ಸಿಗರೇಟ್ ಹಾಗೂ ಮದ್ಯಪಾನ ಆರೋಗ್ಯಕ್ಕೆ ಹಾನಿಕರ ಮತ್ತು ಇವು ವ್ಯಕ್ತಿಯ ಆಯುಷ್ಯವನ್ನು ಕುಗ್ಗಿಸುತ್ತವೆ ಎಂಬುದು ಎಲ್ಲರಿಗೂ ತಿಳಿದಿರುವ ಸತ್ಯ. ಆದರೆ, ಧೂಮಪಾನ ಅಥವಾ ಮದ್ಯಪಾನಕ್ಕಿಂತಲೂ ಅತ್ಯಂತ ವೇಗವಾಗಿ ಮತ್ತು ನಿಶ್ಯಬ್ದವಾಗಿ ಮನುಷ್ಯನ ಜೀವ ತೆಗೆಯಬಲ್ಲ ಮತ್ತೊಂದು ಪ್ರಮುಖ ಅಂಶವಿದೆ ಎಂದು ಮುಂಬೈನ ಪ್ರಸಿದ್ಧ ಮೂಳೆ ಶಸ್ತ್ರಚಿಕಿತ್ಸಕ (Orthopaedic Surgeon) ಹಾಗೂ ಆರೋಗ್ಯ ಶಿಕ್ಷಣತಜ್ಞ ಡಾ. ಮನನ್ ವೋರಾ ಎಚ್ಚರಿಸಿದ್ದಾರೆ.
ಡಾ. ಮನನ್ ವೋರಾ ಅವರ ಪ್ರಕಾರ, ಧೂಮಪಾನ ಅಥವಾ ಮದ್ಯಸೇವನೆಗಿಂತಲೂ ಹೆಚ್ಚು ಅಪಾಯಕಾರಿಯಾದ ಆ ಒಂದೇ ಒಂದು ಅಂಶ ಎಂದರೆ ಅದು ‘ತೀವ್ರವಾದ ಮಾನಸಿಕ ಒತ್ತಡ’ (Chronic Stress).
ದೇಹದ ಮೇಲೆ ಸೈಲೆಂಟ್ ಕಿಲರ್ ಒತ್ತಡದ ಪ್ರಭಾವ:
"ಅನೇಕರು ಮದ್ಯಪಾನ ಮತ್ತು ಸಿಗರೇಟ್ಗೆ ಹೆದರುತ್ತಾರೆ, ಆದರೆ ದಿನನಿತ್ಯದ ತೀವ್ರ ಮಾನಸಿಕ ಒತ್ತಡವನ್ನು ನಿರ್ಲಕ್ಷಿಸುತ್ತಾರೆ. ನಿರಂತರ ಒತ್ತಡಕ್ಕೆ ಒಳಗಾದಾಗ ನಮ್ಮ ದೇಹವು ಕಾರ್ಟಿಸೋಲ್ (Cortisol) ಮತ್ತು ಅಡ್ರಿನಾಲಿನ್ (Adrenaline) ನಂತಹ ಹಾರ್ಮೋನ್ಗಳನ್ನು ಅತಿಯಾಗಿ ಬಿಡುಗಡೆ ಮಾಡುತ್ತದೆ. ಇದು ಕೇವಲ ಮಾನಸಿಕ ಸಮಸ್ಯೆಯಾಗಿ ಉಳಿಯದೆ, ಸಂಪೂರ್ಣ ಶರೀರದ ಜೈವಿಕ ಕ್ರಿಯೆಗಳ ಮೇಲೆ ಗಂಭೀರ ಪರಿಣಾಮ ಬೀರುತ್ತದೆ" ಎಂದು ಡಾ. ವೋರಾ ವಿವರಿಸಿದ್ದಾರೆ.
ದೇಹ ನೀಡುವ ಅಪಾಯದ ಮುನ್ಸೂಚನೆಗಳು:
ಮಾನಸಿಕ ಒತ್ತಡ ಹೆಚ್ಚಾದಾಗ ದೇಹವು ಕೆಲವು ಸ್ಪಷ್ಟ ಲಕ್ಷಣಗಳ ಮೂಲಕ ಮುನ್ಸೂಚನೆ ನೀಡುತ್ತದೆ:
-
ಬೆನ್ನು ನೋವು ಮತ್ತು ಹೆಗಲ ಭಾಗದಲ್ಲಿ ಬಿಗಿತ (Tight shoulders)
-
ಮಾನಸಿಕ ಉದ್ವೇಗದಿಂದ ಬರುವ ತಲೆನೋವು (Tension headaches)
-
ಸ್ನಾಯುಗಳಲ್ಲಿ ಗಂಟುಗಳು ಅಥವಾ ನೋವು
-
ನಿದ್ರೆಯಲ್ಲಿ ಹಲ್ಲು ಕಡಿಯುವುದು (Grinding teeth)
ನಿದ್ರೆಯ ಕೊರತೆಯಿಂದ ಮತ್ತಷ್ಟು ಆಪತ್ತು:
ಒತ್ತಡದ ಜೊತೆಗೆ ದಿನಕ್ಕೆ ಅಗತ್ಯವಿರುವ 7ರಿಂದ 8 ಗಂಟೆಗಳ ಗಾಢ ನಿದ್ರೆ (Restorative Sleep) ಸಿಗದಿದ್ದರೆ ಈ ಸಮಸ್ಯೆ ಮತ್ತಷ್ಟು ಗಂಭೀರ ಸ್ವರೂಪ ಪಡೆಯುತ್ತದೆ. "ಪ್ರತಿದಿನದ ಒತ್ತಡವನ್ನು ಕಡಿಮೆ ಮಾಡಲು ಮತ್ತು ದೇಹದ ಕೋಶಗಳು ಪುನಶ್ಚೇತನಗೊಳ್ಳಲು ಗಾಢ ನಿದ್ರೆ ಅತ್ಯಗತ್ಯ. ಸರಿಯಾದ ನಿದ್ರೆ ಇಲ್ಲದಿದ್ದಾಗ ನಿನ್ನೆ ಉಳಿದುಕೊಂಡ ಒತ್ತಡದ ಜೊತೆಗೆ ಇಂದಿನ ಒತ್ತಡವೂ ಸೇರಿ ದೇಹದ ಅಂಗಾಂಗಗಳ ಮೇಲೆ ಸವಕಳಿ ಉಂಟುಮಾಡುತ್ತದೆ" ಎಂದು ಅವರು ತಿಳಿಸಿದ್ದಾರೆ.
ಆದ್ದರಿಂದ ಧೂಮಪಾನ, ಮದ್ಯಪಾನದಷ್ಟೇ ಅಪಾಯಕಾರಿಯಾದ ಮಾನಸಿಕ ಒತ್ತಡವನ್ನು ನಿರ್ ನಿರ್ಲಕ್ಷಿಸದೆ, ಸರಿಯಾದ ಸಮಯಕ್ಕೆ ವಿಶ್ರಾಂತಿ ಪಡೆಯುವುದು, ಉತ್ತಮ ನಿದ್ರೆ ಹಾಗೂ ಒತ್ತಡ ನಿರ್ವಹಣೆಗೆ ಆದ್ಯತೆ ನೀಡುವುದು ಆರೋಗ್ಯಕರ ಜೀವನಕ್ಕೆ ಅತ್ಯಗತ್ಯ ಎಂದು ವೈದ್ಯರು ಸಲಹೆ ನೀಡಿದ್ದಾರೆ.
