जयपूर : राजस्थानची राजधानी जयपूर येथे झालेल्या ५८ व्या वरिष्ठ राष्ट्रीय शरीरसौष्ठव स्पर्धेत उत्तर प्रदेशच्या अभय कश्यप याने ‘मिस्टर इंडिया २०२६’चा चॅम्पियन ऑफ चॅम्पियन्स हा प्रतिष्ठेचा किताब पटकावला. तसेच गुजरातमधील वापी येथील मनीष सरोज याने पुरुष फिजिक्स प्रकारात ‘चॅम्पियन ऑफ चॅम्पियन्स २०२६’ हा किताब जिंकला.
इंडियन बॉडी बिल्डिंग फेडरेशनच्या वतीने आयोजित ही स्पर्धा जयपूरमधील निर्मला ऑडिटोरियम हॉल येथे पार पडली. या स्पर्धेत देशातील विविध राज्यांमधील शरीरसौष्ठवपटूंनी सहभाग घेतला. एकूण नऊ वजनगटांत झालेल्या या स्पर्धेत सुमारे १८० स्पर्धकांनी आपले कौशल्य आणि शरीरसौष्ठवाचे प्रदर्शन केले.
अभय कश्यप याने प्रतिस्पर्ध्यांवर मात करत ‘मिस्टर इंडिया २०२६’चा सर्वोच्च किताब आपल्या नावावर केला. तर मनीष सरोज याने पुरुष फिजिक्स प्रकारात उत्कृष्ट कामगिरी करत चॅम्पियन ऑफ चॅम्पियन्सचा मान मिळवला.
या स्पर्धेच्या आयोजनासाठी जयपूरमधील फिट लीग फिटनेस इक्विपमेंट यांनी पुढाकार घेतला. राजस्थान शरीरसौष्ठव संघटनेचे सचिव शिवराम थापा यांनीही स्पर्धेच्या आयोजनासाठी विशेष परिश्रम घेतले.
स्पर्धेच्या परीक्षक मंडळात इंडियन बॉडी बिल्डिंग फेडरेशनचे सचिव सुरेश कदम यांच्यासह बलबीर सिंग, अनिल अंबरोळे, मनोरंजन लोलिता, भावेश, अमरदीप, दिलीप मेंडिस, दर्शन, डॉ. बी. पी. रेड्डी, के. जी. राव, जोग किरण, रूपक विश्वास, टी. रामू, गुरुनाथ, मनोरंजन शर्मा आदींनी काम पाहिले.
या राष्ट्रीय स्पर्धेमुळे देशातील शरीरसौष्ठवपटूंना आपले कौशल्य दाखवण्याची संधी मिळाली. अभय कश्यप आणि मनीष सरोज यांच्या किताबविजेतेपदामुळे शरीरसौष्ठव क्षेत्रात त्यांच्या कामगिरीची विशेष दखल घेतली जात आहे.
