BIG UPDATE: ಕೋಲ್ಕತ್ತಾ ದುರ್ಗಾಪೂಜಾ ಕಾಲ್ತುಳಿತ ದುರಂತ: 19 ಮಂದಿ ಸಾವು, ಆಯೋಜಕರು ಸೇರಿ 7 ಜನರ ಬಂಧನ!

ಕೋಲ್ಕತ್ತಾ: ಇಲ್ಲಿನ ಚೋರ್‌ಬಾಗನ್ ಸಾರ್ವಜನಿಕ ದುರ್ಗೋತ್ಸವ ಸಮಿತಿ ಆಯೋಜಿಸಿದ್ದ ದುರ್ಗಾಪೂಜಾ ಪೆಂಡಾಲ್‌ನಲ್ಲಿ ಸಂಭವಿಸಿದ ಭೀಕರ ಕಾಲ್ತುಳಿತ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಕಠಿಣ ಕ್ರಮ ಕೈಗೊಂಡಿದ್ದು, ಸಮಿತಿಯ ಪ್ರಮುಖ ಪದಾಧಿಕಾರಿಗಳು ಸೇರಿದಂತೆ ಏಳು ಜನರನ್ನು ಬಂಧಿಸಿದ್ದಾರೆ. ಇದೇ ಪ್ರಕರಣದಲ್ಲಿ ಇತರ 14 ಜನರನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಲಾಗುತ್ತಿದೆ. ಭಕ್ತರ ನೂಕುನುಗ್ಗಲಿಗೆ ಸಿಲುಕಿ 19 ಜನರು ಮೃತಪಟ್ಟಿದ್ದು, 25ಕ್ಕೂ ಹೆಚ್ಚು ಮಂದಿ ಗಂಭೀರವಾಗಿ ಗಾಯಗೊಂಡಿದ್ದಾರೆ.

Also read

BREAKING : ಪಶ್ಚಿಮಬಂಗಾಳದಲ್ಲಿ 17 ವರ್ಷದ ಬಾಲಕಿ ಅತ್ಯಾಚಾರ ಕೊಲೆ ಕೇಸ್ : ಆರೋಪಿ ಎನ್ಕೌಂಟರ್!

ಪ್ರಮುಖರ ಬಂಧನ, ಸ್ವಯಂಪ್ರೇರಿತ ಎಫ್‌ಐಆರ್ ದಾಖಲು: 

ಬಂಧಿತರಲ್ಲಿ ಸಮಿತಿಯ ಕಾರ್ಯದರ್ಶಿ ರಾಜ್ ಕುಮಾರ್ ಸೆವ್ರಾ ಅಲಿಯಾಸ್ ರಾಜಾ (48), ಉಪಾಧ್ಯಕ್ಷ ಶಾಂತನು ದುಬೆ (55), ಬಿಪ್ಲಬ್ ಮುಖರ್ಜಿ ಅಲಿಯಾಸ್ ಜಾಯ್ (48), ಕೌಶಿಕ್ ಸಹಾ (53), ಪಿಂಟು ದೇ (51) ಹಾಗೂ ಭದ್ರತಾ ಉಸ್ತುವಾರಿಗಳಾದ ಸುಮನ್ ಚಕ್ರವರ್ತಿ (30) ಮತ್ತು ರಾಜೇಶ್ ಪಾಲ್ (29) ಸೇರಿದ್ದಾರೆ. ಕೋಲ್ಕತ್ತಾ ಪೊಲೀಸರು ಆಯೋಜಕರು ಹಾಗೂ ಭದ್ರತಾ ಸಿಬ್ಬಂದಿಯ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆಯ (BNS) ಸೆಕ್ಷನ್ 105, 110 ಮತ್ತು 3(5) ಅಡಿಯಲ್ಲಿ ಸ್ವಯಂಪ್ರೇರಿತ (Suo moto) ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಮೂಲಗಳ ಪ್ರಕಾರ, ಬಿಪ್ಲಬ್ ಮುಖರ್ಜಿ ಜಾಹೀರಾತಿಗಾಗಿ ಬಿದಿರಿನ ರಚನೆ ನಿರ್ಮಾಣ ಮಾಡುವ ಉಸ್ತುವಾರಿ ವಹಿಸಿದ್ದರು. ಕೌಶಿಕ್ ಸಹಾ ಮತ್ತು ಪಿಂಟು ದೇ ಜನಸಂದಣಿ ನಿರ್ವಹಣೆ ಹಾಗೂ ವಿಐಪಿ ಪಾಸ್ ತಪಾಸಣೆ ಹೊಣೆ ಹೊತ್ತಿದ್ದರು. ಉಳಿದಿಬ್ಬರು ಭದ್ರತಾ ಮೇಲ್ವಿಚಾರಕರಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದರು.

Also read

BREAKING : ಕ್ಯಾನ್ಸರ್ ರೋಗಿಗಳಿಗೆ ಭಾರಿ ರಿಲೀಫ್: ಪ್ರಮುಖ ಔಷಧಿಗಳ ಬೆಲೆ ಶೇ. 70 ರಷ್ಟು ಇಳಿಕೆ ಮಾಡಿದ ಟೊರೆಂಟ್ ಫಾರ್ಮಾ!

ಮೃತರ ಪೈಕಿ ಪಿಯು ವಿದ್ಯಾರ್ಥಿನಿ, ನರ್ಸ್ ಹಾಗೂ ಭಾವಿ ವಧು: 

ಮೃತಪಟ್ಟ 19 ಜನರಲ್ಲಿ ಉತ್ತರ 24 ಪರಗಣ ಜಿಲ್ಲೆಯ ತಪತಿ ಬಾಲಿಕಾ ವಿದ್ಯಾಲಯದ 12ನೇ ತರಗತಿ ವಿದ್ಯಾರ್ಥಿನಿ ಪ್ರಿಯಾ ಸಮದ್ದಾರ್ ಸೇರಿದ್ದಾರೆ. ಬ್ಲೌಸ್ ಹೊಲಿಗೆ ವೃತ್ತಿ ಮಾಡುವ ತಂದೆಯ ಮಗಳಾದ ಈಕೆ ಸ್ನೇಹಿತರೊಂದಿಗೆ ನಗರದ ಪೂಜಾ ಮಂಟಪಗಳನ್ನು ವೀಕ್ಷಿಸಲು ಮೊದಲ ಬಾರಿಗೆ ಬಂದಿದ್ದಳು. ಹೂಗ್ಲಿ ಜಿಲ್ಲೆಯ ನಿವಾಸಿ ಹಾಗೂ ಟಾಟಾ ಕ್ಯಾನ್ಸರ್ ಆಸ್ಪತ್ರೆಯ 27 ವರ್ಷದ ನರ್ಸ್ ಶ್ರೀಪರ್ಣಾ ಪೋದ್ದಾರ್ ಕೂಡ ಮೃತಪಟ್ಟ ದುರ್ದೈವಿಗಳಲ್ಲಿ ಒಬ್ಬರು.

ಮುಂದಿನ ವರ್ಷ ವಿವಾಹವಾಗಬೇಕಿದ್ದ 20 ವರ್ಷದ ಸ್ನೇಹಾ ಭಂಡಾರಿ ಎಂಬ ಯುವತಿ ಕೂಡ ಕಾಲ್ತುಳಿತಕ್ಕೆ ಬಲಿಯಾಗಿದ್ದಾರೆ. ಆಕೆಯ ಭಾವಿ ಪತಿ ಅಭಿಷೇಕ್ ಮೊಂಡಾಲ್ ಘಟನೆಯ ಬಗ್ಗೆ ವಿವರಿಸಿ, "ಮಹಾಸಪ್ತಮಿಯಂದು ಮಳೆ ಬಂದ ಕಾರಣ ಜನರು ಒಮ್ಮೆಲೆ ಆಶ್ರಯ ಪಡೆಯಲು ನುಗ್ಗಿದರು. ಹೊರಹೋಗುವ ದಾರಿ ಮುಚ್ಚಲ್ಪಟ್ಟಿದ್ದರಿಂದ ಜನರು ಒಳಗೆ ಸಿಲುಕಿಕೊಂಡರು. ನಾನು ಹೇಗೋ ಹೊರಬಂದೆ, ಆದರೆ ಸ್ನೇಹಾ ನೂಕುನುಗ್ಗಲಿನಲ್ಲಿ ಸಿಲುಕಿ ಪ್ರಾಣಬಿಟ್ಟಳು" ಎಂದು ಕಣ್ಣೀರು ಹಾಕಿದ್ದಾರೆ.

₹25 ಲಕ್ಷ ಪರಿಹಾರ, ಸರ್ಕಾರಿ ಉದ್ಯೋಗ ಹಾಗೂ ನ್ಯಾಯಾಂಗ ತನಿಖೆ:

 ಮುಖ್ಯಮಂತ್ರಿ ಸುವೇಂದು ಅಧಿಕಾರಿ ಅವರು ಮೃತರ ಕುಟುಂಬಗಳಿಗೆ ತಲಾ ₹25 ಲಕ್ಷ ಪರಿಹಾರ ಹಾಗೂ ಕುಟುಂಬದ ಒಬ್ಬ ಅರ್ಹ ಸದಸ್ಯರಿಗೆ ಗ್ರೂಪ್-ಡಿ ಸರ್ಕಾರಿ ನೌಕರಿ ನೀಡುವುದಾಗಿ ಘೋಷಿಸಿದ್ದಾರೆ. ಜೊತೆಗೆ ಈ ದುರ್ಘಟನೆಯ ಬಗ್ಗೆ ಕೂಲಂಕಷ ತನಿಖೆ ನಡೆಸಲು ಕಲ್ಕತ್ತಾ ಹೈಕೋರ್ಟ್‌ನ ಹಾಲಿ ನ್ಯಾಯಾಧೀಶರ ನೇತೃತ್ವದಲ್ಲಿ ವಿಶೇಷ ತನಿಖಾ ತಂಡವನ್ನು (SIT) ರಚಿಸಿ ತನಿಖೆಗೆ ಆದೇಶಿಸಿದ್ದಾರೆ.