ಚಂದಿರನ ಅಕ್ಕಪಕ್ಕ ಹೋಗಿ ಮರಳಿದ ನಾಲ್ವರು ಗಗನಯಾತ್ರಿಗಳು

ಫ್ಲೋರಿಡಾ: ದಶಕಗಳ ನಂತರ ಚಂದ್ರನ ಸಮೀಪಕ್ಕೆ ಪ್ರಯಾಣ ಬೆಳೆಸಿದ್ದ ನಾಲ್ವರು ಗಗನಯಾತ್ರಿಗಳು ತಮ್ಮ 10 ದಿನಗಳ ಐತಿಹಾಸಿಕ ಬಾಹ್ಯಾಕಾಶ ಯಾನವನ್ನು ಮುಗಿಸಿ ಶುಕ್ರವಾರ ಸುರಕ್ಷಿತವಾಗಿ ಭೂಮಿಗೆ ಮರಳಿದ್ದಾರೆ. ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ (NASA) ಹಮ್ಮಿಕೊಂಡಿದ್ದ ‘ಆರ್ಟೆಮಿಸ್ II’ (Artemis II) ಮಿಷನ್‌ನ ಭಾಗವಾಗಿದ್ದ ಈ ಗಗನಯಾತ್ರಿಗಳು ಕ್ಯಾಲಿಫೋರ್ನಿಯಾ ಕರಾವಳಿಯ ಪೆಸಿಫಿಕ್ ಸಾಗರದಲ್ಲಿ ಯಶಸ್ವಿಯಾಗಿ ಇಳಿದಿದ್ದಾರೆ.

ಅಪೋಲೋ 17 ಮಿಷನ್ ನಂತರ ಚಂದ್ರನ ಅಕ್ಕಪಕ್ಕದ ವರೆಗೆ ಹೋದ ಮೊದಲ ಮಾನವ ಸಹಿತ ಮಿಷನ್ ಇದಾಗಿದೆ.
“ಮನೆಗೆ ಸುಸ್ವಾಗತ ರೀಡ್, ವಿಕ್ಟರ್, ಕ್ರಿಸ್ಟಿನಾ ಮತ್ತು ಜೆರೆಮಿ!” ಎಂದು ನಾಸಾ ತನ್ನ ‘X’ (ಟ್ವಿಟರ್) ಖಾತೆಯಲ್ಲಿ ಪೋಸ್ಟ್ ಮಾಡಿದೆ. ಆರ್ಟೆಮಿಸ್ II ನೌಕೆಯು ಪೂರ್ವ ಸಮಯ ರಾತ್ರಿ 8:07ಕ್ಕೆ (ಭಾರತೀಯ ಕಾಲಮಾನ ಶನಿವಾರ ಮುಂಜಾನೆ) ಸಾಗರಕ್ಕೆ ಇಳಿಯಿತು. ನಾಲ್ವರು ಗಗನಯಾತ್ರಿಗಳು ಆರೋಗ್ಯವಾಗಿದ್ದಾರೆ ಎಂದು ಸಂಸ್ಥೆ ತಿಳಿಸಿದೆ. ನೌಕೆಯಿಂದ ಇವರನ್ನು ಹೊರತೆಗೆಯಲು ನಾಸಾ ಮತ್ತು ಅಮೆರಿಕ ಮಿಲಿಟರಿ ಜಂಟಿ ಕಾರ್ಯಾಚರಣೆ ನಡೆಸಿದ್ದು, ಸ್ಯಾನ್ ಡಿಯಾಗೋ ಬಳಿಯಿರುವ ಹಡಗಿಗೆ ಇವರನ್ನು ಕರೆದೊಯ್ಯಲಾಗಿದೆ.

ಶಬ್ದಕ್ಕಿಂತ 33 ಪಟ್ಟು ವೇಗದಲ್ಲಿ ಪ್ರವೇಶ
ವಾತಾವರಣವನ್ನು ಪ್ರವೇಶಿಸುವಾಗ ನೌಕೆಯು ಶಬ್ದದ ವೇಗಕ್ಕಿಂತ 33 ಪಟ್ಟು ಹೆಚ್ಚು ವೇಗವನ್ನು (ಮ್ಯಾಕ್ 33) ತಲುಪಿತ್ತು ಎಂದು ನಾಸಾ ತಿಳಿಸಿದೆ. ಸ್ವಯಂಚಾಲಿತ ಪೈಲಟ್ ವ್ಯವಸ್ಥೆಯ ಮೂಲಕ ‘ಇಂಟೆಗ್ರಿಟಿ’ ಎಂದು ಹೆಸರಿಸಲಾದ ಓರಿಯನ್ ಕ್ಯಾಪ್ಸುಲ್ ಸಾಗರಕ್ಕೆ ಧುಮುಕಿತು. ಇದನ್ನು “ಪರಿಪೂರ್ಣ ಲ್ಯಾಂಡಿಂಗ್” ಎಂದು ನಾಸಾ ಅಧಿಕಾರಿ ರಾಬ್ ನಾವಿಯಾಸ್ ಬಣ್ಣಿಸಿದ್ದಾರೆ.

ಮಿಷನ್‌ನ ಪ್ರಮುಖ ಸಾಧನೆಗಳು:
ಈ ಮಿಷನ್ ಏಪ್ರಿಲ್ 1 ರಂದು ಫ್ಲೋರಿಡಾದಿಂದ ಉಡಾವಣೆಯಾಗಿತ್ತು. ಮುಂದಿನ ದಿನಗಳಲ್ಲಿ ಚಂದ್ರನ ಮೇಲೆ ಶಾಶ್ವತ ನೆಲೆ ನಿರ್ಮಿಸಲು ಇದು ಮೊದಲ ಮೆಟ್ಟಿಲು ಎಂದು ಹೇಳಲಾಗಿದೆ.
ಭೂಮಿಯಿಂದ ಸುಮಾರು 2,52,756 ಮೈಲಿ (4,06,771 ಕಿ.ಮೀ) ದೂರ ಪ್ರಯಾಣಿಸುವ ಮೂಲಕ, ಈ ಗಗನಯಾತ್ರಿಗಳು ಭೂಮಿಯಿಂದ ಅತಿ ಹೆಚ್ಚು ದೂರ ಪ್ರಯಾಣಿಸಿದ ಮಾನವರು ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಬಾಹ್ಯಾಕಾಶ ಯಾನದ ಸಮಯದಲ್ಲಿ ಗಗನಯಾತ್ರಿಗಳು ಸೂರ್ಯಗ್ರಹಣ ಮತ್ತು ಚಂದ್ರನ ಮೇಲೆ ಉಲ್ಕಾಪಾತ ಸಂಭವಿಸುವ ಸಾವಿರಾರು ಅದ್ಭುತ ಚಿತ್ರಗಳನ್ನು ಸೆರೆಹಿಡಿದಿದೆ.

ಈ ಮಿಷನ್ ಕೇವಲ ವಿಜ್ಞಾನಕ್ಕಷ್ಟೇ ಅಲ್ಲದೆ, ಸಾಮಾಜಿಕವಾಗಿಯೂ ಮಹತ್ವ ಪಡೆದಿದೆ. ವಿಕ್ಟರ್ ಗ್ಲೋವರ್ ಅವರು ಚಂದ್ರನ ಸುತ್ತ ಹಾರಾಟ ನಡೆಸಿದ ಮೊದಲ ಅಶ್ವೇತವರ್ಣೀಯ ವ್ಯಕ್ತಿಯಾದರೆ, ಕ್ರಿಸ್ಟಿನಾ ಕೋಚ್ ಅವರು ಈ ಸಾಧನೆ ಮಾಡಿದ ಮೊದಲ ಮಹಿಳೆ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಹಾಗೂ ಜೆರೆಮಿ ಹ್ಯಾನ್ಸೆನ್ ಅವರು ಈ ಸಾಧನೆ ಮಾಡಿದ ಅಮೆರಿಕನ್ನರಲ್ಲದ (ಕೆನಡಾ ಮೂಲದ) ಮೊದಲ ವ್ಯಕ್ತಿಯಾಗಿದ್ದಾರೆ.
ಆರ್ಟೆಮಿಸ್ ಯೋಜನೆಯ ಮುಂದಿನ ಹಂತದಲ್ಲಿ ಮಾನವರನ್ನು ಚಂದ್ರನ ಮೇಲೆ ಇಳಿಸುವ ಗುರಿಯನ್ನು ನಾಸಾ ಹೊಂದಿದೆ.