बेळगांव:स्कायवर्ल्ड एव्हिएशन हॉस्पिटॅलिटी अकॅडमी, बेळगाव येथे दिनांक ८ जानेवारी २०२६ रोजी आयोजित करण्यात आलेला ‘F3 – Fun Food Fest’ हा उपक्रम उत्साहात आणि मोठ्या प्रतिसादात पार पडला. विद्यार्थ्यांनी साकारलेल्या या अनोख्या महोत्सवात भारतातील विविध राज्यांची समृद्ध संस्कृती, पारंपरिक खाद्यपरंपरा आणि लोककला प्रभावीपणे मांडण्यात आली.
या फूड फेस्टमध्ये कर्नाटक, गुजरात, महाराष्ट्र आणि पंजाब या राज्यांचे प्रतिनिधित्व करणारे आकर्षक स्टॉल्स उभारण्यात आले होते. प्रत्येक स्टॉलवर त्या-त्या राज्यातील पारंपरिक पदार्थ, हस्तकला, वेशभूषा आणि सांस्कृतिक वैशिष्ट्ये सादर करण्यात आली. विद्यार्थ्यांनी पाहुण्यांना केवळ पदार्थच नव्हे तर त्या मागील इतिहास, परंपरा आणि संस्कृतीची माहितीही समजावून सांगितली.
कार्यक्रमादरम्यान पारंपरिक संगीत, लोकनृत्ये आणि सांस्कृतिक सादरीकरणांनी उपस्थितांची मने जिंकली. या उपक्रमाचा मुख्य उद्देश विद्यार्थ्यांमध्ये संघभावना, नेतृत्वगुण, संवाद कौशल्य आणि सांस्कृतिक जाणीव विकसित करणे हा होता, जो यशस्वीपणे साध्य झाल्याचे चित्र दिसून आले.
स्कायवर्ल्ड एव्हिएशन हॉस्पिटॅलिटी अकॅडमीच्या या उपक्रमाचे पालक, पाहुणे आणि शहरातील नागरिकांकडून कौतुक करण्यात आले. अशा प्रकारचे उपक्रम विद्यार्थ्यांच्या सर्वांगीण विकासासाठी महत्त्वाचे ठरत असल्याचे मत अनेक मान्यवरांनी व्यक्त केले.
