ಬೆಂಗಳೂರು: ರಾಜ್ಯ ಸರ್ಕಾರದ ಮಹತ್ವಾಕಾಂಕ್ಷೆಯ ‘ಗೃಹಜ್ಯೋತಿ’ ಯೋಜನೆಯಡಿ ವಿದ್ಯುತ್ ಸಂಪರ್ಕಗಳ (ಮೀಟರ್ ಸ್ಥಾವರಗಳ) ಹೆಚ್ಚುವರಿ ಮಾಹಿತಿ ಸಂಗ್ರಹಿಸಿ ‘ಸೇವಾಸಿಂಧು’ ತಂತ್ರಾಂಶದಲ್ಲಿ ದಾಖಲಿಸುವ (ಇಂಧೀಕರಿಸುವ) ಪ್ರಕ್ರಿಯೆಯ ಗಡುವನ್ನು ರಾಜ್ಯ ಸರ್ಕಾರ ಅಕ್ಟೋಬರ್ 31, 2026ರವರೆಗೆ ವಿಸ್ತರಿಸಿ ಅಧಿಕೃತ ಆದೇಶ ಹೊರಡಿಸಿದೆ.
ಅರ್ಹ ಮತ್ತು ಜೀವಂತ ಫಲಾನುಭವಿಗಳ ದೃಢೀಕರಣಕ್ಕೆ ಕ್ರಮ
ಗೃಹಜ್ಯೋತಿ ಯೋಜನೆಯ ಸೌಲಭ್ಯವು ಕೇವಲ ಜೀವಂತ ಮತ್ತು ಅರ್ಹ ಫಲಾನುಭವಿಗಳಿಗೆ ಮಾತ್ರ ತಲುಪುತ್ತಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಸರ್ಕಾರ ಈ ಕ್ರಮಕ್ಕೆ ಮುಂದಾಗಿದೆ. ಫಲಾನುಭವಿಗಳು ಮೃತಪಟ್ಟಿರುವ ಪ್ರಕರಣಗಳು, ಮನೆ ಬದಲಾವಣೆ, ಮನೆ ಖರೀದಿ ಅಥವಾ ಮಾರಾಟದ ಸಂದರ್ಭಗಳಲ್ಲಿ ವಿವರಗಳು ಸಕಾಲದಲ್ಲಿ ಪರಿಷ್ಕರಣೆಯಾಗದಿರುವುದು ಸರ್ಕಾರದ ಗಮನಕ್ಕೆ ಬಂದಿತ್ತು. ಈ ಹಿನ್ನೆಲೆಯಲ್ಲಿ ಮುಖ್ಯಮಂತ್ರಿಯವರ ಅಧ್ಯಕ್ಷತೆಯಲ್ಲಿ ನಡೆದ ಉನ್ನತ ಮಟ್ಟದ ಸಭೆಯ ಸೂಚನೆಯಂತೆ, ವಿದ್ಯುತ್ ಸರಬರಾಜು ಕಂಪನಿಗಳ (ಎಸ್ಕಾಮ್ಸ್) ಸಿಬ್ಬಂದಿ ಹಾಗೂ ಮೀಟರ್ ರೀಡರ್‌ಗಳು ನೇರವಾಗಿ ಮನೆಗಳಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸುತ್ತಿದ್ದಾರೆ.
ಸಿಬ್ಬಂದಿ ಸಂಗ್ರಹಿಸುತ್ತಿರುವ ಪ್ರಮುಖ ವಿವರಗಳು
ಮನೆಗಳಿಗೆ ಭೇಟಿ ನೀಡುವ ಸಿಬ್ಬಂದಿಯು ಮಾಲೀಕರು ಅಥವಾ ಬಾಡಿಗೆದಾರರಿಂದ ಈ ಕೆಳಗಿನ ಪ್ರಮುಖ ದಾಖಲೆ ಹಾಗೂ ಮಾಹಿತಿಗಳನ್ನು ಸಂಗ್ರಹಿಸಿ ಸೇವಾಸಿಂಧು ತಂತ್ರಾಂಶಕ್ಕೆ ಅಪ್‌ಲೋಡ್ ಮಾಡುತ್ತಿದ್ದಾರೆ:
-
ಪಡಿತರ ಚೀಟಿ (ರೇಷನ್ ಕಾರ್ಡ್) ವಿವರಗಳು
-
ಕರ್ನಾಟಕ ರಾಜ್ಯದ ಮತದಾರರ ಗುರುತಿನ ಚೀಟಿ (EPIC ಸಂಖ್ಯೆ)
-
ಅರ್ಜಿದಾರರ ಇತ್ತೀಚಿನ ಭಾವಚಿತ್ರ
-
ಅರ್ಜಿದಾರರ ಜಾತಿ/ಪ್ರವರ್ಗ ಹಾಗೂ ವೃತ್ತಿಯ ವಿವರ
-
ಆದಾಯ ತೆರಿಗೆ ಪಾವತಿಯ ಸ್ಥಿತಿಗತಿ ವಿವರ
ಅವಧಿ ವಿಸ್ತರಣೆಗೆ ಕಾರಣವೇನು?
ಜುಲೈ 1, 2026 ರಿಂದಲೇ ಈ ಪ್ರಕ್ರಿಯೆಯನ್ನು ಆರಂಭಿಸಲಾಗಿದ್ದು, ಈ ಹಿಂದೆ ಎರಡು ಬಾರಿ ಕಾಲಾವಕಾಶ ನೀಡಲಾಗಿತ್ತು. ಆದರೆ, ಮನೆಗಳಿಗೆ ಬೀಗ ಹಾಕಿರುವುದು (Door Locked/Vacant), ತಾಂತ್ರಿಕ ಕಾರಣಗಳಿಂದ 'ಡೇಟಾ ನಾಟ್ ಫೌಂಡ್' ಸಮಸ್ಯೆ, ಮಾಹಿತಿ ನೀಡಲು ಕೆಲವರು ನಿರಾಕರಿಸಿದ ಪ್ರಕರಣಗಳು, ಖಾಲಿ ಇರುವ ಮನೆಗಳು, ಶಾಶ್ವತವಾಗಿ ವಿದ್ಯುತ್ ಕಡಿತಗೊಂಡಿರುವ ಸ್ಥಾವರಗಳು ಹಾಗೂ ಸೌರಶಕ್ತಿ ಮೇಲ್ಛಾವಣಿ ಹೊಂದಿರುವ ವಿಶೇಷ ಪ್ರಕರಣಗಳ ಸ್ಥಳ ಪರಿಶೀಲನೆ ಬಾಕಿ ಉಳಿದಿತ್ತು. ಹೀಗಾಗಿ ಪರಿಶೀಲನೆಯನ್ನು ಪೂರ್ಣಗೊಳಿಸಲು ಬೆಸ್ಕಾಂ, ಮೆಸ್ಕಾಂ, ಹೆಸ್ಕಾಂ, ಜೆಸ್ಕಾಂ, ಸೆಸ್ಕ್ ಹಾಗೂ ಹುಕ್ಕೇರಿ ಸೊಸೈಟಿಗಳು ಹೆಚ್ಚುವರಿ ಸಮಯ ಕೋರಿದ್ದವು.
ಅಕ್ಟೋಬರ್ 31ರೊಳಗೆ ಪ್ರಕ್ರಿಯೆ ಪೂರ್ಣಕ್ಕೆ ಆದೇಶ
ವಿದ್ಯುತ್ ಸರಬರಾಜು ಕಂಪನಿಗಳ ಮನವಿಯನ್ನು ಪುರಸ್ಕರಿಸಿರುವ ಇಂಧನ ಇಲಾಖೆಯು, ಈಗಾಗಲೇ ನೀಡಲಾಗಿದ್ದ ಮೂರು ತಿಂಗಳ ಅವಧಿಯ ಜತೆಗೆ ಮತ್ತೊಂದು ತಿಂಗಳು (ದಿನಾಂಕ 31.10.2026 ರವರೆಗೆ) ವಿಸ್ತರಿಸಿ ಅಂತಿಮ ಆದೇಶ ನೀಡಿದೆ. ಈ ನಿಗದಿತ ಅವಧಿಯೊಳಗೆ ಎಲ್ಲಾ ಬಾಕಿ ಉಳಿದಿರುವ ಸ್ಥಾವರಗಳ ವಿವರಗಳನ್ನು ಸೇವಾಸಿಂಧು ತಂತ್ರಾಂಶದಲ್ಲಿ ನಮೂದಿಸುವಂತೆ ಇಲಾಖೆಯ ಅಧೀನ ಕಾರ್ಯದರ್ಶಿಗಳು ಆದೇಶದಲ್ಲಿ ಸ್ಪಷ್ಟಪಡಿಸಿದ್ದಾರೆ.
ವರದಿ: ವಸಂತ ಬಿ ಈಶ್ವರಗೆರೆ, ಸಂಪಾದಕರು..
