪಾಲಿಸಿ' (NFAP) ಪ್ರಕಟಿಸಿದ ಅಧ್ಯಯನ ವರದಿಯ ಪ್ರಕಾರ ಈ 179 ವರ್ಷಗಳ ಕಾಯುವಿಕೆಯ ಅಂಕಿ-ಅಂಶ ಹೊರಬಿದ್ದಿದೆ. ಜನವರಿ 2026 ಅಥವಾ ನಂತರ ಅರ್ಜಿ ಸಲ್ಲಿಸುವ ಭಾರತೀಯ ಪ್ರಜೆಗಳು ಇಬಿ-2 (EB-2 - ಉನ್ನತ ಪದವೀಧರರು) ವಿಭಾಗದಲ್ಲಿ ಸಂಭಾವ್ಯವಾಗಿ 179 ವರ್ಷ ಹಾಗೂ ಇಬಿ-3 (EB-3 - ನುರಿತ ಕೆಲಸಗಾರರು) ವಿಭಾಗದಲ್ಲಿ ಸುಮಾರು 38 ವರ್ಷಗಳ ಕಾಲ ಕಾಯಬೇಕಾಗಬಹುದು ಎಂದು ಸಂಸ್ಥೆ ಅಂದಾಜಿಸಿದೆ. 2025ರ ಡಿಸೆಂಬರ್ ಅಂತ್ಯದ ವೇಳೆಗೆ ಮೊದಲ ಮೂರು ಉದ್ಯೋಗ ಆಧಾರಿತ ವಿಭಾಗಗಳಲ್ಲಿ ಕಾಯುತ್ತಿರುವ 12,64,495 ಜನರಲ್ಲಿ ಶೇ. 79ರಷ್ಟು, ಅಂದರೆ ಸುಮಾರು 9,96,599 ಮಂದಿ ಭಾರತೀಯರೇ ಆಗಿದ್ದಾರೆ.
ಕ್ಯಾಟೋ ಇನ್‌ಸ್ಟಿಟ್ಯೂಟ್‌ನ ವಿಶ್ಲೇಷಕ ಡೇವಿಡ್ ಬಿಯರ್ ಅವರ ಹಿಂದಿನ ಅಧ್ಯಯನದ ಪ್ರಕಾರವೂ, ಒಟ್ಟಾರೆ ಉದ್ಯೋಗ ಆಧಾರಿತ ಅರ್ಜಿಗಳ ಹಿನ್ನಡೆಯ ಪೈಕಿ ಶೇ. 63ರಷ್ಟು ಪಾಲು ಭಾರತೀಯರದೇ ಆಗಿದ್ದು, ಸುಮಾರು 11 ಲಕ್ಷಕ್ಕೂ ಹೆಚ್ಚು ಅರ್ಜಿಗಳು ಬಾಕಿ ಉಳಿದಿವೆ.
ವಿದೇಶಾಂಗ ಇಲಾಖೆ ಬಿಡುಗಡೆ ಮಾಡಿರುವ 2026ರ ಅಕ್ಟೋಬರ್ ತಿಂಗಳ ವೀಸಾ ಬುಲೆಟಿನ್ ಪ್ರಕಾರ, ಭಾರತೀಯ ಇಬಿ-2 ಅರ್ಜಿದಾರರ ಅಂತಿಮ ಪ್ರಕ್ರಿಯೆಯ ದಿನಾಂಕ ನವೆಂಬರ್ 1, 2013 ಆಗಿದೆ. ಅಂದರೆ 2013ರ ನವೆಂಬರ್‌ನಲ್ಲಿ ಸಲ್ಲಿಸಿದ ಅರ್ಜಿಗಳನ್ನು ಈಗ ಪರಿಶೀಲಿಸಲಾಗುತ್ತಿದೆ. ಆದರೆ ಇತರ ಬಹುತೇಕ ದೇಶಗಳ ಅರ್ಜಿದಾರರಿಗೆ ಇದು ಜನವರಿ 1, 2025ರ ಗಡಿಯಲ್ಲಿದೆ. ಹಾಗೆಯೇ ಭಾರತೀಯರ ಇಬಿ-3 ಕಟ್-ಆಫ್ ದಿನಾಂಕ ಜನವರಿ 1, 2014 ಆಗಿದ್ದರೆ, ಇತರ ದೇಶಗಳಿಗೆ ಮೇ 15, 2024 ಆಗಿದೆ.
ಅಮೆರಿಕದ ವಲಸೆ ಮತ್ತು ರಾಷ್ಟ್ರೀಯತೆ ಕಾಯ್ದೆಯ ಸೆಕ್ಷನ್ 202ರ ಅಡಿಯಲ್ಲಿ ಯಾವುದೇ ಒಂದು ದೇಶಕ್ಕೆ ವಾರ್ಷಿಕ ಉದ್ಯೋಗ ಹಾಗೂ ಕುಟುಂಬ ಆಧಾರಿತ ಗ್ರೀನ್ ಕಾರ್ಡ್‌ಗಳ ಪೈಕಿ ಶೇ. 7ಕ್ಕಿಂತ ಹೆಚ್ಚು ನೀಡುವಂತಿಲ್ಲ ಎಂಬ ಮಿತಿ ಇದೆ. ಈ ಮಿತಿಯನ್ನು ರದ್ದುಪಡಿಸುವ ಉದ್ದೇಶದಿಂದ ಜುಲೈ 2019 ರಲ್ಲಿ ತರಲಾಗಿದ್ದ 'ಫೇರ್‌ನೆಸ್ ಫಾರ್ ಹೈ-ಸ್ಕಿಲ್ಡ್ ಇಮಿಗ್ರೆಂಟ್ಸ್ ಆ್ಯಕ್ಟ್' ಮಸೂದೆಗೆ ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್‌ನಲ್ಲಿ ಜೋಶ್ ಗೋಥೈಮರ್ ಸೇರಿದಂತೆ 365 ಸದಸ್ಯರು ಬೆಂಬಲ ವ್ಯಕ್ತಪಡಿಸಿದ್ದರು. ಸದನದಲ್ಲಿ ಬಹುಮತದಿಂದ ಅಂಗೀಕಾರಗೊಂಡಿದ್ದರೂ, ಆ ಮಸೂದೆ ಅಂತಿಮವಾಗಿ ಶಾಸನ ರೂಪ ಪಡೆಯಲು ಸಾಧ್ಯವಾಗಿರಲಿಲ್ಲ. ಪ್ರಸ್ತುತ ಭಾರತೀಯ ಟೆಕ್ಕಿಗಳು ಹಾಗೂ ನುರಿತ ಉದ್ಯೋಗಿಗಳು ಎದುರಿಸುತ್ತಿರುವ ಈ ಗಂಭೀರ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ದೇಶವಾರು ಕೋಟಾ ರದ್ದುಪಡಿಸುವ ಚರ್ಚೆ ಮತ್ತೆ ಮುನ್ನೆಲೆಗೆ ಬಂದಿದೆ.
