ಬೆಂಗಳೂರು: ಸ್ಯಾಂಡಲ್‌ವುಡ್ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ಪತ್ನಿ ವಿಜಯಲಕ್ಷ್ಮಿ ಹಾಗೂ ನಟ ಧನವೀರ್ ನಡುವಿನ ವಾಕ್ಸಮರ ಹಾಗೂ ಪೋಸ್ಟ್ ಯುದ್ಧ ಇದೀಗ ಸೋಷಿಯಲ್ ಮೀಡಿಯಾದಲ್ಲಿ ಮತ್ತಷ್ಟು ತಾರಕಕ್ಕೆ ಏರಿದೆ. ದರ್ಶನ್ ಅವರ ಆಪ್ತ ವಲಯದಲ್ಲಿ ಗುರುತಿಸಿಕೊಂಡಿದ್ದ ನಟ ಧನವೀರ್ ವಿರುದ್ಧ ಇತ್ತೀಚೆಗೆ ವಿಜಯಲಕ್ಷ್ಮಿ ಅವರು ಪರೋಕ್ಷವಾಗಿ ತೀವ್ರ ಅಸಮಾಧಾನ ಹೊರಹಾಕಿದ್ದರು. ಇದಕ್ಕೆ ಪ್ರತಿಯಾಗಿ ಇದೀಗ ಧನವೀರ್ ಅವರು ದರ್ಶನ್ ಜೊತೆಗಿನ ಹಳೆಯ ಸುಂದರ ಫೋಟೋ ಒಂದನ್ನು ಹಂಚಿಕೊಂಡು, ತಮ್ಮ ಮೇಲಿನ ಆರೋಪ ಹಾಗೂ ವಿರೋಧಗಳಿಗೆ ತಕ್ಕ ತಿರುಗೇಟು ನೀಡಿದ್ದಾರೆ.
ದರ್ಶನ್ ಅವರೊಂದಿಗಿನ ಫೋಟೋ ಹಂಚಿಕೊಂಡು ಭಾವುಕ ಹಾಗೂ ಖಾರವಾದ ಬರಹ ಬರೆದುಕೊಂಡಿರುವ ಧನವೀರ್, "ನನ್ನ ವಿರುದ್ಧ ಎಷ್ಟು ಬೇಕಾದರೂ ನೆಗೆಟಿವ್ ಪಿಆರ್ (Negative PR) ಮಾಡಿಸಬಹುದು. ಆದರೆ, ನನ್ನ ಹೃದಯದ ಬಾಗಿಲಿನಲ್ಲಿ ದರ್ಶನ್ ಸರ್ ಅವರಿಗೆ ಇರುವ ಸ್ಥಾನಕ್ಕೆ ಬೀಗ ಹಾಕುವ ಶಕ್ತಿ ಜಗತ್ತಿನ ಯಾವುದೇ ಶಕ್ತಿಗೂ ಇಲ್ಲ. ನನ್ನ ಅಭಿಮಾನ ನಿಮ್ಮ ವಿರೋಧದಿಂದ ಹುಟ್ಟಿದ್ದಲ್ಲ, ಹಾಗೆಯೇ ನಿಮ್ಮ ಯಾವುದೇ ವಿರೋಧದಿಂದ ಇದು ಸಾಯುವುದೂ ಇಲ್ಲ. ಜಗತ್ತು ಏನೇ ಹೇಳಲಿ, ಕಾಲವೇ ಎಷ್ಟೇ ಬದಲಾಗಲಿ, ನನ್ನ ನೆಲವೂ ಒಂದೇ, ನನ್ನ ಅಭಿಮಾನವೂ ಒಂದೇ – ಅದು ದರ್ಶನ್ ಸರ್ ಮಾತ್ರ!" ಎಂದು ಬರೆದುಕೊಳ್ಳುವ ಮೂಲಕ ಪರೋಕ್ಷವಾಗಿ ಕೌಂಟರ್ ಕೊಟ್ಟಿದ್ದಾರೆ.
ದರ್ಶನ್ ಜೈಲಾಸಕ್ತರಾದ ಸಂದರ್ಭದಿಂದ ಹಿಡಿದು ಇತ್ತೀಚಿನ ಬೆಳವಣಿಗೆಗಳವರೆಗೆ ಅಭಿಮಾನಿ ಬಳಗ ಹಾಗೂ ಆಪ್ತರ ನಡುವೆ ಉಂಟಾಗಿರುವ ಭಿನ್ನಾಭಿಪ್ರಾಯಗಳು ಈಗ ಬೀದಿಗೆ ಬಂದಂತಾಗಿವೆ. ವಿಜಯಲಕ್ಷ್ಮಿ ಅವರ ಪೋಸ್ಟ್ ಬೆನ್ನಲ್ಲೇ ಧನವೀರ್ ನೀಡಿದ ಈ ಪ್ರತ್ಯುತ್ತರವು ದರ್ಶನ್ ಅಭಿಮಾನಿ ವಲಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ಈ ಪೋಸ್ಟ್ ಸಮರ ಭಾರೀ ವೈರಲ್ ಆಗುತ್ತಿದೆ.
