ಲಂಡನ್: ಲಂಡನ್‌ನ ಹೀಥ್ರೂ ವಿಮಾನ ನಿಲ್ದಾಣದಿಂದ ಅಮೆರಿಕದ ಚಿಕಾಗೋಗೆ ಹೊರಟಿದ್ದ ಬ್ರಿಟಿಷ್ ಏರ್‌ವೇಸ್ ವಿಮಾನವೊಂದು ಐರ್ಲೆಂಡ್ ವಾಯುಪ್ರದೇಶದಲ್ಲಿ ಹಾರಾಟ ನಡೆಸುತ್ತಿದ್ದ ವೇಳೆ ತಾಂತ್ರಿಕ ತುರ್ತು ಪರಿಸ್ಥಿತಿಯನ್ನು ಘೋಷಿಸಿದೆ. ವಿಮಾನವು ಆಕಾಶದಲ್ಲಿ ಹಠಾತ್ತನೆ ಬರೋಬ್ಬರಿ 28,000 ಅಡಿಗಳಷ್ಟು ಕೆಳಗೆ ಇಳಿದಿದ್ದು, ಬಳಿಕ ಪ್ರಯಾಣವನ್ನು ರದ್ದುಗೊಳಿಸಿ ಮತ್ತೆ ಲಂಡನ್‌ಗೇ ಮರಳಿದೆ ಎಂದು ಯುಕೆಯ ಮಾಧ್ಯಮಗಳು ವರದಿ ಮಾಡಿವೆ.
ಘಟನೆಯ ವಿವರ:
ಬ್ರಿಟಿಷ್ ಏರ್‌ವೇಸ್‌ಗೆ ಸೇರಿದ 'BA295' ವಿಮಾನವು (ಬೋಯಿಂಗ್ 777-200ER, ನೋಂದಣಿ ಸಂಖ್ಯೆ: G-VIIA) ಸೋಮವಾರ ಸ್ಥಳೀಯ ಕಾಲಮಾನ ಸುಮಾರು 11:50ಕ್ಕೆ ಲಂಡನ್ ಹೀಥ್ರೂ ವಿಮಾನ ನಿಲ್ದಾಣದ ಟರ್ಮಿನಲ್ 5ರಿಂದ ಚಿಕಾಗೋದ ಓ'ಹೇರ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಪ್ರಯಾಣ ಆರಂಭಿಸಿತ್ತು. ಸುಮಾರು 8 ಗಂಟೆ 40 ನಿಮಿಷಗಳ ಈ ನಿಗದಿತ ಪ್ರಯಾಣದಲ್ಲಿ, ಟೇಕ್ ಆಫ್ ಆದ ಸುಮಾರು ಒಂದು ಗಂಟೆಯಲ್ಲೇ ಈ ಆಘಾತಕಾರಿ ಬೆಳವಣಿಗೆ ನಡೆದಿದೆ.
ಫ್ಲೈಟ್ ಟ್ರ್ಯಾಕಿಂಗ್ ದತ್ತಾಂಶಗಳ ಪ್ರಕಾರ, ವಿಮಾನವು ಸುಮಾರು 37,000 ಅಡಿ ಎತ್ತರದಲ್ಲಿ ಹಾರಾಟ ನಡೆಸುತ್ತಿದ್ದಾಗ ಏಕಾಏಕಿ ತೀವ್ರ ವೇಗದಲ್ಲಿ ಕೆಳಮುಖವಾಗಿ ಚಲಿಸಿ, ಸರಿಸುಮಾರು 9,000 ಅಡಿ ಎತ್ತರಕ್ಕೆ ಇಳಿದಿದೆ.
ತುರ್ತು ಕೋಡ್ ರವಾನೆ ಮತ್ತು ವಿಮಾನ ವಾಪಸ್:
ಐರ್ಲೆಂಡ್ ವಾಯುಪ್ರದೇಶದಲ್ಲಿ ಹಾರಾಟ ನಡೆಸುತ್ತಿದ್ದಾಗ ಪೈಲಟ್‌ಗಳು ಅಂತಾರಾಷ್ಟ್ರೀಯ ತುರ್ತು ಸಂಕೇತವಾದ 'ಸ್ಕ್ವಾಕ್ 7700' (Squawk 7700) ಕೋಡ್ ಅನ್ನು ರವಾನಿಸಿದ್ದಾರೆ. ವಿಮಾನವು ಇಷ್ಟು ದೊಡ್ಡ ಪ್ರಮಾಣದಲ್ಲಿ ಕೆಳಗೆ ಇಳಿದ ಬೆನ್ನಲ್ಲೇ, ಚಿಕಾಗೋ ಕಡೆಗೆ ಸಾಗುತ್ತಿದ್ದ ವಿಮಾನದ ಹಾದಿಯನ್ನು ಬದಲಾಯಿಸಿ, ಮರಳಿ ಲಂಡನ್ ಹೀಥ್ರೂ ನಿಲ್ದಾಣದತ್ತ ಮುಖ ಮಾಡಲಾಗಿದೆ ಎಂದು ಫ್ಲೈಟ್ ಟ್ರ್ಯಾಕಿಂಗ್ ವರದಿಗಳು ತಿಳಿಸಿವೆ.
ಈ ದಿಢೀರ್ ಇಳಿಕೆಗೆ ಮತ್ತು ವಿಮಾನ ವಾಪಸ್ ತಿರುಗಲು ನಿಖರ ಕಾರಣವೇನು ಎಂಬುದು ತಕ್ಷಣಕ್ಕೆ ತಿಳಿದುಬಂದಿಲ್ಲ. ಈ ಕುರಿತು ಬ್ರಿಟಿಷ್ ಏರ್‌ವೇಸ್ ಸಂಸ್ಥೆಯೂ ಯಾವುದೇ ಅಧಿಕೃತ ಮಾಹಿತಿ ಅಥವಾ ಸ್ಪಷ್ಟನೆಯನ್ನು ನೀಡಿಲ್ಲ.
ಏನಿದು '7700' ಟ್ರಾನ್ಸ್‌ಪಾಂಡರ್ ಕೋಡ್?
ವಿಮಾನ ಹಾರಾಟದ ವೇಳೆ ಯಾವುದೇ ರೀತಿಯ ಸಾಮಾನ್ಯ ತುರ್ತು ಪರಿಸ್ಥಿತಿ (General Emergency) ಎದುರಾದಾಗ, ಪೈಲಟ್‌ಗಳು ಏರ್ ಟ್ರಾಫಿಕ್ ಕಂಟ್ರೋಲರ್‌‌ಗಳಿಗೆ (ATC) ಎಚ್ಚರಿಕೆ ನೀಡಲು ಬಳಸುವ ಜಾಗತಿಕ ಸಂಕೇತವೇ '7700'.
ಪೈಲಟ್ ವಿಮಾನದ ಟ್ರಾನ್ಸ್‌ಪಾಂಡರ್‌ನಲ್ಲಿ 7700 ಎಂದು ನಮೂದಿಸಿದ ತಕ್ಷಣ, ಅದು ಎಟಿಸಿಯ ರಾಡಾರ್ ಪರದೆಯ ಮೇಲೆ ಪ್ರತ್ಯಕ್ಷವಾಗುತ್ತದೆ. ಇದರಿಂದಾಗಿ ಆ ವಿಮಾನಕ್ಕೆ ರನ್‌ವೇ ಮತ್ತು ಲ್ಯಾಂಡಿಂಗ್‌ನಲ್ಲಿ ಮೊದಲ ಆದ್ಯತೆ ನೀಡಬೇಕೆಂಬ ಸಂದೇಶ ರವಾನೆಯಾಗುತ್ತದೆ. ಆದರೆ, ಇದು ಸಮಸ್ಯೆಯ ನಿಖರ ಸ್ವರೂಪವನ್ನು (ವೈದ್ಯಕೀಯ ತುರ್ತುಸ್ಥಿತಿ, ಯಾಂತ್ರಿಕ ದೋಷ ಅಥವಾ ತೀವ್ರ ಹವಾಮಾನ ವೈಪರೀತ್ಯ) ತಿಳಿಸುವುದಿಲ್ಲ. ಬಳಿಕ ಪೈಲಟ್ ಮತ್ತು ಎಟಿಸಿ ನಡುವಿನ ಸಂಭಾಷಣೆಯ ಮೂಲಕ ಸಮಸ್ಯೆಯ ಸ್ವರೂಪ ತಿಳಿದು ಮುಂದಿನ ಕ್ರಮ ಕೈಗೊಳ್ಳಲಾಗುತ್ತದೆ.
