ಬೆಂಗಳೂರು: ರಾಜ್ಯದ 18ರಿಂದ 25 ವರ್ಷದೊಳಗಿನ ಸುಮಾರು 7,000ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಮತ್ತು ಯುವಜನರಲ್ಲಿ ಎಚ್ಐವಿ ಸೋಂಕು ದೃಢಪಟ್ಟಿರುವುದು ತೀವ್ರ ಆತಂಕ ಸೃಷ್ಟಿಸಿದೆ. ಈ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರವು ಮಹತ್ವದ ನಿರ್ಧಾರ ಕೈಗೊಂಡಿದ್ದು, ರಾಜ್ಯಾದ್ಯಂತ ಇರುವ ಎಲ್ಲಾ ಇಂಜಿನಿಯರಿಂಗ್, ಪದವಿ, ಸರ್ಕಾರಿ, ಅನುದಾನಿತ ಹಾಗೂ ಖಾಸಗಿ ಕಾಲೇಜುಗಳಲ್ಲಿ ಎಚ್ಐವಿ ಪರೀಕ್ಷೆ ಮತ್ತು ಸಲಹಾ ಶಿಬಿರಗಳನ್ನು ಆಯೋಜಿಸಲು ಮುಂದಾಗಿದೆ.
https://twitter.com/Edmondfernandes/status/2082084504383177145
ಕರ್ನಾಟಕ ರಾಜ್ಯ ಏಡ್ಸ್ ನಿಯಂತ್ರಣ ಸೊಸೈಟಿ (KSAPS) ನೀಡಿದ ಸಲಹೆಯ ಮೇರೆಗೆ, ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯ (VTU) ಮತ್ತು ಕಾಲೇಜು ಶಿಕ್ಷಣ ಇಲಾಖೆಯು ಜಂಟಿಯಾಗಿ ಕಾಲೇಜುಗಳಲ್ಲಿ 'ಸಂಯೋಜಿತ ಆರೋಗ್ಯ ಶಿಬಿರಗಳನ್ನು' ನಡೆಸಲು ಯೋಜಿಸಿವೆ. ಈ ಪರೀಕ್ಷೆಗಳು ಸಂಪೂರ್ಣವಾಗಿ ಸ್ವಯಂಪ್ರೇರಿತವಾಗಿದ್ದು, ವಿದ್ಯಾರ್ಥಿಗಳ ಸಮ್ಮತಿ ಪಡೆದ ನಂತರವಷ್ಟೇ ನಡೆಸಲಾಗುತ್ತದೆ.
ಯುವಜನರಲ್ಲಿ ಸೋಂಕು ಹೆಚ್ಚಲು ಕಾರಣವೇನು?
ರಾಷ್ಟ್ರೀಯ ಏಡ್ಸ್ ನಿಯಂತ್ರಣ ಸಂಸ್ಥೆ (NACO) ಬಿಡುಗಡೆ ಮಾಡಿರುವ ‘ಸಂಕಲಕ್ 2024’ ವರದಿ ಪ್ರಕಾರ, ಭಾರತದಲ್ಲೇ ಅತಿ ಹೆಚ್ಚು ಎಚ್ಐವಿ ಸೋಂಕಿತರಿರುವ ರಾಜ್ಯಗಳ ಪಟ್ಟಿಯಲ್ಲಿ ಕರ್ನಾಟಕ ಮೂರನೇ ಸ್ಥಾನದಲ್ಲಿದೆ. ರಾಜ್ಯದಲ್ಲಿ ಅಂದಾಜು 2.6 ಲಕ್ಷ ಎಚ್ಐವಿ ಬಾಧಿತರಿದ್ದು, ಪ್ರಸ್ತುತ 2.05 ಲಕ್ಷ ಜನರು ಮಾತ್ರ ಆಂಟಿರೆಟ್ರೋವೈರಲ್ ಥೆರಪಿ (ART) ಚಿಕಿತ್ಸೆ ಪಡೆಯುತ್ತಿದ್ದಾರೆ. ಸುಮಾರು 54,000 ಜನರಿಗೆ ತಮಗೆ ಸೋಂಕು ತಗಲಿರುವುದೇ ತಿಳಿದಿಲ್ಲ ಎಂದು ಆರೋಗ್ಯ ಇಲಾಖೆ ಅಂದಾಜಿಸಿದೆ. 18ರಿಂದ 35 ವರ್ಷದ ಯುವಜನರಲ್ಲಿ ಸೋಂಕಿತರ ಸಂಖ್ಯೆ 2023-24ರಲ್ಲಿ 44,500 ಇತ್ತು, ಆದರೆ 2025-26ರ ವೇಳೆಗೆ ಈ ಸಂಖ್ಯೆ 66,600ಕ್ಕೆ ಏರಿಕೆಯಾಗಿದೆ ಎಂದು KSAPS ಮಾಹಿತಿ ನೀಡಿದೆ.
ಏನಿದು '95-95-99' ಗುರಿ?
ಕಾಲೇಜುಗಳಲ್ಲಿ ಆರಂಭಿಸಲಾಗುತ್ತಿರುವ ಈ ಪರೀಕ್ಷಾ ಅಭಿಯಾನವು KSAPSನ 'ಮಾಸ್' (Mobilisation for AIDS Suraksha - MAS) ಕಾರ್ಯಕ್ರಮದ ಭಾಗವಾಗಿದೆ. ಸೋಂಕಿತರಾಗಿರುವ ಶೇಕಡಾ 95 ರಷ್ಟು ಜನರಿಗೆ ತಮ್ಮ ಎಚ್ಐವಿ ಸ್ಥಿತಿಯ ಅರಿವು ಮೂಡಿಸುವುದು, ಸೋಂಕು ದೃಢಪಟ್ಟ ಶೇ. 95 ರಷ್ಟು ಜನರಿಗೆ ಸಕಾಲದಲ್ಲಿ ಚಿಕಿತ್ಸೆ ಒದಗಿಸುವುದು ಹಾಗೂ ಚಿಕಿತ್ಸೆ ಪಡೆಯುತ್ತಿರುವ ಶೇ. 99 ರಷ್ಟು ಜನರಲ್ಲಿ ವೈರಸ್ ಹರಡುವಿಕೆಯನ್ನು ನಿಯಂತ್ರಿಸುವುದು ಈ ಯೋಜನೆಯ ಮುಖ್ಯ ಉದ್ದೇಶಗಳಾಗಿವೆ.
ಗೌಪ್ಯತೆ ಕಾಯ್ದುಕೊಳ್ಳಲು QR ಕೋಡ್ ತಂತ್ರಜ್ಞಾನ
ವಿದ್ಯಾರ್ಥಿಗಳ ಖಾಸಗಿತನಕ್ಕೆ ಧಕ್ಕೆಯಾಗದಂತೆ ತಪಾಸಣೆ ನಡೆಸಲು ಸರ್ಕಾರ ವಿಶೇಷ ವ್ಯವಸ್ಥೆ ಮಾಡಿದೆ. ವಿದ್ಯಾರ್ಥಿಗಳು QR ಕೋಡ್ ಸ್ಕ್ಯಾನ್ ಮಾಡುವ ಮೂಲಕ ತಮ್ಮ ವರ್ತನೆ ಮತ್ತು ಸೋಂಕಿನ ಸಾಧ್ಯತೆಯನ್ನು ರಹಸ್ಯವಾಗಿ ಪರಿಶೀಲಿಸಿಕೊಳ್ಳಬಹುದು. ಸೋಂಕಿನ ಲಕ್ಷಣಗಳು ಅಥವಾ ಸಾಧ್ಯತೆ ಕಂಡುಬಂದರೆ, ಅವರು ಹತ್ತಿರದ ಆರೋಗ್ಯ ಕೇಂದ್ರಗಳನ್ನು ಸಂಪರ್ಕಿಸಿ ಪರೀಕ್ಷೆ ಹಾಗೂ ಚಿಕಿತ್ಸೆ ಪಡೆಯಲು ಈ ತಂತ್ರಜ್ಞಾನ ನೆರವಾಗಲಿದೆ.
