ಫಿಲಿಪೈನ್ಸ್ ವಾಯುಪಡೆಗೆ ಸೇರಿದ ಎಸ್‌ಎಫ್-260 (SF-260) ತರಬೇತಿ ವಿಮಾನಗಳು ತರಬೇತಿ ಹಾರಾಟ ನಡೆಸುತ್ತಿದ್ದಾಗ ಸಂಭವಿಸಿದ ಭೀಕರ ಅಪಘಾತದಲ್ಲಿ ನಾಲ್ವರು ಪೈಲಟ್‌ಗಳು ಮೃತಪಟ್ಟಿದ್ದಾರೆ. ಫಿಲಿಪೈನ್ಸ್‌ನ ಫರ್ನಾಂಡೋ ಏರ್ ಬೇಸ್ ಆವರಣದಲ್ಲಿ ಶುಕ್ರವಾರ ಮಧ್ಯಾಹ್ನ 3:51 ರ ಸುಮಾರಿಗೆ ಈ ದುರಂತ ಸಂಭವಿಸಿದ್ದು, ಶನಿವಾರ ವಾಯುಪಡೆಯು ಅಧಿಕೃತವಾಗಿ ಈ ವಿಷಯವನ್ನು ಸ್ಪಷ್ಟಪಡಿಸಿದೆ. ತರಬೇತಿ ನಿರತ ಎರಡೂ ವಿಮಾನಗಳು ಏರ್ ಬೇಸ್‌ನ ಗಡಿಯೊಳಗೇ ಪತನಗೊಂಡಿದ್ದು, ಬೇರೆ ಯಾವುದೇ ಸಾರ್ವಜನಿಕ ಜೀವಹಾನಿ ಸಂಭವಿಸಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಅಪಘಾತಕ್ಕೆ ನಿಖರ ಕಾರಣ ಏನೆಂಬುದನ್ನು ಪತ್ತೆಹಚ್ಚಲು ವಾಯುಪಡೆಯು ತನಿಖೆಗೆ ಆದೇಶಿಸಿದ್ದು, ಮುನ್ನೆಚ್ಚರಿಕೆ ಕ್ರಮವಾಗಿ ತನ್ನ ಬಳಿಯಿರುವ ಎಲ್ಲಾ ಎಸ್‌ಎಫ್-260 ಸರಣಿಯ ವಿಮಾನಗಳ ಹಾರಾಟವನ್ನು ತಾತ್ಕಾಲಿಕವಾಗಿ ತಡೆಹಿಡಿದಿದೆ. ಮೃತಪಟ್ಟ ನಾಲ್ವರು ಪೈಲಟ್‌ಗಳ ಕುಟುಂಬಗಳಿಗೆ ಅಗತ್ಯವಿರುವ ಎಲ್ಲಾ ನೆರವು ನೀಡುವುದಾಗಿ ತಿಳಿಸಿರುವ ಫಿಲಿಪೈನ್ಸ್ ವಾಯುಪಡೆ, ಅವರ ಸೇವೆ ಮತ್ತು ಬಲಿದಾನಕ್ಕೆ ಶ್ರದ್ಧಾಂಜಲಿ ಸಲ್ಲಿಸಿದೆ. ತರಬೇತಿಯ ವೇಳೆ ಎರಡೂ ವಿಮಾನಗಳು ನಡುಆಕಾಶದಲ್ಲೇ ಪರಸ್ಪರ ಡಿಕ್ಕಿಯಾಗಿವೆ ಎಂದು ಹೆಸರು ಹೇಳಲಿಚ್ಛಿಸದ ಅಧಿಕೃತ ಮೂಲಗಳು ತಿಳಿಸಿದ್ದು, ವಿಮಾನಗಳಲ್ಲಿ ಒಂದು ಏರ್ ಬೇಸ್‌ನ ಬ್ಯಾರಾಕ್ಸ್ ಸಮೀಪ ಪತನಗೊಂಡಿದೆ ಎಂದು ಪ್ರತ್ಯಕ್ಷದರ್ಶಿಗಳು ವರದಿ ಮಾಡಿದ್ದಾರೆ.
