बेळगाव डिस्टिक बॉडी बिल्डिंग असोसिएशनची पहिली वार्षिक सभा उत्साहात

बेळगाव : बेळगाव डिस्टिक बॉडी बिल्डिंग असोसिएशन अँड स्पोर्ट्सची पहिली वार्षिक सर्वसाधारण सभा क्लब रोड येथील डॉ. संजय अण्णा सुंठकर यांच्या कार्यालयात उत्साहपूर्ण वातावरणात पार पडली. या बैठकीत आगामी शरीरसौष्ठव स्पर्धांचे नियोजन, संघटनेच्या वार्षिक कामकाजाचा आढावा आणि विविध महत्त्वपूर्ण विषयांवर चर्चा करण्यात आली.
बैठकीला प्रमुख पाहुणे म्हणून दलित नेते मल्लेश चौगुले, विकास कलघटगी आणि डॉ. संजय सुंठकर उपस्थित होते. संघटनेचे अध्यक्ष महेश सातपुते यांच्यासह अनिल अबरोळे, राजेश लोहार, नारायण चौगुले, भरत बाळेकुंद्री, सुनील चौधरी, चेतन तहसीलदार, विनोद मैत्री, प्रवीण कंबरकर, विजय चौगुले, बाबू पावशे, श्रीधर बारटक्के, दीपक कित्तूरकर, सोमनाथ हलगेकर, राजू पाटील, संतोष सुतार, आनंद आपटेकर, रोनक गवस, श्रीहरी बेळगावकर, संकेत सांब्रेकर, मोहन कंग्राळकर, उद्योगपती सुरेश तळवार, संदीप कोलकार आणि समाजसेवक गणेश दड्डीकर यांच्यासह अनेक व्यायामपटू उपस्थित होते.
23 सप्टेंबरला ‘जय गणेश श्री 2026’ स्पर्धा
या वार्षिक बैठकीत 23 सप्टेंबर 2026 रोजी ‘जय गणेश श्री 2026’ शरीरसौष्ठव स्पर्धा आयोजित करण्याचा महत्त्वपूर्ण निर्णय घेण्यात आला. स्पर्धेमुळे बेळगाव जिल्ह्यातील उदयोन्मुख शरीरसौष्ठवपटूंना आपली प्रतिभा सादर करण्यासाठी मोठे व्यासपीठ उपलब्ध होणार आहे.
‘जय गणेश श्री 2026’ किताब पटकावणाऱ्या विजेत्यास डॉ. संजय सुंठकर फाउंडेशनच्या वतीने 25 हजार रुपयांचे रोख पारितोषिक देण्याची घोषणा करण्यात आली. तसेच चेतन तहसीलदार यांच्या फ्लेक्स जिमच्या वतीने विजेत्यास सायकल भेट देण्यात येणार आहे.
नोव्हेंबर-डिसेंबरमध्ये ‘जय भीम क्लासिक कप’
बैठकीदरम्यान दलित नेते मल्लेश चौगुले यांनी आगामी नोव्हेंबर ते डिसेंबर 2026 या कालावधीत जिल्हास्तरीय ‘जय भीम क्लासिक कप’ शरीरसौष्ठव स्पर्धा आयोजित करण्याचा निर्णय जाहीर केला.
वार्षिक सर्वसाधारण सभेत संघटनेचा वार्षिक अहवालही वाचून दाखवण्यात आला. संघटनेच्या पुढील वाटचालीसंदर्भात विविध मुद्द्यांवर सकारात्मक चर्चा करण्यात आली. उपस्थित सदस्यांनी शरीरसौष्ठव आणि क्रीडा क्षेत्राच्या विकासासाठी एकत्रितपणे काम करण्याचा निर्धार व्यक्त केला.
खेळीमेळीच्या आणि उत्साहपूर्ण वातावरणात बेळगाव डिस्टिक बॉडी बिल्डिंग असोसिएशन अँड स्पोर्ट्सची पहिली वार्षिक सर्वसाधारण सभा संपन्न झाली.

Also read

*ज्योती सेंट्रल स्कूलच्या फुटबॉल संघाचा दिमाखदार विजय!*