अथणी येथील न्यायालयीन परिसरात मंगळवारी दुपारी घडलेल्या धक्कादायक घटनेमुळे संपूर्ण कोर्टात खळबळ उडाली. न्यायालयीन कामकाज सुरू असताना एका महिलेवर समोरच प्राणघातक हल्ल्याचा प्रयत्न झाल्याने परिस्थिती तणावपूर्ण बनली.
हल्ल्यात जखमी झालेल्या महिलेचे नाव मीनाक्षी रामचंद्र शिंदे (वय 50) असे असून, त्यांच्यावर स्थानिक दवाखान्यात उपचार सुरू आहेत. या प्रकरणात कोतनटी येथील बाबासाहेब चव्हाण याला पोलिसांनी तत्काळ ताब्यात घेतले.
प्राथमिक माहितीनुसार, मीनाक्षी आणि आरोपी बाबासाहेब यांच्यात गेल्या काही महिन्यांपासून संपत्ती संदर्भात गंभीर वाद सुरू होता. मंगळवारी सकाळी मीनाक्षी न्यायालयात आल्या असताना आरोपीने त्यांचा पाठलाग केला.
जीव वाचवण्यासाठी त्या कोर्ट हॉलमध्ये धावत गेल्या; मात्र आरोपीने न्यायालयीन कक्षातच कुऱ्हाडीने हल्ला करण्याचा प्रयत्न केला. हा प्रकार प्रधान दिवाणी न्यायाधीशांच्या समोरच घडल्याने सर्वत्र भीती और आश्चर्य यांचे वातावरण निर्माण झाले.
घटनेनंतर सुरक्षा व्यवस्थेवरही अनेक प्रश्नचिन्हे निर्माण झाली असून, कोर्टातील सुरक्षेबाबत चिंता व्यक्त केली जात आहे. पोलिसांनी आरोपीला ताब्यात घेऊन पुढील चौकशी सुरू केली आहे.
