ಶಿವಮೊಗ್ಗ: ನಗರದ ಕುವೆಂಪು ರಂಗಮಂದಿರದಲ್ಲಿ ನಾಡಹಬ್ಬ ದಸರಾ ಮಹೋತ್ಸವದ ಅಂಗವಾಗಿ ಶಿವಮೊಗ್ಗ ಮಹಾನಗರ ಪಾಲಿಕೆ ವತಿಯಿಂದ ಹಮ್ಮಿಕೊಳ್ಳಲಾಗಿದ್ದ ‘ಸಾಹಿತ್ಯ ಸಂಭ್ರಮ’ ಕಾರ್ಯಕ್ರಮದಲ್ಲಿ ಸುಗಮ ಸಂಗೀತ ಗಾಯಕಿ ಸಹನಾ ದೀಪಕ್ ಸಾಗರ್ ಮತ್ತು ತಂಡದವರ ಭಾವಗೀತೆಗಳ ಗಾಯನ ಕಲಾಪ್ರೇಮಿಗಳನ್ನು ಮಂತ್ರಮುಗ್ಧರನ್ನಾಗಿಸಿತು.
ಕನ್ನಡದ ಪ್ರಮುಖ ಕವಿಗಳ ಗೀತೆಗಳ ಗಾನಸುಧೆ
ವೇದಿಕೆಯಲ್ಲಿ ವರಕವಿ ಡಾ. ದ.ರಾ. ಬೇಂದ್ರೆ, ರಾಷ್ಟ್ರಕವಿ ಕುವೆಂಪು, ನಿತ್ಯೋತ್ಸವ ಕವಿ ಡಾ. ಕೆ.ಎಸ್. ನಿಸಾರ್ ಅಹ್ಮದ್, ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ ಡಾ. ಚಂದ್ರಶೇಖರ ಕಂಬಾರ, ನವ್ಯ ಸಾಹಿತ್ಯದ ಹರಿಕಾರ ಗೋಪಾಲಕೃಷ್ಣ ಅಡಿಗ ಹಾಗೂ ಡಾ. ಎನ್.ಎಸ್. ಲಕ್ಷ್ಮೀನಾರಾಯಣ ಭಟ್ಟ ಸೇರಿದಂತೆ ಮುಂತಾದ ದಿಗ್ಗಜ ಕವಿಗಳ ಜನಪ್ರಿಯ ಭಾವಗೀತೆಗಳನ್ನು ಸಹನಾ ದೀಪಕ್ ಸಾಗರ್ ಕಂಠತುಂಬಿ ಹಾಡಿ ಪ್ರೇಕ್ಷಕರನ್ನು ರಂಜಿಸಿದರು.
ವಾದ್ಯ ಕಲಾವಿದರ ಸಾಥ್
ಈ ಗಾನ ವೈಭವಕ್ಕೆ ಶಿವಮೊಗ್ಗದ ಹೆಸರಾಂತ ವಾದ್ಯ ಕಲಾವಿದರಾದ ಅವಿನ್, ವಿನಯ್ ಮತ್ತು ಶಾಮ್ ಅವರು ಪಕ್ಕವಾದ್ಯ ನುಡಿಸಿ ಸಮರ್ಥವಾಗಿ ಸಾಥ್ ನೀಡಿದರು. ಸುಮಧುರ ಸಂಗೀತ ಹಾಗೂ ಸಾಹಿತ್ಯದ ಸಮ್ಮಿಲನ ಸಭಿಕರ ಮೆಚ್ಚುಗೆಗೆ ಪಾತ್ರವಾಯಿತು.
ಶಾಸಕ ಚನ್ನಬಸಪ್ಪ ಅವರಿಂದ ಅಭಿನಂದನೆ
ಕಾರ್ಯಕ್ರಮವನ್ನು ಯಶಸ್ವಿಯಾಗಿ ನಡೆಸಿಕೊಟ್ಟ ಗಾಯಕಿ ಸಹನಾ ದೀಪಕ್ ಸಾಗರ್ ಪಿ.ಜಿ. ಹಾಗೂ ಅವರ ತಂಡದ ಕಲಾವಿದರನ್ನು ಸ್ಥಳೀಯ ಶಾಸಕ ಎಸ್.ಎನ್. ಚನ್ನಬಸಪ್ಪ ಅವರು ಶಾಲು ಹೊದಿಸಿ ಅಭಿನಂದಿಸಿ, ಶುಭ ಹಾರೈಸಿದರು. ಕಾರ್ಯಕ್ರಮದಲ್ಲಿ ಮಹಾನಗರ ಪಾಲಿಕೆಯ ಪ್ರಮುಖರು ಹಾಗೂ ಅಪಾರ ಸಂಖ್ಯೆಯ ಸಂಗೀತ-ಸಾಹಿತ್ಯಾಸಕ್ತರು ಉಪಸ್ಥಿತರಿದ್ದರು.
