मुलीच्या शिक्षणासाठी आईची धडपड; आधार कार्डासाठी कारागृहाचे उंबरठे झिजले

बेळगाव | प्रतिनिधी
एका लहान मुलीच्या शिक्षणासाठी आवश्यक असलेले कागदपत्र मिळविण्यासाठी एका महिलेची सुरू असलेली संघर्षमय धडपड सध्या चर्चेचा विषय ठरत आहे. गदग जिल्ह्यातील ही महिला आपल्या पतीचे आधार कार्ड मिळवण्यासाठी बेळगावच्या हिंडलगा मध्यवर्ती कारागृहाचे उंबरठे झिजवत आहे.
मिळालेल्या माहितीनुसार, संबंधित महिलेने समाजाचा विरोध पत्करून आंतरधर्मीय विवाह केला होता. दाम्पत्याला दोन मुली झाल्या. मात्र कौटुंबिक वादातून मोठ्या मुलीच्या हत्येप्रकरणी पतीला न्यायालयाने दोषी ठरवत शिक्षा सुनावली असून तो सध्या हिंडलगा कारागृहात शिक्षा भोगत आहे.
दरम्यान, दुसऱ्या मुलीच्या शालेय प्रवेशासाठी आणि आवश्यक शासकीय नोंदी पूर्ण करण्यासाठी वडिलांच्या आधार कार्डाची आवश्यकता निर्माण झाली आहे. त्यासाठी संबंधित महिला गदगहून बेळगावला येऊन कारागृह प्रशासनाशी संपर्क साधत आहे. मात्र आवश्यक कागदपत्र मिळविण्याच्या प्रक्रियेत तिला अनेक अडचणींचा सामना करावा लागत असल्याची माहिती समोर आली आहे.
या महिलेची मागणी पतीची सुटका नसून, केवळ मुलीच्या भवितव्यासाठी आवश्यक असलेले आधार कार्ड मिळावे, एवढीच आहे. मुलीचे शिक्षण कोणत्याही अडथळ्याशिवाय सुरू राहावे, अशी तिची अपेक्षा आहे.
या प्रकरणात कायदेशीर प्रक्रियेनुसार संबंधित कागदपत्र उपलब्ध करून देण्यासाठी प्रशासनाकडून कोणती भूमिका घेतली जाते, याकडे आता लक्ष लागले आहे.

Also read

*ज्योती सेंट्रल स्कूलच्या फुटबॉल संघाचा दिमाखदार विजय!*