ಶಿವಮೊಗ್ಗ: ಮುಂಜಾನೇ ಆಹಾರ ಅರಸುತ್ತಾ ರಸ್ತೆಗೆ ಬಂದಿದ್ದಂತ ಕಾಡುಕೋಣಕ್ಕೆ ವಾಹನವೊಂದು ಡಿಕ್ಕಿಯಾಗಿದೆ. ಈ ಪರಿಣಾಮ ಕಾಡುಕೋಣದ ಕಾಲು ಮುರಿದು ಏಳಲು ಸಾಧ್ಯವಾಗದೇ ಕಾಸ್ಪಾಡಿಯ ಏರಿಯ ಬಳಿಯಲ್ಲಿ ಒದ್ದಾಡುತ್ತಿತ್ತು. ಈ ವಿಷಯ ಅರಣ್ಯ ಇಲಾಖೆಗೆ ತಿಳಿಸಿದರೂ ಸಕಾಲದಲ್ಲಿ ವೈದ್ಯರಿಂದ ಚಿಕಿತ್ಸೆ ದೊರೆಯದ ಪರಿಣಾಮ, ನರಳಿ ನರಳಿ ಸ್ಥಳದಲ್ಲೇ ಪ್ರಾಣಬಿಟ್ಟಿರುವಂತ ಘಟನೆ ಚೋರಡಿ ಅರಣ್ಯ ವ್ಯಾಪ್ತಿಯಲ್ಲಿ ನಡೆದಿದೆ.
ಶಿವಮೊಗ್ಗ ಜಿಲ್ಲೆಯ ಆನಂದಪುರದ ಚೋರಡಿ ವಲಯ ಅರಣ್ಯ ವ್ಯಾಪ್ತಿಯ ಕಾಸ್ಪಾಡಿ ಬಳಿಯಲ್ಲಿ ಕಾಡುಕೋಣವೊಂದಕ್ಕೆ ಮುಂಜಾನೆ ವಾಹನವೊಂದು ಡಿಕ್ಕಿಯಾಗಿದೆ. ಇದರಿಂದಾಗಿ ಕಾಡುಕೋಣದ ಕಾಲು ಮುರಿದಿವೆ. ಮುಂಜಾನೆ ನಡೆದಂತ ಈ ಘಟನೆಯಿಂದ ನಡೆದಾಡೋದಕ್ಕೂ ಸಾಧ್ಯವಾಗಿಲ್ಲ. ಸ್ಥಳೀಯರು ಕಾಡುಕೋಣದ ಸ್ಥಿತಿಯನ್ನು ಕಂಡು ಅರಣ್ಯ ಇಲಾಖೆಯವರಿಗೆ ಮಾಹಿತಿ ನೀಡಿದ್ದಾರೆ.
ಸ್ಥಳಕ್ಕೆ ಅರಣ್ಯಾಧಿಕಾರಿಗಳು ಭೇಟಿ, ಪರಿಶೀಲನೆ
ಕೂಡಲೇ ಚೋರಡಿ ವಲಯ ಅರಣ್ಯಾಧಿಕಾರಿಗಳು, ಡಿಆರ್ ಎಫ್ ಓ ಸೇರಿದಂತೆ ಇತರೆ ಸಿಬ್ಬಂದಿ ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿದ್ದಾರೆ. ಅಪರಿಚಿತ ವಾಹನ ಡಿಕ್ಕಿಯಿಂದ ಗಾಯಗೊಂಡಿದ್ದಂತ ಕಾಡುಕೋಣವನ್ನು ಆರೈಕೆ ಮಾಡಿದ್ದಾರೆ. ಜೊತೆಗೆ ತುರ್ತು ಚಿಕಿತ್ಸೆಯ ಅವಶ್ಯಕತೆ ಇದ್ದದ್ದನ್ನು ಮನಗಂಡು ಪಶುವೈದ್ಯರಿಗೆ ಮಾಹಿತಿ ನೀಡಿದ್ದಾರೆ.
ಪ್ರಾಣ ಬಿಡುವವರೆಗೂ ಸ್ಥಳಕ್ಕೆ ಬಾರದ ಪಶು ವೈದ್ಯ
ಅರಣ್ಯ ಇಲಾಖೆಯಿಂದ ಮುಂಜಾನೆ ಕಾಡು ಕೋಣಕ್ಕೆ ವಾಹನ ಡಿಕ್ಕಿಯಾಗಿ ಕಾಲು ಮುರಿತಕ್ಕೆ ಒಳಗಾದಂತ ಮಾಹಿತಿಯನ್ನು ಸಂಬಂಧ ಪಟ್ಟ ಪಶು ವೈದ್ಯರಿಗೆ ಮಾಹಿತಿ ನೀಡಿದ್ದಾರೆ. ಸಂಜೆಯವರೆಗೂ ಕಾದರೂ ಸ್ಥಳಕ್ಕೆ ಸಕಾಲಕ್ಕೆ ಪಶುವೈದ್ಯರು ಬಾರದ ಪರಿಣಾಮ ಕಾಡುಕೋಣ ನರಳಿ ನರಳಿ, ತೀವ್ರ ರಕ್ತಸ್ರಾವದಿಂದ ಸ್ಥಳದಲ್ಲೇ ಪ್ರಾಣಬಿಟ್ಟಿರುವುದಾಗಿ ಸಾರ್ವಜನಿಕರು ಆರೋಪಿಸಿದ್ದಾರೆ.
ಒಂದು ವೇಳೆ ಪಶು ವೈದ್ಯರು ಅರಣ್ಯ ಇಲಾಖೆಯಿಂದ ಮಾಹಿತಿ ನೀಡಿದ ತಕ್ಷಣ ಕಾಸ್ವಾಡಿಯ ಏರಿಯ ಮೇಲೆ ನರಳುತ್ತಿದ್ದ ಕಾಡು ಕೋಣದ ಬಳಿಗೆ ಆಗಮಿಸಿ, ಚಿಕಿತ್ಸೆ ನೀಡಿದ್ದರೇ, ಸಾವನ್ನಪ್ಪುತ್ತಿರಲಿಲ್ಲ. ಕಾಡುಕೋಣ ಸಾವಿಗೆ ಪಶು ವೈದ್ಯರ ನಿರ್ಲಕ್ಷ್ಯವೇ ಕಾರಣವಾಗಿದೆ. ಅವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳುವಂತೆ ಸ್ಥಳೀಯರು ಆಗ್ರಹಿಸಿದ್ದಾರೆ.
ವರದಿ: ವಸಂತ ಬಿ ಈಶ್ವರಗೆರೆ
