ಲಕ್ನೋ: ಉತ್ತರ ಪ್ರದೇಶದ ಲಕ್ನೋದಲ್ಲಿ ಶನಿವಾರ ಬೆಳಿಗ್ಗೆ ಇಬ್ಬರು ಹೈಕೋರ್ಟ್ ವಕೀಲರು ಇದ್ದ ಕಾರು ಕೊಳದಲ್ಲಿ ಮುಳುಗಿ ಸಾವನ್ನಪ್ಪಿದ ದುರಂತ ಘಟನೆ ನಡೆದಿದೆ. ವರದಿಗಳ ಪ್ರಕಾರ, ಲಕ್ನೋದ ಚಿನ್ಹತ್ನ ನೌಬಸ್ತಾ ಕಲಾ ಗ್ರಾಮದಲ್ಲಿ ಕಾರು ನಿಯಂತ್ರಣ ತಪ್ಪಿ ಭೇಲು ಕಲಾ ಕೊಳದಲ್ಲಿ ಮುಳುಗಿ ಈ ಅಪಘಾತ ಸಂಭವಿಸಿದೆ.
ಈ ಘಟನೆಯಿಂದ ಇಬ್ಬರು ಹೈಕೋರ್ಟ್ ವಕೀಲರು ಸಾವನ್ನಪ್ಪಿದ್ದಾರೆ. ಕೊಳದಲ್ಲಿ ಮುಳುಗಿದ ಕಾರಿನ ಹಿಂಭಾಗದಲ್ಲಿ ಹೈಕೋರ್ಟ್ ಎಂಬ ಸ್ಟಿಕ್ಕರ್ ಅಂಟಿಸಲಾಗಿದೆ. ಪೊಲೀಸರ ಪ್ರಕಾರ, ನೌಬಸ್ತಾ-ತಕ್ರೋಹಿ ರಸ್ತೆಯಲ್ಲಿ ಪ್ರಯಾಣಿಸುತ್ತಿದ್ದಾಗ ಕಾರು ನಿಯಂತ್ರಣ ತಪ್ಪಿ ತಿರುವಿನ ಬಳಿ ಕೊಳಕ್ಕೆ ಬಿದ್ದಿದೆ. ನೀರಿನಲ್ಲಿ ಕಾರು ಇರುವುದನ್ನು ಗಮನಿಸಿದ ಗ್ರಾಮಸ್ಥರು ಪೊಲೀಸರಿಗೆ ಮಾಹಿತಿ ನೀಡಿದರು.
ಅಗ್ನಿಶಾಮಕ ದಳದ ರಕ್ಷಣಾ ತಂಡ ಸ್ಥಳಕ್ಕೆ ಆಗಮಿಸಿ, ಸಾಕಷ್ಟು ಪ್ರಯತ್ನದ ನಂತರ ಕಾರನ್ನು ನೀರಿನಿಂದ ಹೊರತೆಗೆಯುವಲ್ಲಿ ಯಶಸ್ವಿಯಾದರು. ಕಾರಿನಿಂದ ಹೊರತೆಗೆದ ಮೃತ ದೇಹಗಳನ್ನು ಹೈಕೋರ್ಟ್ನಲ್ಲಿ ಸ್ಥಾಯಿ ಕೌನ್ಸಿಲ್ ಆಗಿರುವ ಕುಲದೀಪ್ ಕುಮಾರ್ ಅವಸ್ಥಿ ಮತ್ತು ಹೈಕೋರ್ಟ್ನಲ್ಲಿ ಬ್ರೀಫ್ ಹೋಲ್ಡರ್ ಆಗಿರುವ ಶಶಾಂಕ್ ಸಿಂಗ್ ಎಂದು ಗುರುತಿಸಲಾಗಿದೆ. ಕಾರು ನಿಧಾನವಾಗಿ ಕೊಳಕ್ಕೆ ಮುಳುಗುತ್ತಿದ್ದಂತೆ ಇಬ್ಬರೂ ಮುಳುಗಿ ಸಾವನ್ನಪ್ಪಿದ್ದಾರೆ ಎಂದು ಪೊಲೀಸರು ದೃಢಪಡಿಸಿದರು.
