ಮುಂಬೈ: ಅವಧಿ ಮುಗಿದ (Expired) ಹಾಗೂ ಹಾನಿಗೊಳಗಾದ ಆಹಾರ ಪದಾರ್ಥಗಳನ್ನು ನಾಶಪಡಿಸದೆ ಮಾರುಕಟ್ಟೆಗೆ ಮರುಪೂರೈಕೆ ಮಾಡುತ್ತಿದ್ದ ಬೃಹತ್ ಅಕ್ರಮ ಜಾಲವನ್ನು ಮಹಾರಾಷ್ಟ್ರ ಆಹಾರ ಮತ್ತು ಔಷಧ ಆಡಳಿತ (FDA) ಬೇಧಿಸಿದೆ. ಈ ಸಂಬಂಧ ಥಾಣೆ ಮತ್ತು ಪುಣೆ ಜಿಲ್ಲೆಗಳಲ್ಲಿ ನಡೆಸಿದ ಸರಣಿ ದಾಳಿಗಳಲ್ಲಿ ಬರೋಬ್ಬರಿ ₹48 ಲಕ್ಷಕ್ಕೂ ಅಧಿಕ ಮೌಲ್ಯದ ಕಳಪೆ ಆಹಾರ ಪದಾರ್ಥಗಳನ್ನು ಜಪ್ತಿ ಮಾಡಲಾಗಿದ್ದು, ರಿಲಯನ್ಸ್ ಕನ್ಸೂಮರ್ ಪ್ರಾಡಕ್ಟ್ಸ್, ರಿಲಯನ್ಸ್ ರಿಟೇಲ್, ಬ್ಲಿಂಕಿಟ್ ಹಾಗೂ ಜೊಮ್ಯಾಟೊ ಹೈಪರ್‌ಪ್ಯೂರ್ ಸಂಸ್ಥೆಗಳಿಗೆ ಸೇರಿದ ಉನ್ನತ ಅಧಿಕಾರಿಗಳು ಹಾಗೂ ಸಿಬ್ಬಂದಿ ವಿರುದ್ಧ ಎಫ್‌ಐಆರ್ ದಾಖಲಾಗಿದೆ.
ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಕಾಯ್ದೆ 2006 ಹಾಗೂ ಭಾರತೀಯ ನ್ಯಾಯ ಸಂಹಿತೆ (BNS) 2023ರ ವಿವಿಧ ಸೆಕ್ಷನ್‌ಗಳ ಅಡಿಯಲ್ಲಿ ಥಾಣೆಯ ಶಾಂತಿನಗರ ಪೊಲೀಸ್ ಠಾಣೆಯಲ್ಲಿ ಒಟ್ಟು 10 ಮಂದಿಯ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ.
ನಾಶಪಡಿಸಬೇಕಿದ್ದ ಕಳಪೆ ಸರಕು ಮಾರುಕಟ್ಟೆಗೆ ರವಾನೆ
ಎಫ್‌ಡಿಎ ಪ್ರಾಥಮಿಕ ತನಿಖೆಯ ಪ್ರಕಾರ, ಗ್ರಾಹಕರಿಂದ ತಿರಸ್ಕೃತಗೊಂಡ, ದಿನಾಂಕ ಮೀರಿದ ಮತ್ತು ಹಾಳಾಗಿದ್ದ ಉತ್ಪನ್ನಗಳನ್ನು ನಿಯಮಾನುಸಾರ ನಾಶಪಡಿಸಲು ವಿಲೇವಾರಿ ಏಜೆನ್ಸಿಗಳಿಗೆ (Disposal Agencies) ಕಳುಹಿಸಲಾಗುತ್ತಿತ್ತು. ಆದರೆ, ಆ ಏಜೆನ್ಸಿಗಳು ಉತ್ಪನ್ನಗಳನ್ನು ವಾಸ್ತವವಾಗಿ ನಾಶಪಡಿಸದೆ, 'ನಾಶಪಡಿಸಲಾಗಿದೆ' ಎಂದು ನಕಲಿ ಪ್ರಮಾಣಪತ್ರಗಳನ್ನು ನೀಡುತ್ತಿದ್ದವು. ನಂತರ ಈ ಕಳಪೆ ಆಹಾರ ಪದಾರ್ಥಗಳನ್ನು ಪರವಾನಗಿ ಇಲ್ಲದ ಗೋದಾಮುಗಳಿಗೆ ಸಾಗಿಸಿ, ಅಲ್ಲಿ ಪ್ಯಾಕೆಟ್‌ಗಳನ್ನು ವಿಂಗಡಿಸಿ ಸ್ಥಳೀಯ ದಲ್ಲಾಳಿಗಳು ಮತ್ತು ಅಂಗಡಿಗಳಿಗೆ ಕಡಿಮೆ ಬೆಲೆಗೆ ಮಾರಾಟ ಮಾಡಲಾಗುತ್ತಿತ್ತು. ಭಿವಂಡಿಯ ಗುಲ್ಜಾರ್ ನಗರದ ಪರವಾನಗಿ ರಹಿತ ರಿಯಾಯಿತಿ ಮಳಿಗೆಯೊಂದರಲ್ಲಿ (Discount Store) ಇಂತಹ ಅವಧಿ ಮುಗಿದ ಹಾಗೂ ಸೋರಿಕೆಯಾಗುತ್ತಿದ್ದ ಆಹಾರ ಪದಾರ್ಥಗಳನ್ನು ಸಾರ್ವಜನಿಕರಿಗೆ ಮಾರಾಟಕ್ಕಿಟ್ಟಿರುವುದು ತಪಾಸಣೆ ವೇಳೆ ಬಯಲಾಗಿದೆ.
ಪ್ರಮುಖ ಕಂಪನಿಗಳ ಅಧಿಕಾರಿಗಳ ವಿರುದ್ಧ ಎಫ್‌ಐಆರ್
ಪೊಲೀಸರು ದಾಖಲಿಸಿರುವ ಎಫ್‌ಐಆರ್‌ನಲ್ಲಿ ರಿಲಯನ್ಸ್ ಕನ್ಸೂಮರ್ ಪ್ರಾಡಕ್ಟ್ಸ್ ಲಿಮಿಟೆಡ್‌ನ ಪೂರ್ಣಾವಧಿ ನಿರ್ದೇಶಕ ವಿ. ಸುಬ್ರಮಣಿಯನ್, ಅದೇ ಸಂಸ್ಥೆಯ ಅಶೋಕ್ ಕುಮಾರ್ ಸಿಂಗ್, ರಿಲಯನ್ಸ್ ರಿಟೇಲ್ ನಾಮಿನಿ ವಿಜಯ್ ಭಿಕಾಜಿ ಖರ್ಮಲೆ, ವೇರ್‌ಹೌಸ್ ಮ್ಯಾನೇಜರ್ ನೀಲೇಶ್ ರಾಮದಾಸರಾವ್ ದೇಶ್‌ಮುಖ್ ಅವರ ಹೆಸರನ್ನು ಉಲ್ಲೇಖಿಸಲಾಗಿದೆ. ಜೊತೆಗೆ ಬ್ಲಿಂಕಿಟ್ ಕಾಮರ್ಸ್ ನಿರ್ದೇಶಕ ಅರ್ಬಿಂದರ್ ಸಿಂಗ್ ಧಿನ್ಸಾ, ದೀಪಕ್ ಸಿಂಗ್, ಜೊಮ್ಯಾಟೊ ಹೈಪರ್‌ಪ್ಯೂರ್‌ನ ಆಬಿದ್ ಶೇಖ್, ಬಿ.ಕೆ. ಡಿಸ್ಪೋಸ್‌ನ ಬಾಬರ್ ಮಿಯಾ ಅಹ್ಮದ್ ಸಿದ್ದಿಕಿ, ಪೂರೈಕೆದಾರ ಗುಲ್ಜಾರ್ ಅಬ್ದುಲ್ ಖಾನ್ ಮತ್ತು ಅಬ್ದುಲ್ ಮೊಬಿನ್ ಖಾನ್ ವಿರುದ್ಧ ಕಾನೂನು ಕ್ರಮ ಜರುಗಿಸಲಾಗಿದೆ.
₹48 ಲಕ್ಷ ಮೌಲ್ಯದ ದಾಸ್ತಾನು ವಶ, ಪರವಾನಗಿ ಅಮಾನತು
ಅಕ್ಟೋಬರ್ 14 ಮತ್ತು 15 ರಂದು ಎಫ್‌ಡಿಎ ಸಹಾಯಕ ಆಯುಕ್ತರು ಹಾಗೂ ಆಹಾರ ಸುರಕ್ಷತಾ ಅಧಿಕಾರಿಗಳನ್ನೊಳಗೊಂಡ 7 ತಂಡಗಳು ಥಾಣೆ ಮತ್ತು ಪುಣೆಯ ವಿವಿಧೆಡೆ ಜಂಟಿ ಕಾರ್ಯಾಚರಣೆ ನಡೆಸಿದವು. ಭಿವಂಡಿಯ ಅಕ್ರಮ ವಿಲೇವಾರಿ ಯಾರ್ಡ್‌ನಿಂದ ₹24 ಲಕ್ಷಕ್ಕೂ ಅಧಿಕ ಮೌಲ್ಯದ ಸರಕು, ವಾಡ್ಪೆಯ ರಿಲಯನ್ಸ್ ವೇರ್‌ಹೌಸ್‌ನಿಂದ ₹4.92 ಲಕ್ಷ ಹಾಗೂ ಉಸಟನೆಯ ಜೊಮ್ಯಾಟೊ ಹೈಪರ್‌ಪ್ಯೂರ್ ಘಟಕದಿಂದ ಸುಮಾರು ₹7.81 ಲಕ್ಷ ಮೌಲ್ಯದ ದಾಸ್ತಾನು ಸೇರಿದಂತೆ ಒಟ್ಟು ₹48,09,924 ಮೌಲ್ಯದ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಪ್ರಕರಣದ ತನಿಖೆ ಬೆನ್ನಲ್ಲೇ 5 ಸಂಸ್ಥೆಗಳ ಪರವಾನಗಿಯನ್ನು ಅಮಾನತುಗೊಳಿಸಲಾಗಿದ್ದು, 4 ಪರವಾನಗಿ ರಹಿತ ಅಕ್ರಮ ಮಳಿಗೆಗಳ ಕಾರ್ಯಾಚರಣೆಯನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲಾಗಿದೆ.
