ತಮ್ಮ ಶಿಶು ಪೋಷಣೆ ಉತ್ಪನ್ನವಾದ 'ಲ್ಯಾಕ್ಟೋಜೆನ್ ಪ್ರೋ 1' (Lactogen Pro 1) ಬ್ರ್ಯಾಂಡ್‌ನ ಲೇಬಲ್ ಮೇಲಿನ ಹೇಳಿಕೆಗೆ ಸಂಬಂಧಿಸಿದಂತೆ ನೆಸ್ಲೆ ಇಂಡಿಯಾ (Nestle India) ಸಂಸ್ಥೆಯು ಭಾರತೀಯ ಆಹಾರ ಸುರಕ್ಷತೆ ಮತ್ತು ಮಾನದಂಡಗಳ ಪ್ರಾಧಿಕಾರಕ್ಕೆ (FSSAI) ವಿವರವಾದ ಸ್ಪಷ್ಟನೆ ಹಾಗೂ ಉತ್ತರವನ್ನು ನೀಡಿದೆ. ಈ ಉತ್ಪನ್ನದಲ್ಲಿ ಬಳಸಲಾಗಿರುವ ವೇ ಪ್ರೋಟೀನ್ (Whey protein) ಸುಲಭವಾಗಿ ಜೀರ್ಣವಾಗುತ್ತದೆ ಎಂಬ ಹಕ್ಕುಪ್ರತಿಪಾದನೆಗೆ ಸೂಕ್ತ ವೈಜ್ಞಾನಿಕ ಸಾಕ್ಷ್ಯಾಧಾರಗಳನ್ನು ಒದಗಿಸುವಂತೆ ಎಫ್‌ಎಸ್‌ಎಸ್‌ಎಐ ನೆಸ್ಲೆ ಸಂಸ್ಥೆಗೆ ಸೂಚಿಸಿತ್ತು. ಈ ಕುರಿತು ಪ್ರತಿಕ್ರಿಯಿಸಿರುವ ನೆಸ್ಲೆ ಇಂಡಿಯಾದ ವಕ್ತಾರರು, ಉತ್ಪನ್ನದ ಲೇಬಲ್‌ಗಳಿಗೆ ಸಂಬಂಧಿಸಿದಂತೆ ಸೆಪ್ಟೆಂಬರ್ 18 ರಂದು ಪ್ರಾಧಿಕಾರ ಎತ್ತಿದ್ದ ಪ್ರಶ್ನೆಗಳಿಗೆ ಈಗಾಗಲೇ ವಿವರವಾದ ವಿವರಣೆಯನ್ನು ಸಲ್ಲಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಶಿಶು ಪೋಷಣಾ ಉತ್ಪನ್ನಗಳಲ್ಲಿ ಮಾಡಲಾಗುವ ಹಕ್ಕುಪ್ರತಿಪಾದನೆಗಳು ಮತ್ತು ದಾರಿತಪ್ಪಿಸುವ ಜಾಹೀರಾತುಗಳ ವಿರುದ್ಧ ಎಫ್‌ಎಸ್‌ಎಸ್‌ಎಐ ತನ್ನ ತನಿಖೆಯನ್ನು ತೀವ್ರಗೊಳಿಸಿದೆ. 'ಲ್ಯಾಕ್ಟೋಜೆನ್ ಪ್ರೋ 1' ಮತ್ತು 'ನ್ಯಾನ್ ಎಕ್ಸೆಲ್ಲಾ ಪ್ರೋ ಸ್ಟೇಜ್ 1' (NAN Excella Pro Stage 1) ಉತ್ಪನ್ನಗಳ ಪ್ಯಾಕೇಜಿಂಗ್ ಹಾಗೂ ಪ್ರಚಾರ ಸಾಮಗ್ರಿಗಳಲ್ಲಿ "ವೇ ಪ್ರೋಟೀನ್ ಸುಲಭವಾಗಿ ಜೀರ್ಣವಾಗುತ್ತದೆ" ಮತ್ತು "ರೋನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ನೆರವಾಗುತ್ತದೆ" ಎಂಬ ಹೇಳಿಕೆಗಳನ್ನು ಬಳಸಲಾಗಿತ್ತು. ಇಂತಹ ಹೇಳಿಕೆಗಳು ರೋಗ ತಡೆಗಟ್ಟುವಿಕೆ ಅಥವಾ ನಿರ್ದಿಷ್ಟ ಶಾರೀರಿಕ ಸುಧಾರಣೆಯನ್ನು ಸೂಚಿಸುವುದರಿಂದ, ಇವು 1992ರ ಶಿಶು ಹಾಲಿನ ಪರ್ಯಾಯ ಕಾಯ್ದೆ ಮತ್ತು 2020ರ ಆಹಾರ ಸುರಕ್ಷತೆ ಹಾಗೂ ಮಾನದಂಡಗಳ ನಿಯಮಾವಳಿಗಳನ್ನು ಉಲ್ಲಂಘಿಸುವ ಸಾಧ್ಯತೆಯಿದೆ ಎಂದು ಪ್ರಾಧಿಕಾರ ಕಳವಳ ವ್ಯಕ್ತಪಡಿಸಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಶಿಶು ಹಾಲಿನ ಪರ್ಯಾಯ ಉತ್ಪನ್ನಗಳು ಸಮತೋಲಿತ ಪೋಷಕಾಂಶ, ಬಲವಾದ ರೋಗನಿರೋಧಕ ಶಕ್ತಿ ಮತ್ತು ಮೆದುಳಿನ ಬೆಳವಣಿಗೆಗೆ ನೆರವಾಗುತ್ತವೆ ಎಂದು ಪ್ರಚಾರ ಮಾಡುವುದನ್ನು ಪ್ರಾಧಿಕಾರ ಗಂಭೀರವಾಗಿ ಪರಿಗಣಿಸಿದೆ. ಕಂಪನಿಗಳು ನೀಡಿರುವ ಸ್ಪಷ್ಟನೆಗಳು ಮತ್ತು ಸಲ್ಲಿಸಿರುವ ವೈಜ್ಞಾನಿಕ ದಾಖಲೆಗಳನ್ನು ಪರಿಶೀಲಿಸಿದ ನಂತರ ಮುಂದಿನ ಕಠಿಣ ಕ್ರಮ ಕೈಗೊಳ್ಳಬೇಕೇ ಎಂಬುದನ್ನು ಎಫ್‌ಎಸ್‌ಎಸ್‌ಎಐ ತೀರ್ಮಾನಿಸಲಿದೆ.
