ಬೆಂಗಳೂರು: ಅಂಚೆ ಜೀವ ವಿಮೆ (PLI) ಮತ್ತು ಗ್ರಾಮೀಣ ಅಂಚೆ ಜೀವ ವಿಮೆ (RPLI) ಪಾಲಿಸಿದಾರರಿಗೆ ಮತ್ತಷ್ಟು ಉತ್ತಮ ಹಾಗೂ ವೇಗದ ಸೇವೆ ಒದಗಿಸುವ ಉದ್ದೇಶದಿಂದ ಬೆಂಗಳೂರು ಅಂಚೆ ಮಹಾ ಕಾರ್ಯಾಲಯವು (GPO) ಹೊಸ ತಂತ್ರಾಂಶವನ್ನು ಅಳವಡಿಸಿಕೊಳ್ಳುತ್ತಿದೆ. ಪ್ರಸ್ತುತ ಚಾಲ್ತಿಯಲ್ಲಿರುವ 'ಮ್ಯಾಕ್‌ಕ್ಯಾಮಿಷ್' ತಂತ್ರಾಂಶದ ಬದಲಾಗಿ 'ಇನ್ಶೂರೆನ್ಸ್ ಮ್ಯಾನೇಜ್‌ಮೆಂಟ್ ಸೊಲ್ಯೂಷನ್' (Insurance Management Solution) ಎಂಬ ನೂತನ ತಂತ್ರಾಂಶವನ್ನು ಜಾರಿಗೆ ತರಲಾಗುತ್ತಿದೆ. ಈ ಹೊಸ ವ್ಯವಸ್ಥೆಯು ಅಕ್ಟೋಬರ್ 26ರಿಂದ ಅಧಿಕೃತವಾಗಿ ಕಾರ್ಯಾರಂಭ ಮಾಡಲಿದೆ.
ಈ ತಾಂತ್ರಿಕ ಬದಲಾವಣೆ ಮತ್ತು ನವೀಕರಣ ಕಾರ್ಯಗಳ ಹಿನ್ನೆಲೆಯಲ್ಲಿ ಅಕ್ಟೋಬರ್ 22ರಿಂದ 25ರವರೆಗೆ ಬೆಂಗಳೂರು ಜಿಪಿಒ ಸೇರಿದಂತೆ ನಗರದ ವಿವಿಧ ಪ್ರಮುಖ ಅಂಚೆ ಕಚೇರಿಗಳಲ್ಲಿ ಪಿಎಲ್‌ಐ ಹಾಗೂ ಆರ್‌ಪಿಎಲ್‌ಐಗೆ ಸಂಬಂಧಿಸಿದ ಪ್ರೀಮಿಯಂ ಸಂಗ್ರಹಣೆ, ಸಾಲ ಮರುಪಾವತಿ ಪ್ರಕ್ರಿಯೆ ಮತ್ತು ಗ್ರಾಹಕ ಸೇವೆಗಳು ಲಭ್ಯವಿರುವುದಿಲ್ಲ ಎಂದು ಜಿಪಿಒ ಮುಖ್ಯ ಅಂಚೆಪಾಲರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ. ಅರೇಬಿಕ್ ಕಾಲೇಜು, ಬಾಣಸವಾಡಿ, ಫ್ರೇಸರ್ ಟೌನ್, ಹೈಕೋರ್ಟ್, ಕಲ್ಯಾಣ ನಗರ, ವಿಧಾನಸೌಧ, ರಾಜಭವನ, ವಸಂತನಗರ ಸೇರಿದಂತೆ ಸುತ್ತಮುತ್ತಲಿನ ಹಲವು ಅಂಚೆ ಕಚೇರಿಗಳಲ್ಲಿ ಈ ಸೇವೆಗಳು ತಾತ್ಕಾಲಿಕವಾಗಿ ಸ್ಥಗಿತಗೊಳ್ಳಲಿವೆ.
ಆದರೆ, ಬೆಂಗಳೂರು ಜಿಪಿಒ ಹೊರತುಪಡಿಸಿ ಇತರ ಅಂಚೆ ಕಚೇರಿಗಳಿಂದ ಪಾಲಿಸಿ ಪಡೆದಿರುವ ಗ್ರಾಹಕರಿಗೆ ಇದರಿಂದ ಯಾವುದೇ ತೊಂದರೆಯಾಗುವುದಿಲ್ಲ. ಅಂತಹ ಪಾಲಿಸಿದಾರರು ಈ ಅವಧಿಯಲ್ಲಿ ಆನ್‌ಲೈನ್ ಮೂಲಕ ಅಥವಾ ನಗರದ ಇತರ ಮುಖ್ಯ ಅಂಚೆ ಕಚೇರಿಗಳಿಗೆ ತೆರಳಿ ತಮ್ಮ ಪ್ರೀಮಿಯಂ ಅನ್ನು ಯಥಾರೀತಿ ಪಾವತಿಸಬಹುದು ಎಂದು ಅಂಚೆ ಇಲಾಖೆ ಸ್ಪಷ್ಟಪಡಿಸಿದೆ.
