ಹಂಪಿ ಉತ್ಸವದಲ್ಲಿ ಮೆಚ್ಚುಗೆ ಪಡೆದ ‘ಕೃಷ್ಣನ ಶಯನ ಗೃಹ’ ನಾಟಕ

ಬಳ್ಳಾರಿ, ಫೆ.15 – ಹಂಪಿ ಉತ್ಸವದ ಅಂಗವಾಗಿ ವಿದ್ಯಾರಣ್ಯ ವೇದಿಕೆಯಲ್ಲಿ ಪ್ರದರ್ಶಿಸಲಾದ ‘ಶ್ರೀ ಕೃಷ್ಣನ ಶಯನ ಗೃಹ’ ನಾಟಕ ಪ್ರೇಕ್ಷಕರ ಮನಸೂರೆಗೊಂಡಿತು. ನಗರದ ಡಾ. ಗಾದಿಲಿಂಗನ ಗೌಡ ಅವರ ತಂಡ ಮನೋಜ್ಞವಾಗಿ ನಾಟಕವನ್ನು ಪ್ರದರ್ಶಿಸಿ ಕಲಾರಸಿಕರಿಂದ ಭರ್ಜರಿ ಮೆಚ್ಚುಗೆ ಪಡೆದರು.

ನಾಟಕದಲ್ಲಿ ಗಾದಿಲಿಂಗನ ಗೌಡ ಅವರು ಶ್ರೀಕೃಷ್ಣನ ಪಾತ್ರದಲ್ಲಿ ಅಭಿನಯಿಸಿದರೆ, ಟಿ. ನಾಗಭೂಷಣ್ ಅರ್ಜುನನಾಗಿ, ವಿ. ರಾಮಚಂದ್ರ ದುರ್ಯೋಧನನಾಗಿ ಹಾಗೂ ನಾಗರಾಜ್ ಸಾತ್ಯಕಿ ಪಾತ್ರದಲ್ಲಿ ಕಾಣಿಸಿಕೊಂಡು ತಮ್ಮ ಅಭಿನಯ ಕೌಶಲ್ಯದಿಂದ ಗಮನ ಸೆಳೆದರು. ವೀರಪುರದ ರಂಗಾರೆಡ್ಡಿ ಸಂಗೀತ ವಾದ್ಯಗಳ ಸಾಥ್ ನೀಡಿದ್ದು, ನಾಟಕಕ್ಕೆ ವಿಶೇಷ ಮೆರಗು ತಂದಿತು.

ಪ್ರದರ್ಶನದ ಬಳಿಕ ಅಧಿಕಾರಿಗಳು ಕಲಾವಿದರಿಗೆ ನೆನಪಿನ ಕಾಣಿಕೆ ನೀಡಿ ಗೌರವಿಸಿದರು. ಕಾರ್ಯಕ್ರಮದಲ್ಲಿ ಬಿ.ಎಂ. ಪಾಟೀಲ್, ಶರವಣ, ಸಹನ ಸೇರಿದಂತೆ ಹಲವು ಗಣ್ಯರು ಉಪಸ್ಥಿತರಿದ್ದರು. ಹಂಪಿ ಉತ್ಸವದ ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ಈ ನಾಟಕ ಪ್ರಮುಖ ಆಕರ್ಷಣೆಯಾಗಿ ಹೊರಹೊಮ್ಮಿತು.