ಯೆಮೆನ್ : ಜುಲೈ 16 ರಂದು ನಿಗದಿಯಾಗಿದ್ದ ನಿಮಿಷಾ ಪ್ರಿಯಾಳ ಮರಣದಂಡನೆಯನ್ನು ಮುಂದೂಡಲಾಗಿದೆ ಎಂದು ನವದೆಹಲಿಯ ಮೂಲಗಳು ಮಂಗಳವಾರ ತಿಳಿಸಿತ್ತು. ಆದರೆ ಮೃತ ವ್ಯಕ್ತಿ ತಲಾಲ್ ಅವರ ಸೋದರ ಬ್ಲಡ್ ಮನಿಗೆ ತಮ್ಮ ಒಪ್ಪಿಗೆಯಿಲ್ಲ ಎಂದು ಹೇಳಿದ್ದಾರೆ. ಮೃತರ ಕುಟುಂಬ, ನಿಮಿಷಾಗೆ ಕ್ಷಮೆ ಪಡೆಯುವ ಪ್ರಯತ್ನಗಳನ್ನು ಮತ್ತು ಭಾರತ ಸರ್ಕಾರ ಸೇರಿದಂತೆ ವಿವಿಧ ಪಕ್ಷಗಳಿಂದ ಮಧ್ಯಸ್ಥಿಕೆಯ ಮಾತುಕತೆಗಳನ್ನು ಅವರು ಬಲವಾಗಿ ತಿರಸ್ಕರಿಸಿದ್ದಾರೆ. ಅಪರಾಧಿಯ ಮರಣದಂಡನೆಗಿಂತ ಕಡಿಮೆ ಏನನ್ನೂ ತನ್ನ ಕುಟುಂಬ ಬಯಸುವುದಿಲ್ಲ ಎಂದು ಮೃತರ ಸಹೋದರ ಹೇಳಿದ್ದಾರೆ.
ಕೇರಳದ ಪಾಲಕ್ಕಾಡ್ ಜಿಲ್ಲೆಯ ಕೊಲ್ಲೆಂಗೋಡ್ನ ಪ್ರಿಯಾ, ಜುಲೈ 2017 ರಲ್ಲಿ ಯೆಮೆನ್ ಪ್ರಜೆ ತಲಾಲ್ ಅಬ್ದೋ ಮಹ್ದಿ ಅವರನ್ನು ಕೊಲೆ ಮಾಡಿದ ಆರೋಪದಲ್ಲಿ ತಪ್ಪಿತಸ್ಥರೆಂದು ಸಾಬೀತಾಗಿದೆ. ಪ್ರಿಯಾ ಅವರ ಕುಟುಂಬವು ಇತರ ಪಕ್ಷದೊಂದಿಗೆ "ಪರಸ್ಪರ ಒಪ್ಪಿಗೆಯ" ಪರಿಹಾರವನ್ನು ತಲುಪಲು ಹೆಚ್ಚಿನ ಸಮಯವನ್ನು ಕೋರಲು ಭಾರತ ಸರ್ಕಾರ ಇತ್ತೀಚಿನ ದಿನಗಳಲ್ಲಿ ಸಂಘಟಿತ ಪ್ರಯತ್ನಗಳನ್ನು ಮಾಡಿದೆ ಎಂದು ಮೂಲಗಳು ತಿಳಿಸಿವೆ. ಆದರೆ ಇದೀಗ ಈ ಪ್ರಯತ್ನಗಳು ವಿಫಲವಾಗುವಂತಿದೆ.
ಮಹ್ದಿ ಕುಟುಂಬ ಹೇಳಿದ್ದೇನು? :
ಅರೇಬಿಕ್ ಭಾಷೆಯಲ್ಲಿ ಬರೆದ ಫೇಸ್ಬುಕ್ ಪೋಸ್ಟ್ನಲ್ಲಿ, ಅಬ್ದುಲ್ಫತ್ತಾ ಮಹ್ದಿ ಅವರ ಸಹೋದರ ತಲಾಲ್ ಅಬ್ದೋ ಮಹ್ದಿ, ಕುಟುಂಬದ ಮೇಲೆ ಎಲ್ಲಾ ಕಡೆಯಿಂದ ಸಮನ್ವಯಗೊಳಿಸಲು ಒತ್ತಡ ಹೇರಲಾಗುತ್ತಿದ್ದರೂ, ಪ್ರಿಯಾಳನ್ನು ಗಲ್ಲಿಗೇರಿಸುವುದು ಅಥವಾ ಪ್ರತೀಕಾರ ತೀರಿಸಿಕೊಳ್ಳುವುದು ಅವರ ಬೇಡಿಕೆಯಾಗಿಯೇ ಉಳಿದಿದೆ ಎಂದು ಹೇಳಿದ್ದಾರೆ.
"ಮಧ್ಯಸ್ಥಿಕೆ ಮತ್ತು ಶಾಂತಿಗಾಗಿ ಪ್ರಯತ್ನಗಳಿಂದ ಇಂದು ಸಾಧಿಸಲಾಗುತ್ತಿರುವುದು ಮತ್ತು ಕೇಳಲಾಗುತ್ತಿರುವುದು ಹೊಸದೇನಲ್ಲ ಅಥವಾ ಆಶ್ಚರ್ಯಕರವಲ್ಲ. ಗುಪ್ತ ಅನ್ವೇಷಣೆಗಳು ಮತ್ತು ಮಧ್ಯಸ್ಥಿಕೆ ವಹಿಸುವ ಪ್ರಯತ್ನಗಳು ನಡೆದಿವೆ. ಇದು ಸಾಮಾನ್ಯ ಮತ್ತು ನಿರೀಕ್ಷಿತ. ಆದರೆ ಒತ್ತಡವು ನಮ್ಮಲ್ಲಿ ಏನನ್ನೂ ಬದಲಾಯಿಸಿಲ್ಲ. ನಮ್ಮ ಬೇಡಿಕೆ ಪ್ರತೀಕಾರ, ಬೇರೇನೂ ಅಲ್ಲ," ಎಂದು ಮಹ್ದಿ ಹೇಳಿದ್ದಾರೆ ಎನ್ನಲಾಗಿದೆ.
2020 ರಲ್ಲಿ, ಯೆಮೆನ್ ನ್ಯಾಯಾಲಯವು ಪ್ರಿಯಾಗೆ ಮರಣದಂಡನೆ ಶಿಕ್ಷೆ ವಿಧಿಸಿತು ಮತ್ತು ದೇಶದ ಸುಪ್ರೀಂ ಜುಡಿಷಿಯಲ್ ಕೌನ್ಸಿಲ್ ನವೆಂಬರ್ 2023 ರಲ್ಲಿ ಆಕೆಯ ಮೇಲ್ಮನವಿಯನ್ನು ವಜಾಗೊಳಿಸಿತು. 38 ವರ್ಷದ ನರ್ಸ್ ಪ್ರಸ್ತುತ ಇರಾನ್ ಬೆಂಬಲಿತ ಹೌತಿಗಳ ನಿಯಂತ್ರಣದಲ್ಲಿರುವ ಯೆಮೆನ್ ರಾಜಧಾನಿ ಸನಾದಲ್ಲಿರುವ ಜೈಲಿನಲ್ಲಿದ್ದಾರೆ.
ಮೂಲಗಳು ಹೇಳುವಂತೆ, ಭಾರತ ಸರ್ಕಾರವು ಈ ಪ್ರಕರಣದಲ್ಲಿ ಆರಂಭದಿಂದಲೂ ಸಾಧ್ಯವಿರುವ ಎಲ್ಲಾ ಸಹಾಯವನ್ನು ನೀಡುತ್ತಿದೆ. ಆಕೆಯ ಬಿಡುಗಡೆಯನ್ನು ಖಚಿತಪಡಿಸಿಕೊಳ್ಳಲು ಪ್ರಯತ್ನಗಳ ಭಾಗವಾಗಿ ಪ್ರಿಯಾಳ ತಾಯಿ ಪ್ರೇಮಕುಮಾರಿ ಕಳೆದ ವರ್ಷ ಯೆಮೆನ್ಗೆ ಪ್ರಯಾಣ ಬೆಳೆಸಿದ್ದಋಊ. "ದಿಯತ್" ಅಥವಾ " ರಕ್ತದ ಹಣ " ಪಾವತಿಸುವ ಮೂಲಕ ಪ್ರಿಯಾಳ ಬಿಡುಗಡೆಯನ್ನು ಭದ್ರಪಡಿಸಿಕೊಳ್ಳುವ ಆಯ್ಕೆಯನ್ನು ಭಾರತ ಪರಿಗಣಿಸಿತ್ತು. ಆದರೆ ಅದು ವಿಫಲವಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.
