ಆನ್‌ಲೈನ್ ಇ-ಕಾಮರ್ಸ್ ದೈತ್ಯ ಅಮೆಜಾನ್ ಸಂಸ್ಥೆಯು ಮತ್ತೊಮ್ಮೆ ಉದ್ಯೋಗ ಕಡಿತ ಪ್ರಕ್ರಿಯೆಯನ್ನು ಆರಂಭಿಸಿದ್ದು, ಈ ಬಾರಿ ಸಾವಿರಕ್ಕೂ ಕಡಿಮೆ ಮಂದಿ ಕಾರ್ಪೊರೇಟ್ (ಶ್ವೇತವರ್ಗ) ಉದ್ಯೋಗಿಗಳು ಇದರ ಬಲಿಪಶುವಾಗಿದ್ದಾರೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ.
ಅಮೆಜಾನ್‌ನ ಈ ಹೊಸ ಉದ್ಯೋಗ ಕಡಿತದ ಅಲೆಯಿಂದ ಅಮೆರಿಕ, ಬ್ರಿಟನ್ ಹಾಗೂ ಭಾರತ ಸೇರಿದಂತೆ ವಿವಿಧ ದೇಶಗಳಲ್ಲಿನ ಕಾರ್ಯಾಚರಣೆಗಳ ಮೇಲೆ ಪರಿಣಾಮ ಬೀರಿದೆ ಎಂದು ರಾಯಿಟರ್ಸ್ ವರದಿ ಮಾಡಿದೆ. ಪ್ರಮುಖವಾಗಿ ಭಾರತದಲ್ಲಿ ಅಮೆಜಾನ್‌ನ 'ಪ್ರೈಮ್ ಬಿಗ್ ಡೀಲ್ ಡೇಸ್' ಶಾಪಿಂಗ್ ಉತ್ಸವವು ನಡೆಯುತ್ತಿರುವ ಸಮಯದಲ್ಲೇ ಈ ಆಘಾತಕಾರಿ ಬೆಳವಣಿಗೆಯೂ ಹೊರಬಂದಿದೆ.
ಅಮೆಜಾನ್ ತನ್ನ ಪ್ರಮುಖ ಇ-ಕಾಮರ್ಸ್ ವ್ಯವಹಾರವನ್ನು ನೋಡಿಕೊಳ್ಳುವ 'ಸ್ಟೋರ್ಸ್' ವಿಭಾಗವನ್ನು ಮರುರಚಿಸುವ ಉದ್ದೇಶದಿಂದ ಈ ಕಡಿತಕ್ಕೆ ಮುಂದಾಗಿದೆ. ವಿಶೇಷವಾಗಿ ಗ್ರಾಹಕ ಸೇವೆ (ಕಸ್ಟಮರ್ ಸರ್ವೀಸ್) ಮತ್ತು ಮಾರಾಟಗಾರರ ಪಾಲುದಾರ ಸೇವೆಗಳ ವಿಭಾಗಗಳಲ್ಲಿ ಈ ಉದ್ಯೋಗ ಕಡಿತವನ್ನು ಮಾಡಲಾಗಿದೆ.
ರಾಯಿಟರ್ಸ್ ಪ್ರಕಾರ, ಕೆಲಸ ಕಳೆದುಕೊಂಡ ನೌಕರರಿಗೆ ಈ ಕುರಿತು ಅಧಿಕೃತ ಸಂದೇಶಗಳು ಬಂದಿದ್ದು, ಅವರು ಆಂತರಿಕ ಸ್ಲ್ಯಾಕ್ (Slack) ಚಾನೆಲ್‌ಗಳಲ್ಲಿ ಈ ಮಾಹಿತಿಯನ್ನು ಹಂಚಿಕೊಳ್ಳಲು ಆರಂಭಿಸಿದ್ದಾರೆ. ಕಳೆದ ವರ್ಷದಿಂದ 2026ರ ಜನವರಿಯ ಅವಧಿಯಲ್ಲಿ ಸುಮಾರು 30,000 ಕಾರ್ಪೊರೇಟ್ ಉದ್ಯೋಗಗಳನ್ನು ವಜಾಗೊಳಿಸುವ ಮೂಲಕ ಬೃಹತ್ ಪ್ರಮಾಣದ ಮರುರಚನಾ ಪ್ರಕ್ರಿಯೆಯನ್ನು ನಡೆಸಿದ್ದ ಅಮೆಜಾನ್, ಇದೀಗ ಮತ್ತೊಮ್ಮೆ ಉದ್ಯೋಗಿಗಳಿಗೆ ಕಣ್ಣೀರು ತರಿಸಿದೆ.
