ದಸರಾ ಮತ್ತು ದುರ್ಗಾಪೂಜೆ ಮುಗಿದು ದೀಪಾವಳಿ ಹಬ್ಬದ ಸಂಭ್ರಮಕ್ಕೆ ದೇಶ ಸಜ್ಜಾಗುತ್ತಿರುವ ಈ ಸಂದರ್ಭದಲ್ಲಿ, ತುರ್ತು ಹಣಕಾಸಿನ ಅಗತ್ಯವಿರುವ ಗ್ರಾಹಕರನ್ನು ಗುರಿಯಾಗಿಸಿಕೊಂಡು ವಾಟ್ಸಾಪ್‌ನಲ್ಲಿ ನಕಲಿ ಸಾಲದ ಆಫರ್‌ಗಳನ್ನು ನೀಡುವ ವಂಚನೆಗಳು ಹೆಚ್ಚುತ್ತಿವೆ. ಯಾವುದೇ ದಾಖಲೆಗಳಿಲ್ಲದೆ ತಕ್ಷಣವೇ ಸಾಲ ಮಂಜೂರು ಮಾಡುವುದಾಗಿ ಹಾಗೂ ಕನಿಷ್ಠ ಬಡ್ಡಿದರ ವಿಧಿಸುವುದಾಗಿ ಬರುವ ವಾಟ್ಸಾಪ್ ಸಂದೇಶಗಳನ್ನು ಕುರುಡಾಗಿ ನಂಬಬಾರದು ಎಂದು ಆರ್ಥಿಕ ತಜ್ಞರು ಎಚ್ಚರಿಸಿದ್ದಾರೆ. ತುರ್ತು ಆಸ್ಪತ್ರೆ ವೆಚ್ಚ, ಶಿಕ್ಷಣ ಅಥವಾ ಹಬ್ಬದ ಖರ್ಚುಗಳಿಗಾಗಿ ಹಣದ ಅಗತ್ಯವಿರುವ ಸಾರ್ವಜನಿಕರು ಇಂತಹ ಆಕರ್ಷಕ ಸಂದೇಶಗಳಿಗೆ ಮರುಳಾಗಿ ಅನುಮಾನಾಸ್ಪದ ಲಿಂಕ್‌ಗಳನ್ನು ಕ್ಲಿಕ್ ಮಾಡುವ ಮೂಲಕ ವಂಚಕರ ಬಲೆಗೆ ಬೀಳುತ್ತಿದ್ದಾರೆ.
ಯಾವುದೇ ವಾಟ್ಸಾಪ್ ಸಾಲದ ಲಿಂಕ್ ಕ್ಲಿಕ್ ಮಾಡುವ ಮುನ್ನ ಗ್ರಾಹಕರು ಮುಖ್ಯವಾಗಿ ಐದು ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಳ್ಳುವುದು ಅತ್ಯಗತ್ಯ. ಮೊದಲನೆಯದಾಗಿ ಸಾಲ ನೀಡುವ ಸಂಸ್ಥೆಯು ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (RBI) ನಿಂದ ಅನುಮೋದನೆ ಪಡೆದಿದೆಯೇ ಅಥವಾ ನೋಂದಾಯಿತ ಬ್ಯಾಂಕ್/ಎನ್‌ಬಿಎಫ್‌ಸಿ (NBFC) ಆಗಿದೆಯೇ ಎಂಬುದನ್ನು ಪರಿಶೀಲಿಸಬೇಕು. ಎರಡನೆಯದಾಗಿ ವಾಟ್ಸಾಪ್ ಪ್ರೊಫೈಲ್‌ನಲ್ಲಿರುವ ಲೋಗೋ ಅಥವಾ ಹೆಸರನ್ನು ನಂಬದೆ, ಯಾವುದೇ ಕಾರಣಕ್ಕೂ ಅಪರಿಚಿತರು ಕಳುಹಿಸುವ ಎಪಿಕೆ (APK) ಫೈಲ್‌ಗಳು ಹಾಗೂ ಶಾರ್ಟ್ ಲಿಂಕ್‌ಗಳನ್ನು ಕ್ಲಿಕ್ ಮಾಡಬಾರದು.
ಮೂರನೆಯದಾಗಿ, ಯಾವುದೇ ಸಾಲ ನೀಡುವ ಅಧಿಕೃತ ಸಂಸ್ಥೆಯು ಒಟಿಪಿ (OTP), ಎಟಿಎಂ ಪಿನ್, ಕ್ರೆಡಿಟ್ ಅಥವಾ ಡೆಬಿಟ್ ಕಾರ್ಡ್ ವಿವರಗಳನ್ನು ಕೇಳುವುದಿಲ್ಲವಾದ್ದರಿಂದ ಅಂತಹ ರಹಸ್ಯ ಮಾಹಿತಿಗಳನ್ನು ಯಾರೊಂದಿಗೂ ಹಂಚಿಕೊಳ್ಳಬಾರದು. ನಾಲ್ಕನೆಯದಾಗಿ, ಸಾಲದ ಬಡ್ಡಿದರ, ಪ್ರೊಸೆಸಿಂಗ್ ಶುಲ್ಕ ಹಾಗೂ ಮರುಪಾವತಿ ಅವಧಿಯ ನಿಯಮಾವಳಿಗಳನ್ನು ಕೂಲಂಕುಷವಾಗಿ ಓದಿ ಅರ್ಥೈಸಿಕೊಳ್ಳಬೇಕು. ಅಂತಿಮವಾಗಿ, ಸಾಲ ಮಂಜೂರು ಮಾಡಲು ಮುಂಗಡ ಹಣ ಅಥವಾ ಪ್ರೊಸೆಸಿಂಗ್ ಫೀಸ್ ಹೆಸರಿನಲ್ಲಿ ವೈಯಕ್ತಿಕ ಖಾತೆಗಳಿಗೆ ಹಣ ವರ್ಗಾಯಿಸುವಂತೆ ಕೋರಿದರೆ ಅದು ಶೇ. 100 ರಷ್ಟು ವಂಚನೆಯಾಗಿದ್ದು, ತಕ್ಷಣವೇ ಅಂತಹ ಸಂದೇಶಗಳನ್ನು ಬ್ಲಾಕ್ ಮಾಡಿ ಅಧಿಕೃತ ಸೈಬರ್ ಕ್ರೈಮ್ ಚಾನೆಲ್‌ಗಳಿಗೆ ದೂರು ನೀಡಲು ಸೂಚಿಸಲಾಗಿದೆ.
