ಮುಂಬೈ, 2026 ಅಕ್ಟೋಬರ್ 17: ಐದು ಬಾರಿಯ ಐಪಿಎಲ್ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ತಂಡದ ಮುಖ್ಯ ಕೋಚ್ ಹುದ್ದೆಯಿಂದ ಮಹೇಲಾ ಜಯವರ್ಧನೆ ಅವರು ಕೆಳಗಿಳಿದಿದ್ದಾರೆ. ಇದರೊಂದಿಗೆ ಎಂಐ ಕುಟುಂಬದೊಂದಿಗಿನ (#OneFamily) ಅವರ ಒಂದು ದಶಕದ ಸುದೀರ್ಘ ಒಡನಾಟಕ್ಕೆ ತೆರೆ ಬಿದ್ದಿದೆ ಎಂದು ಮುಂಬೈ ಇಂಡಿಯನ್ಸ್ ಶನಿವಾರ ಘೋಷಿಸಿದೆ.
ಮುಂಬೈ ಇಂಡಿಯನ್ಸ್‌ಗೆ ಮಹೇಲಾ ಕೇವಲ ಮುಖ್ಯ ಕೋಚ್ ಆಗಿರಲಿಲ್ಲ, ಅದಕ್ಕೂ ಮಿಗಿಲಾದ ಪಾತ್ರವನ್ನು ವಹಿಸಿದ್ದರು. ಅವರ ಮಾರ್ಗದರ್ಶನದಲ್ಲಿ ಮುಂಬೈ ಇಂಡಿಯನ್ಸ್ ಮೂರು ಐಪಿಎಲ್ (IPL) ಪ್ರಶಸ್ತಿಗಳನ್ನು ಗೆದ್ದುಕೊಂಡಿತ್ತು. 2017ರಿಂದ 2022ರವರೆಗೆ ಮತ್ತು ನಂತರ 2024ರಿಂದ 2026ರವರೆಗೆ - ಹೀಗೆ ಎರಡು ಅವಧಿಯಲ್ಲಿ ತಂಡದ ಮುಖ್ಯ ಕೋಚ್ ಆಗಿ ಕಾರ್ಯನಿರ್ವಹಿಸಿದ ಅವರು, ಫ್ರಾಂಚೈಸಿಯ ಬಲಿಷ್ಠ ಕ್ರೀಡಾ ಸಂಸ್ಕೃತಿಯನ್ನು ರೂಪಿಸುವಲ್ಲಿ, ಬಲವಾದ ತಂಡದ ವಾತಾವರಣವನ್ನು ಬೆಳೆಸುವಲ್ಲಿ ಹಾಗೂ ಶಿಸ್ತು, ಸಹಯೋಗ ಮತ್ತು 'ತಂಡವೇ ಮೊದಲು ಎಂಬ ಮೌಲ್ಯಗಳನ್ನು ಎತ್ತಿಹಿಡಿಯುವಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದರು.
"ಮುಂಬೈ ಇಂಡಿಯನ್ಸ್‌ಗೆ ಮಹೇಲಾ ಕಳೆದ ಹಲವು ವರ್ಷಗಳಿಂದ ಅಪಾರ ಕೊಡುಗೆ ನೀಡಿದ್ದಾರೆ. ಅವರ ಶಾಂತ ನಾಯಕತ್ವ, ಪ್ರಾಮಾಣಿಕತೆ ಮತ್ತು ಆಟದ ಮೇಲಿನ ಗಾಢ ಪ್ರೀತಿ ನಮಗೆ ಅತ್ಯಂತ ಮೌಲ್ಯಯುತವಾಗಿವೆ. ಇಡೀ 'ಎಂಐ ಕುಟುಂಬ'ದ (MI family) ಪರವಾಗಿ, ಮಹೇಲಾ ಅವರ ಅಪಾರ ಕೊಡುಗೆ ಮತ್ತು ದೃಢವಾದ ಬದ್ಧತೆಗಾಗಿ ನಾನು ಅವರಿಗೆ ಧನ್ಯವಾದ ಅರ್ಪಿಸುತ್ತೇನೆ. ನಾವು ಒಟ್ಟಾಗಿ ಸಾಗಿದ ಈ ಪಯಣ ಮತ್ತು ಸೃಷ್ಟಿಸಿದ ನೆನಪುಗಳನ್ನು ಸದಾ ಸ್ಮರಿಸಿಕೊಳ್ಳುತ್ತೇವೆ. ಮಹೇಲಾ ಯಾವಾಗಲೂ ನಮ್ಮ ಕುಟುಂಬದ (#OneFamily) ಭಾಗವಾಗಿಯೇ ಇರುತ್ತಾರೆ. ಅವರ ಮುಂದಿನ ಜೀವನವು ಸಂತೋಷ ಮತ್ತು ಯಶಸ್ಸಿನಿಂದ ಕೂಡಿರಲಿ ಎಂದು ಹಾರೈಸುತ್ತೇವೆ" ಎಂದು ಶ್ರೀಮತಿ ನೀತಾ ಎಂ. ಅಂಬಾನಿ ಹೇಳಿದ್ದಾರೆ.
"ಕಳೆದ ಒಂದು ದಶಕಕ್ಕೂ ಹೆಚ್ಚು ಕಾಲ ಮುಂಬೈ ಇಂಡಿಯನ್ಸ್, ನನ್ನ ಜೀವನದ ಅತ್ಯಂತ ವಿಶೇಷ ಭಾಗವಾಗಿತ್ತು. ಆಟಗಾರರು, ಕೋಚಿಂಗ್ ತಂಡ, ಎಂಐ ಕುಟುಂಬದ (#OneFamily) ಅದ್ಭುತ ಬೆಂಬಲ ಮತ್ತು ಎಲ್ಲಕ್ಕಿಂತ ಹೆಚ್ಚಾಗಿ ಅಭಿಮಾನಿಗಳು ಸೇರಿ ಇದೊಂದು ಮರೆಯಲಾಗದ ಅನುಭವವನ್ನು ನೀಡಿದೆ. ನಾವೆಲ್ಲರೂ ಒಟ್ಟಾಗಿ ಕೆಲವು ಅವಿಸ್ಮರಣೀಯ ಕ್ಷಣಗಳನ್ನು ಹಂಚಿಕೊಂಡಿದ್ದೇವೆ, ಸವಾಲುಗಳನ್ನು ಎದುರಿಸಿದ್ದೇವೆ ಮತ್ತು ನಾವೆಲ್ಲರೂ ಹೆಮ್ಮೆಪಡುವಂತಹದ್ದನ್ನು ನಿರ್ಮಿಸಿದ್ದೇವೆ. ಶ್ರೀಮತಿ ನೀತಾ ಅಂಬಾನಿ ಮತ್ತು ಆಕಾಶ್ ಅಂಬಾನಿ ಅವರು ನನ್ನ ಮೇಲೆ ಇಟ್ಟಿದ್ದ ಅಚಲ ನಂಬಿಕೆ, ನೀಡಿದ್ದ ಬೆಂಬಲ ಮತ್ತು ಸ್ನೇಹಕ್ಕಾಗಿ ನಾನು ಅವರಿಗೆ ಹೃತ್ಪೂರ್ವಕ ಧನ್ಯವಾದಗಳನ್ನು ಅರ್ಪಿಸುತ್ತೇನೆ. ನಾವು ಒಟ್ಟಾಗಿ ಸಾಧಿಸಿದ ಸಾಧನೆಗಳ ಬಗ್ಗೆ ಅಪಾರ ಹೆಮ್ಮೆಯೊಂದಿಗೆ ನಾನು ನಿರ್ಗಮಿಸುತ್ತಿದ್ದೇನೆ. ನನ್ನ ಹೃದಯದಲ್ಲಿ ಮುಂಬೈ ಇಂಡಿಯನ್ಸ್‌ಗೆ ಯಾವಾಗಲೂ ವಿಶೇಷ ಸ್ಥಾನವಿರುತ್ತದೆ. ಮುಂಬರುವ ವರ್ಷಗಳಲ್ಲಿ ತಂಡವು ಇನ್ನಷ್ಟು ಯಶಸ್ಸನ್ನು ಕಾಣಲಿ ಎಂದು ನಾನು ಹಾರೈಸುತ್ತೇನೆ" ಎಂದು ಮಹೇಲಾ ಜಯವರ್ಧನೆ ಹೇಳಿದ್ದಾರೆ.
49 ವರ್ಷದ ಮಹೇಲಾ 2022ರಲ್ಲಿ ಎಂಐ ಫ್ರಾಂಚೈಸಿಯ 'ಗ್ಲೋಬಲ್ ಹೆಡ್ ಆಫ್ ಪರ್ಫಾರ್ಮೆನ್ಸ್' ಜವಾಬ್ದಾರಿಯನ್ನು ವಹಿಸಿಕೊಂಡರು. ಈ ಹುದ್ದೆಯಲ್ಲಿ ಅವರು ಜಾಗತಿಕ ಲೀಗ್‌ಗಳಲ್ಲಿ 'ಎಂಐ' ಫ್ರಾಂಚೈಸಿಯ ವಿಸ್ತರಣೆಯ ಮೇಲ್ವಿಚಾರಣೆ ನಿರ್ವಹಿಸಿದರು ಮತ್ತು 'ಒಂದು ಕುಟುಂಬ' (One Family) ಪರಿಕಲ್ಪನೆಯಡಿ ಎಲ್ಲ ಎಂಐ ತಂಡಗಳಲ್ಲೂ ಒಂದೇ ರೀತಿಯ ಕ್ರಿಕೆಟ್ ನೀತಿಯನ್ನು ರೂಪಿಸಲು ತರಬೇತಿ ತಂಡಗಳೊಂದಿಗೆ ನಿಕಟವಾಗಿ ಕೆಲಸ ಮಾಡಿದರು. ಈ ಅವಧಿಯಲ್ಲಿ 'ಮುಂಬೈ ಇಂಡಿಯನ್ಸ್ ವುಮೆನ್', 'ಎಂಐ ನ್ಯೂಯಾರ್ಕ್' ಮತ್ತು 'ಎಂಐ ಎಮಿರೇಟ್ಸ್' ತಂಡಗಳು ಪ್ರತಿಯೊಂದು ಲೀಗ್ನಲ್ಲೂ ಒಂದೊಂದು ಪ್ರಶಸ್ತಿಯನ್ನು ಗೆದ್ದುಕೊಂಡವು. ಇದು ಎಂಐ ಫ್ರಾಂಚೈಸಿಯ ಬೆಳೆಯುತ್ತಿರುವ ಜಾಗತಿಕ ಪರಂಪರೆಗೆ ಮತ್ತೊಂದು ಮೈಲಿಗಲ್ಲು ಎನಿಸಿದೆ.
