कुलूप तोडून दागिने लंपास करणारा आरोपी पोलिसांच्या जाळ्यात
बेळगाव ग्रामीण परिसरातील शिंदोळी गावात घडलेल्या घरफोडी प्रकरणाचा मारिहाळ पोलिसांनी यशस्वी छडा लावत सराईत चोरट्याला अटक केली आहे. या कारवाईत पोलिसांनी सुमारे 23 लाख रुपये किमतीचे सोन्या-चांदीचे दागिने जप्त केले आहेत.
मारिहाळ पोलीस ठाण्याच्या हद्दीतील शिंदोळी गावातील महालक्ष्मीपूरम नगर येथे 10 मे 2026 रोजी बंद घराचे कुलूप तोडून चोरट्यांनी घरात प्रवेश केला होता. घरातील बेडरूममधील ट्रेझरीत ठेवलेले सुमारे 42 ग्रॅम सोन्याचे दागिने चोरीला गेले होते. याप्रकरणी मारिहाळ पोलीस ठाण्यात गुन्हा दाखल करण्यात आला होता.
दरम्यान, ग्रामीण भागात वाढत्या घरफोडीच्या घटनांच्या पार्श्वभूमीवर पोलिसांनी विशेष तपास पथक स्थापन करून तपास सुरू केला. 25 मे रोजी शिंदोळी गावातील इंडाल नगर परिसरात पोलिस पथक गस्त घालत असताना खांद्यावर बॅग घेऊन संशयास्पद हालचाल करणारा एक युवक पोलिसांच्या नजरेस पडला. चौकशीदरम्यान त्याने उडवाउडवीची उत्तरे दिल्याने पोलिसांनी अधिक तपास केला असता त्याने शिंदोळी येथील घरफोडीची कबुली दिली.
अटक करण्यात आलेल्या आरोपीचे नाव विश्वनाथ दुर्गप्पा मुत्तूर (वय 26, रा. बागलकोट जिल्हा) असे असून तो सराईत घरफोड्या असल्याचे तपासात समोर आले आहे. त्याच्यावर मारिहाळ पोलीस ठाण्यातील तीन तसेच काकती पोलीस ठाण्यातील एका घरफोडी प्रकरणाचा गुन्हा दाखल असल्याची माहिती पोलिसांनी दिली.
पोलिसांनी आरोपीकडून सुमारे 134 ग्रॅम सोन्याचे दागिने आणि 510 ग्रॅम चांदीचे दागिने असा एकूण अंदाजे 23 लाख रुपयांचा मुद्देमाल जप्त केला आहे. आरोपीला न्यायालयासमोर हजर करण्यात आले.
ही कारवाई पोलीस आयुक्तांच्या मार्गदर्शनाखाली मारिहाळ पोलीस ठाण्याच्या अधिकाऱ्यांनी आणि तांत्रिक तसेच फिंगरप्रिंट विभागाच्या पथकाने संयुक्तरीत्या पार पाडली. उत्कृष्ट कामगिरीबद्दल संबंधित पोलिस अधिकारी व कर्मचाऱ्यांचे वरिष्ठांकडून कौतुक करण्यात आले.
