ವಾಷಿಂಗ್ಟನ್: ಟೆಕ್ಸಾಸ್‌ನ ಫೋರ್ಟ್ ಹುಡ್ ಸೇನಾ ನೆಲೆಯಲ್ಲಿ 13 ಮಂದಿಯ ಮಾರಣಹೋಮ ನಡೆಸಿದ್ದ ಮಾಜಿ ಸೇನಾ ವೈದ್ಯ ನಿದಾಲ್ ಹಸನ್‌ನನ್ನು ಫೈರಿಂಗ್ ಸ್ಕ್ವಾಡ್ ಮೂಲಕ ಗಲ್ಲಿಗೇರಿಸುವ ಪ್ರಕ್ರಿಯೆಯನ್ನು ನೇರಪ್ರಸಾರ (ಲೈವ್‌ಸ್ಟ್ರೀಮ್) ಮಾಡುವುದಿಲ್ಲ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸ್ಪಷ್ಟಪಡಿಸಿದ್ದಾರೆ.
ಮರಣದಂಡನೆಯನ್ನು ಸಾರ್ವಜನಿಕವಾಗಿ ಲೈವ್ ಪ್ರಸಾರ ಮಾಡಲು ಪೆಂಟಗನ್ ಸಿದ್ಧತೆ ನಡೆಸಿರುವುದಕ್ಕೆ ಅಮೆರಿಕ ರಾಜಕೀಯ ವಲಯದಲ್ಲಿ ತೀವ್ರ ವಿರೋಧ ವ್ಯಕ್ತವಾದ ಹಿನ್ನೆಲೆಯಲ್ಲಿ ಈ ನಿರ್ಧಾರಕ್ಕೆ ಬರಲಾಗಿದೆ.
ಭಾರಿ ಆಕ್ರೋಶಕ್ಕೆ ಮಣಿದ ಆಡಳಿತ
ಹಸನ್‌ನ ಮರಣದಂಡನೆಯನ್ನು ನೇರಪ್ರಸಾರ ಮಾಡುವ ಚಿಂತನೆ ಹೊರಬೀಳುತ್ತಿದ್ದಂತೆಯೇ, ರಿಪಬ್ಲಿಕನ್ ಮತ್ತು ಡೆಮಾಕ್ರಟಿಕ್ ಎರಡೂ ಪಕ್ಷಗಳ ನಾಯಕರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದರು. ಅಮೆರಿಕದ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಕೂಡ ಬಹಿರಂಗವಾಗಿಯೇ ಅಸಮಾಧಾನ ವ್ಯಕ್ತಪಡಿಸಿದ್ದು, "ಒಂದು ವೇಳೆ ಈ ಮರಣದಂಡನೆಯು ಲೈವ್ ಪ್ರಸಾರವಾದರೆ, ನಾನು ಖಂಡಿತವಾಗಿಯೂ ಅದನ್ನು ವೀಕ್ಷಿಸುವುದಿಲ್ಲ" ಎಂದು ಹೇಳಿದ್ದರು. ಹೌಸ್ ಸ್ಪೀಕರ್ ಮೈಕ್ ಜಾನ್ಸನ್ ಸೇರಿದಂತೆ ಹಲವು ಪ್ರಮುಖ ನಾಯಕರು, ಇಂತಹ ಭೀಕರ ದೃಶ್ಯಗಳನ್ನು ನೇರಪ್ರಸಾರ ಮಾಡುವುದರಿಂದ ಮುಂದಿನ ದಿನಗಳಲ್ಲಿ ಭಯೋತ್ಪಾದಕರಿಗೆ ಅದು ಪ್ರಚಾರದ ಅಥವಾ ನೇಮಕಾತಿ ಅಸ್ತ್ರವಾಗಿ ಬಳಕೆಯಾಗುವ ಅಪಾಯವಿದೆ ಎಂದು ಆತಂಕ ವ್ಯಕ್ತಪಡಿಸಿದ್ದರು.
ಟ್ರಂಪ್ ಹೇಳಿದ್ದೇನು?
ಈ ವಿವಾದದ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಪ್ರತಿಕ್ರಿಯಿಸಿರುವ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, "ಅಮೆರಿಕವು ಭಯೋತ್ಪಾದಕರು ಮತ್ತು ಹಸನ್‌ನಂತಹ ಕಿಡಿಗೇಡಿಗಳನ್ನು ಹೇಗೆ ಶಿಕ್ಷಿಸುತ್ತದೆ ಎಂಬುದನ್ನು ಜಗತ್ತು ನೋಡಲು ಇದು ಪ್ರಬಲ ಸಂದೇಶವಾಗಬಹುದಿತ್ತು. ಆದರೆ, ಅನೇಕ ಸಜ್ಜನರು ಹಾಗೂ ಹಿತೈಷಿಗಳು ಈತ ಸಾಯುವುದನ್ನು ಲೈವ್‌ಸ್ಟ್ರೀಮ್ ಅಥವಾ ಯಾವುದೇ ಪರದೆಯ ಮೂಲಕ ನೋಡಲು ಇಷ್ಟಪಡುವುದಿಲ್ಲ" ಎಂದು ತಿಳಿಸಿದ್ದು, ನೇರಪ್ರಸಾರದ ಪ್ರಸ್ತಾಪವನ್ನು ಕೈಬಿಡಲಾಗಿದೆ ಎಂದಿದ್ದಾರೆ.
ಏನಿದು ಫೋರ್ಟ್ ಹುಡ್ ಘಟನೆ?
ಅಮೆರಿಕ ಸೇನಾ ಪಡೆಯ ವೈದ್ಯ ಹಾಗೂ ಮನೋವೈದ್ಯನಾಗಿದ್ದ ನಿದಾಲ್ ಹಸನ್, 2009ರ ನವೆಂಬರ್‌ನಲ್ಲಿ ಟೆಕ್ಸಾಸ್‌ನ ಫೋರ್ಟ್ ಹುಡ್ ಸೇನಾ ನೆಲೆಗೆ ನುಗ್ಗಿ ಗುಂಡಿನ ದಾಳಿ ನಡೆಸಿದ್ದನು. ಈ ಭೀಕರ ಕೃತ್ಯದಲ್ಲಿ 13 ಜನರು ಸಾವನ್ನಪ್ಪಿ, 30ಕ್ಕೂ ಹೆಚ್ಚು ಮಂದಿ ಗಂಭೀರವಾಗಿ ಗಾಯಗೊಂಡಿದ್ದರು. ಈ ಕೃತ್ಯಕ್ಕಾಗಿ 2013ರ ಮಿಲಿಟರಿ ನ್ಯಾಯಾಲಯವು ಆತನಿಗೆ ಮರಣದಂಡನೆ ಶಿಕ್ಷೆ ವಿಧಿಸಿತ್ತು. ಇದೀಗ ಆತನಿಗೆ ಫೈರಿಂಗ್ ಸ್ಕ್ವಾಡ್ ಮೂಲಕ ಶಿಕ್ಷೆ ಜಾರಿಯಾಗುವುದು ಖಚಿತವಾಗಿದ್ದರೂ, ಸಾರ್ವಜನಿಕ ಲೈವ್‌ಸ್ಟ್ರೀಮ್ ಮಾತ್ರ ಇರುವುದಿಲ್ಲ.
