ಕೃತಕ ಬುದ್ಧಿಮತ್ತೆಯು (AI) ಉದ್ಯೋಗ ಕಡಿತಗೊಳಿಸುತ್ತಿದೆ ಎಂಬ ಆತಂಕದ ನಡುವೆಯು, ಭಾರತದಲ್ಲಿ ಎಐ ಉದ್ಯೋಗ ಕಡಿತಕ್ಕಿಂತ ಹೆಚ್ಚಿನ ಪ್ರಮಾಣದಲ್ಲಿ ಹೊಸ ಉದ್ಯೋಗಗಳನ್ನು ಸೃಷ್ಟಿಸುತ್ತಿದೆ ಎಂದು ನೋಮುರಾ (Nomura) ವರದಿ ತಿಳಿಸಿದೆ.
ದಾಖಲಾದ 31,921 ಉದ್ಯೋಗ ನಷ್ಟ ಹಾಗೂ ಉದ್ಯೋಗಿDಗಳ ನಿರ್ಗಮನಕ್ಕೆ ಹೋಲಿಸಿದರೆ, ಎಐ ನೇಮಕಾತಿಯು 83,100 ತಲುಪಿದೆ. ಈ ಸಂಶೋಧನೆಯು ಎಐ ನಿಂದ ಭಾರತದ ಉದ್ಯೋಗ ಮಾರುಕಟ್ಟೆಯ ಮೇಲೆ ಸಕಾರಾತ್ಮಕ ಪರಿಣಾಮ ಬೀರುತ್ತಿದೆ ಎಂಬುದನ್ನು ಎತ್ತಿ ತೋರಿಸುತ್ತದೆ. ಆದರೆ, ಇದು ಸಾಂಪ್ರದಾಯಿಕ ಪಾತ್ರಗಳಿಗೆ ಹಾನಿ ಮಾಡುತ್ತಿದ್ದು, ಪ್ರವೇಶ ಹಂತದ (ಎಂಟ್ರಿ-ಲೆವೆಲ್) ಕಾರ್ಮಿಕರ ಬೇಡಿಕೆಯನ್ನು ತಗ್ಗಿಸುತ್ತಿದೆ.
ತನ್ನ ಏಷ್ಯಾ ಎಕನಾಮಿಕ್ ಮಂತ್ಲಿ ವರದಿಯಲ್ಲಿ, ಭಾರತವು ಉದ್ಯೋಗ ಸೃಷ್ಟಿ ಹಾಗೂ ಉದ್ಯೋಗ ಕಡಿತ ಎರಡರಲ್ಲೂ ಮುಂಚೂಣಿಯಲ್ಲಿದ್ದು, ಎಐ ನಿಂದ ಏಷ್ಯಾದಲ್ಲೇ ಅತಿ ದೊಡ್ಡ ಪ್ರಭಾವಕ್ಕೆ ಒಳಗಾಗುತ್ತಿದೆ ಎಂದು ನೋಮುರಾ ಹೇಳಿದೆ. ಭಾರತದ ಜನಸಂಖ್ಯೆ ಮತ್ತು ಜಾಗತಿಕ ಬ್ಯಾಕ್-ಆಫೀಸ್ ಹಬ್ ಆಗಿರುವ ಸ್ಥಾನವು ಎಐ ಪ್ರಭಾವವನ್ನು ಪರೀಕ್ಷಿಸಲು ಪ್ರಮುಖ ಮಾರುಕಟ್ಟೆಯನ್ನಾಗಿ ಮಾಡಿದೆ. ಏಷ್ಯಾದ ಆರ್ಥಿಕತೆಗಳಲ್ಲಿ ಸೃಷ್ಟಿಯಾದ ಸುಮಾರು 1.31 ಲಕ್ಷ ಎಐ-ಸಂಬಂಧಿತ ಉದ್ಯೋಗಗಳಲ್ಲಿ 83,100 ಭಾರತದಲ್ಲೇ ಇವೆ ಎಂದು ನೋಮುರಾ ದತ್ತಾಂಶವು ತೋರಿಸಿದೆ. ಮತ್ತೊಂದೆಡೆ, ಸಮೀಕ್ಷೆ ನಡೆಸಿದ ದೇಶಗಳ ಪೈಕಿ ಭಾರತದಲ್ಲೇ ಅತಿ ಹೆಚ್ಚು ಅಂದರೆ 31,921 ಎಐ-ಸಂಬಂಧಿತ ಉದ್ಯೋಗ ಕಡಿತಗಳು ದಾಖಲಾಗಿವೆ. ಒಟ್ಟಾರೆ ನೇಮಕಾತಿಯು ಉದ್ಯೋಗ ನಷ್ಟವನ್ನು ಮೀರಿದ್ದರೂ, ಈ ಲಾಭವು ಎಲ್ಲಾ ಕಾರ್ಮಿಕರಿಗೆ ಸಮಾನವಾಗಿ ಹಂಚಿಕೆಯಾಗಿಲ್ಲ.
ಕಂಪನಿಗಳು ದಿನನಿತ್ಯದ ಸಾಂಪ್ರದಾಯಿಕ ಕೆಲಸಗಳನ್ನು ಸ್ವಯಂಚಾಲಿತಗೊಳಿಸುತ್ತಿರುವುದರಿಂದ, ಬ್ಯಾಂಕಿಂಗ್ ಬ್ಯಾಕ್-ಆಫೀಸ್ ಕಾರ್ಯಾಚರಣೆಗಳು, ಗ್ರಾಹಕ ಸೇವೆ ಮತ್ತು ಗುಣಮಟ್ಟ ಪರೀಕ್ಷೆ ಹಾಗೂ ಕೋಡಿಂಗ್ನಂತಹ ಜೂನಿಯರ್ ತಾಂತ್ರಿಕ ಪಾತ್ರಗಳು ಎಐ ನಿಂದ ಸ್ಥಳಾಂತರಗೊಳ್ಳುತ್ತಿವೆ. ಶೇಕಡಾ 55 ರಷ್ಟು ಕಂಪನಿಗಳು ಪ್ರವೇಶ ಹಂತದ ನೇಮಕಾತಿಯಲ್ಲಿ ಕುಸಿತವನ್ನು ವರದಿ ಮಾಡಿವೆ ಎಂದು ಐಸಿಆರ್ಐಇಆರ್ (ICRIER) ಸಮೀಕ್ಷೆ ತಿಳಿಸಿದೆ. ನೇರವಾಗಿ ಉದ್ಯೋಗದಿಂದ ತೆಗೆದುಹಾಕುವುದಕ್ಕಿಂತ ಕ್ಯಾಂಪಸ್ ನೇಮಕಾತಿಯನ್ನು ತಗ್ಗಿಸುವ ಮೂಲಕ ನೇಮಕಾತಿ ಪ್ರಕ್ರಿಯೆಯನ್ನು ನಿಧಾನಗೊಳಿಸಲಾಗುತ್ತಿದೆ. ಹೊಸ ಎಐ-ಸಂಬಂಧಿತ ಉದ್ಯೋಗಗಳಲ್ಲಿ ಶೇಕಡಾ 90 ಕ್ಕಿಂತ ಹೆಚ್ಚು ತಂತ್ರಜ್ಞಾನ ವಲಯದಲ್ಲೇ ಕೇಂದ್ರೀಕೃತವಾಗಿವೆ ಎಂದು ನೋಮುರಾ ತಿಳಿಸಿದೆ.
