ಭಾರತೀಯ ನೋಂದಾಯಿತ ವಿಮಾನಗಳು ಹಾಗೂ ಭಾರತೀಯ ವಿಮಾನಯಾನ ಸಂಸ್ಥೆಗಳಿಗೆ ಸೇರಿದ, ಕಾರ್ಯಾಚರಣೆ ನಡೆಸುವ ಅಥವಾ ಬಾಡಿಗೆಗೆ ಪಡೆದಿರುವ ವಿಮಾನಗಳಿಗೆ ತಮ್ಮ ವಾಯುಪ್ರದೇಶ ಪ್ರವೇಶಿಸುವುದಕ್ಕೆ ವಿಧಿಸಲಾಗಿದ್ದ ನಿಷೇಧವನ್ನು ಪಾಕಿಸ್ತಾನ ಸರ್ಕಾರವು ನವೆಂಬರ್ 24 ರವರೆಗೆ ಮತ್ತೆ ಒಂದು ತಿಂಗಳ ಅವಧಿಗೆ ವಿಸ್ತರಿಸಿದೆ. ಉಭಯ ದೇಶಗಳ ನಡುವೆ ರಾಜತಾಂತ್ರಿಕ ಸಂಬಂಧಗಳು ಬಿಗಡಾಯಿಸಿರುವ ಹಿನ್ನೆಲೆಯಲ್ಲಿ 2025 ರ ಏಪ್ರಿಲ್ 23 ರಿಂದ ಜಾರಿಯಲ್ಲಿರುವ ಈ ನಿರ್ಬಂಧವನ್ನು ನಿಯತಕಾಲಿಕವಾಗಿ ವಿಸ್ತರಿಸಲಾಗುತ್ತಿದ್ದು, ನೂತನ ಆದೇಶವು ಪಾಕಿಸ್ತಾನದ ಸೇನಾ ವಿಮಾನಗಳ ಕಾರ್ಯಾಚರಣೆಯ ಮೇಲೆಯೂ ಅನ್ವಯಿಸಲಿದೆ ಎಂದು ಪಾಕಿಸ್ತಾನ ವಿಮಾನನಿಲ್ದಾಣಗಳ ಪ್ರಾಧಿಕಾರ (PAA) ತಿಳಿಸಿದೆ.
ಹೊಸ ವೈಮಾನಿಕ ಸೂಚನೆ (NOTAM) ಪ್ರಕಾರ, ಈ ನಿಷೇಧವು ಪಾಕಿಸ್ತಾನದ ಕರಾಚಿ ಮತ್ತು ಲಾಹೋರ್ ವ್ಯಾಪ್ತಿಯ ಎರಡೂ ವಾಯುಪ್ರದೇಶ ಪ್ರದೇಶಗಳಿಗೆ ಅನ್ವಯಿಸಲಿದ್ದು, ನವೆಂಬರ್ 24 ರ ಬೆಳಿಗ್ಗೆ 4:59 ರವರೆಗೆ ಜಾರಿಯಲ್ಲಿರಲಿದೆ. ಜಮ್ಮು ಮತ್ತು ಕಾಶ್ಮೀರದ ಪಹಲ್ಗಾಮ್‌ನಲ್ಲಿ 2025 ರ ಏಪ್ರಿಲ್‌ನಲ್ಲಿ ನಡೆದ ಭೀಕರ ಭಯೋತ್ಪಾದನಾ ದಾಳಿಯ ಬಳಿಕ ಉಭಯ ದೇಶಗಳ ನಡುವೆ ಸೇನಾ ಹಾಗೂ ರಾಜತಾಂತ್ರಿಕ ಉದ್ವಿಗ್ನತೆ ಹೆಚ್ಚಾಗಿತ್ತು. ಈ ಘಟನೆಯ ನಂತರ ಭಾರತವು ಏಪ್ರಿಲ್ 30 ರಿಂದ ಪಾಕಿಸ್ತಾನಿ ವಿಮಾನಗಳಿಗೆ ತನ್ನ ವಾಯುಪ್ರದೇಶವನ್ನು ಬಂದ್ ಮಾಡಿತ್ತು.
ಈ ಹಿಂದೆಯೂ 1999 ರ ಕಾರ್ಗಿಲ್ ಯುದ್ಧ ಹಾಗೂ 2019 ರ ಪುಲ್ವಾಮಾ ದಾಳಿಯ ಸಂದರ್ಭದಲ್ಲಿ ಪಾಕಿಸ್ತಾನವು ಭಾರತೀಯ ವಿಮಾನಗಳಿಗೆ ವಾಯುಪ್ರದೇಶ ನಿಷೇಧಿಸಿತ್ತು. ಪ್ರಸ್ತುತ ಮುಂದುವರಿದಿರುವ ಈ ನಿಷೇಧದಿಂದಾಗಿ ಸಾಂಪ್ರದಾಯಿಕ ವೈಮಾನಿಕ ಮಾರ್ಗಗಳು ಬಂದ್ ಆಗಿದ್ದು, ಅಂತರರಾಷ್ಟ್ರೀಯ ವಿಮಾನಗಳು ಪರ್ಯಾಯ ಮತ್ತು ಸುದೀರ್ಘ ಮಾರ್ಗ ಬಳಸಿ ಸಂಚರಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ
