ಬೆಂಗಳೂರಲ್ಲಿ ಗಗನಕ್ಕೇರಿದ ತರಕಾರಿ.! ರೇಟ್ ಎಷ್ಟು.?

 

ಬೆಂಗಳೂರು: ಸಿಲಿಕಾನ್ ಸಿಟಿಯ ಜನಸಾಮಾನ್ಯರಿಗೆ ಬೆಲೆ ಏರಿಕೆಯ ಬಿಸಿ ತಟ್ಟುತ್ತಿದೆ. ಕಳೆದ 15 ದಿನಗಳ ಅಂತರದಲ್ಲಿ ತರಕಾರಿ ಬೆಲೆಗಳು ಗಗನಕ್ಕೇರಿದ್ದು, ಗ್ರಾಹಕರ ಜೇಬಿಗೆ ಭಾರಿ ಕತ್ತರಿ ಬೀಳುತ್ತಿದೆ. ಕೇವಲ ಎರಡು ವಾರಗಳ ಹಿಂದೆ ಕೈಗೆಟುಕುವ ದರದಲ್ಲಿದ್ದ ತರಕಾರಿಗಳು ಈಗ ಕೊಳ್ಳಲಾಗದ ಮಟ್ಟಕ್ಕೆ ಬೆಲೆ ಏರಿಕೆ ಕಂಡಿವೆ.

ಬೀನ್ಸ್ ಬೆಲೆ ಕೇಳಿ ಬೆಚ್ಚಿಬಿದ್ದ ಜನ!

ಮಾರುಕಟ್ಟೆಯಲ್ಲಿ ಸದ್ಯ ಬೀನ್ಸ್ ದರ ಗ್ರಾಹಕರನ್ನು ಬೆಚ್ಚಿಬೀಳಿಸುತ್ತಿದೆ. 15 ದಿನಗಳ ಹಿಂದೆ ಪ್ರತಿ ಕೆಜಿಗೆ 60 ರೂಪಾಯಿ ಇದ್ದ ಬೀನ್ಸ್ ಬೆಲೆ ಈಗ ಬರೋಬ್ಬರಿ 160 ರೂಪಾಯಿಗೆ ತಲುಪಿದೆ. ಈ ಹಿಂದೆ 500 ರೂಪಾಯಿ ತಂದರೆ ಚೀಲ ತುಂಬಾ ತರಕಾರಿ ತರುತ್ತಿದ್ದ ಜನ, ಈಗ ಅಷ್ಟೇ ಹಣ ನೀಡಿದರೂ ಎರಡು ಪುಟ್ಟ ಬ್ಯಾಗ್ ತುಂಬಿಸಲು ಪರದಾಡುವಂತಾಗಿದೆ.

ಬೆಲೆ ಏರಿಕೆಗೆ ಪ್ರಮುಖ ಕಾರಣಗಳೇನು?

ಹವಾಮಾನ ವೈಪರೀತ್ಯ: ರಾಜ್ಯದಲ್ಲಿ ಸುಡುತ್ತಿರುವ ಬಿಸಿಲು ಮತ್ತು ಅಕಾಲಿಕ ಮಳೆಯಿಂದಾಗಿ ಬೆಳೆಗಳಿಗೆ ಭಾರಿ ಹಾನಿಯಾಗಿದೆ.

ಇಳುವರಿ ಕುಸಿತ: ಕೋಲಾರ, ಚಿಕ್ಕಬಳ್ಳಾಪುರ ಮತ್ತು ರಾಮನಗರದಲ್ಲಿ ಶಾಖದ ಅಲೆಗೆ ಹೂವುಗಳು ಉದುರಿ ಇಳುವರಿ ಕಡಿಮೆಯಾಗಿದೆ. ಮಾರುಕಟ್ಟೆಗೆ ಬರುತ್ತಿರುವ ತರಕಾರಿ ಪ್ರಮಾಣದಲ್ಲಿ ಶೇ. 30 ರಿಂದ 40ರಷ್ಟು ಇಳಿಕೆ ಕಂಡಿದೆ.

ಸೀಸನ್ ಎಫೆಕ್ಟ್: ಸಾಲು ಸಾಲು ಮದುವೆಗಳು ಮತ್ತು ಹಬ್ಬಗಳ ಸೀಸನ್ ಇರುವುದರಿಂದ ಬೇಡಿಕೆ ಹೆಚ್ಚಾಗಿ, ಪೂರೈಕೆ ಕಡಿಮೆಯಾಗಿದೆ.

ಸಾರಿಗೆ ವೆಚ್ಚ: ನೆರೆ ರಾಜ್ಯಗಳಿಂದ ಬರುವ ತರಕಾರಿಗಳ ಸಾರಿಗೆ ವೆಚ್ಚವು ದರ ಏರಿಕೆಗೆ ಪೂರಕವಾಗಿದೆ.

 

 

ತರಕಾರಿ ಹೆಸರು	ಪ್ರಸ್ತುತ ದರ (ರೂ.)	15 ದಿನಗಳ ಹಿಂದೆ (ರೂ.)	ದರ ಹೆಚ್ಚಳ (ರೂ.)
ಬೀನ್ಸ್	160 ರೂ.	60 ರೂ.	100 ರೂ.
ಕ್ಯಾರೆಟ್	60 ರೂ.	20 ರೂ.	40 ರೂ.
ಟೊಮೆಟೋ	50 ರೂ.	15 ರೂ.	35 ರೂ.
ಆಲೂಗಡ್ಡೆ	50 ರೂ.	15 ರೂ.	35 ರೂ.
ಬದನೆಕಾಯಿ	70 ರೂ.	30 ರೂ.	40 ರೂ.
ಬೆಂಡೆಕಾಯಿ	60 ರೂ.	25 ರೂ.	35 ರೂ.
ಎಲೆಕೋಸು	40 ರೂ.	15 ರೂ.	25 ರೂ.