ಟಿಬೆಟ್ ಪ್ರದೇಶದಲ್ಲಿ ಶನಿವಾರ ಬೆಳಿಗ್ಗೆ ಒಂದು ಗಂಟೆಯ ಅಂತರದಲ್ಲಿ ರಿಕ್ಟರ್ ಮಾಪಕದಲ್ಲಿ ಕ್ರಮವಾಗಿ 3.6 ಮತ್ತು 3.1 ತೀವ್ರತೆಯ ಎರಡು ಸರಣಿ ಭೂಕಂಪಗಳು ಸಂಭವಿಸಿವೆ ಎಂದು ರಾಷ್ಟ್ರೀಯ ಭೂಕಂಪನ ಕೇಂದ್ರ (NCS) ತಿಳಿಸಿದೆ.
ರಾಷ್ಟ್ರೀಯ ಭೂಕಂಪನ ಕೇಂದ್ರದ ಮಾಹಿತಿಯ ಪ್ರಕಾರ, ಶನಿವಾರ ಬೆಳಿಗ್ಗೆ 6:00 ಗಂಟೆಗೆ ಟಿಬೆಟ್‌ನಲ್ಲಿ 15 ಕಿಲೋಮೀಟರ್ ಆಳದಲ್ಲಿ 3.6 ತೀವ್ರತೆಯ ಮೊದಲ ಭೂಕಂಪ ಸಂಭವಿಸಿತು. ಇದರ ಕೇಂದ್ರಬಿಂದುವು ಉತ್ತರ ಅಕ್ಷಾಂಶ 29.623 ಡಿಗ್ರಿ ಮತ್ತು ಪೂರ್ವ ರೇಖಾಂಶ 92.503 ಡಿಗ್ರಿಯಲ್ಲಿದೆ ಎಂದು ಎನ್‌ಸಿಎಸ್ ಎಕ್ಸ್ (X) ಸಾಮಾಜಿಕ ಜಾಲತಾಣದಲ್ಲಿ ಖಚಿತಪಡಿಸಿದೆ. ಇದರ ಬೆನ್ನಲ್ಲೇ, ಬೆಳಿಗ್ಗೆ 6:55 ರ ಸುಮಾರಿಗೆ 14 ಕಿಲೋಮೀಟರ್ ಆಳದಲ್ಲಿ 3.1 ತೀವ್ರತೆಯ ಮತ್ತೊಂದು ಭೂಕಂಪನವು ವರದಿಯಾಗಿದೆ. ಇದರ ಕೇಂದ್ರಬಿಂದುವು ಅಕ್ಷಾಂಶ 28.459 ಡಿಗ್ರಿ ಮತ್ತು ರೇಖಾಂಶ 92.196 ಡಿಗ್ರಿಯಲ್ಲಿದೆ. ಕೇವಲ 55 ನಿಮಿಷಗಳ ಅಂತರದಲ್ಲಿ ಸತತವಾಗಿ ಸಂಭವಿಸಿದ ಈ ಎರಡು ಭೂಕಂಪಗಳು ಭೂಕಂಪನ ಪೀಡಿತ ಹಿಮಾಲಯನ್ ಪ್ರದೇಶದಲ್ಲಿ ಆತಂಕ ಮೂಡಿಸಿವೆ.
ಈ ಭೂಕಂಪಗಳು ಇತ್ತೀಚಿನ ತಿಂಗಳುಗಳಲ್ಲಿ ನೆಪಾಳವನ್ನು ಕಾಡುತ್ತಿರುವ ಸರಣಿ ನೈಸರ್ಗಿಕ ವಿಕೋಪಗಳ ಹಿನ್ನೆಲೆಯಲ್ಲಿ ಸಂಭವಿಸಿವೆ. ಹಿಮಾಲಯನ್ ರಾಷ್ಟ್ರವಾದ ನೆಪಾಳದಲ್ಲಿ ಇತ್ತೀಚೆಗೆ ಭಾರಿ ಮಳೆ ಹಾಗೂ ನೈಸರ್ಗಿಕ ದುರಂತಗಳು ಸಂಭವಿಸಿವೆ. ನೇಪಾಳ-ಚೀನಾ ಗಡಿಯ ಬಳಿ ಸಂಭವಿಸಿದ ಹಿಮಪಾತ ಹಾಗೂ ಬಂಡೆಗಳ ಕುಸಿತದಿಂದ ಭೋಟೆ ಕೋಶಿ ನದಿಯಲ್ಲಿ ಹಠಾತ್ ಪ್ರವಾಹ ಉಂಟಾಗಿ ಮನೆಗಳು, ರಸ್ತೆಗಳು, ಸೇತುವೆಗಳು ಮತ್ತು ಜಲವಿದ್ಯುತ್ ಮೂಲಸೌಕರ್ಯಗಳು ಗಂಭೀರ ಹಾನಿಗೊಳಗಾಗಿದ್ದವು. ಅಕ್ಟೋಬರ್ 1 ರಂದು ನೆಪಾಳ ರೆಡ್ ಕ್ರಾಸ್ ಸೊಸೈಟಿ ಬಿಡುಗಡೆ ಮಾಡಿದ ವರದಿಯ ಪ್ರಕಾರ, ಸೆಪ್ಟೆಂಬರ್ 24 ರಿಂದ 27 ರ ನಡುವೆ ಸುರಿದ ನಿರಂತರ ಮಳೆಯಿಂದಾಗಿ ದೇಶದ ಹಲವು ಪ್ರಾಂತ್ಯಗಳಲ್ಲಿ ಭಾರಿ ಪ್ರವಾಹ ಹಾಗೂ ಭೂಕುಸಿತಗಳು ಸಂಭವಿಸಿವೆ. ಈ ದುರಂತಗಳಲ್ಲಿ 30 ಮಂದಿ ಪ್ರಾಣ ಕಳೆದುಕೊಂಡಿದ್ದು, 15 ಜನರು ಗಾಯಗೊಂಡಿದ್ದಾರೆ ಮತ್ತು ಮೂವರು ನಾಪತ್ತೆಯಾಗಿದ್ದಾರೆ. ಅಲ್ಲದೆ, ಸುಮಾರು 2,000ಕ್ಕೂ ಅಧಿಕ ಕುಟುಂಬಗಳು ನೇರವಾಗಿ ಸಂತ್ರಸ್ತರಾಗಿವೆ.
