ಚಿತ್ರ ವಿಚಿತ್ರ ಫ್ಯಾಷನ್ ಮೂಲಕ ಸುದ್ದಿಯಾಗುವ ನಟಿ, ಮಾಡೆಲ್ ಉರ್ಫಿ ಜಾವೇದ್, ಸಂಪೂರ್ಣ ವಿಭಿನ್ನ ಕಾರಣದಿಂದಾಗಿ ಸುದ್ದಿಯಲ್ಲಿದ್ದಾರೆ.
ಆದರೆ, ಅವರು ಇತ್ತೀಚೆಗೆ ಹಂಚಿಕೊಂಡಿರುವ ಫೋಟೋ ಮತ್ತು ವಿಡಿಯೋಗಳು ಅವರ ಅಭಿಮಾನಿ ಬಳಗಕ್ಕೆ ಆಘಾತವನ್ನುಂಟುಮಾಡಿವೆ. ಈ ಚಿತ್ರಗಳಲ್ಲಿ ಉರ್ಫಿಯವರ ಮುಖ ರಕ್ತಸಿಕ್ತವಾಗಿದ್ದು, ಕಣ್ಣಿನ ಕೆಳಗೆ ಆಳವಾದ ಗಾಯ ಮತ್ತು ಊತ ಸ್ಪಷ್ಟವಾಗಿ ಕಾಣಿಸಿಕೊಂಡಿದೆ. ಇದು ಯಾವುದೇ ಅಪಘಾತ, ಹಲ್ಲೆ ಅಥವಾ ವಿವಾದದ ಪರಿಣಾಮವಲ್ಲ. ಬದಲಿಗೆ, ಈ ಗಾಯಗಳಿಗೆ ಕಾರಣವಾಗಿದ್ದು ಅವರ ಮನೆಯಲ್ಲೇ ಇರುವ ಅವರ ಪ್ರೀತಿಯ ಸಾಕು ಬೆಕ್ಕು. ಉರ್ಫಿ ಜಾವೇದ್ ಅವರ ಮುಖಕ್ಕೆ ಗಾಯ ಮಾಡಿರುವುದು ಅವರ ಮುದ್ದಿನ ಬೆಕ್ಕಿನ ತುಂಟಾಟ. ಈ ಬಗ್ಗೆ ಉರ್ಫಿ ಅವರೇ ತಮ್ಮ ಇನ್ಸ್ಟಾಗ್ರಾಮ್ ಸ್ಟೋರಿಗಳಲ್ಲಿ ಸ್ಪಷ್ಟನೆ ನೀಡಿದ್ದಾರೆ.
ತಮ್ಮ ಮುಖದ ಮೇಲಾದ ಗಾಯದ ಚಿತ್ರಗಳನ್ನು ಹಂಚಿಕೊಂಡ ಉರ್ಫಿ, ನಾನು ಸೋಫಾದ ಮೇಲೆ ಸುಮ್ಮನೆ ಕುಳಿತಿದ್ದೆ, ಇದ್ದಕ್ಕಿದ್ದಂತೆ ನನ್ನ ಬೆಕ್ಕು ನನ್ನನ್ನು ಪರಚಿಬಿಟ್ಟಿತು ಎಂದು ಬರೆದುಕೊಂಡಿದ್ದಾರೆ. ಆಟವಾಡುತ್ತಿದ್ದಾಗ ಬೆಕ್ಕಿನ ಉಗುರುಗಳು ಆಕಸ್ಮಿಕವಾಗಿ ಅವರ ಮುಖಕ್ಕೆ ತಗುಲಿ, ಕಣ್ಣಿನ ಕೆಳಗೆ ಆಳವಾದ ಗಾಯವಾಗಿದೆ. ಅವರು ಮತ್ತೊಂದು ವಿಡಿಯೋವನ್ನು ಪೋಸ್ಟ್ ಮಾಡಿದ್ದು, ಅದರಲ್ಲಿ ತಮ್ಮ ಕಣ್ಣಿನ ಕೆಳಗಿನ ಗಾಯವನ್ನು ಜೂಮ್ ಮಾಡಿ ತೋರಿಸಿದ್ದಾರೆ. ಮುಖದ ಮೇಲೆ ಇಷ್ಟೆಲ್ಲಾ ಗಾಯಗಳಾಗಿದ್ದರೂ, ಉರ್ಫಿ ಇದನ್ನು ಬಹಳ ತಮಾಷೆಯಾಗಿ ತೆಗೆದುಕೊಂಡಿದ್ದಾರೆ. ಅವರು ನಗುತ್ತಲೇ ವಿಡಿಯೋ ಮಾಡಿ, ಪರಿಸ್ಥಿತಿಯನ್ನು ಹಗುರವಾಗಿ ಬಿಂಬಿಸಿದ್ದಾರೆ.
ಸದಾ ವಿವಾದಾತ್ಮಕ ಹೇಳಿಕೆಗಳು ಮತ್ತು ವಿಚಿತ್ರ ಉಡುಪುಗಳಿಂದ ಸುದ್ದಿಯಾಗುತ್ತಿದ್ದ ಉರ್ಫಿ, ಇದೇ ಮೊದಲ ಬಾರಿಗೆ ಇಂತಹ ಗಾಯಗಳೊಂದಿಗೆ ಕಾಣಿಸಿಕೊಂಡಿದ್ದು ಸಹಜವಾಗಿಯೇ ಎಲ್ಲರಲ್ಲೂ ಆತಂಕ ಮೂಡಿಸಿತ್ತು.
