यात्रेच्या पार्श्वभूमीवर गावात उत्साहाचे वातावरण पसरले असून घराघरांमध्ये स्वच्छता, सजावट आणि स्वागताची तयारी सुरू आहे. मंगळवारी दुपारी ११ वाजता पारंपरिक वाद्यांच्या गजरात हक्कदार घराण्याकडून देवीचा मुखवटा यात्रास्थळी आणला जाणार आहे. त्यानंतर पुजारी व सुहासिनींच्या हस्ते विधीवत पूजन करून मसणाई देवीच्या मूर्तीची प्रतिष्ठापना होईल.
सायंकाळी नैवेद्यानंतर पहिला गाऱ्हाणा आयोजित करण्यात येणार असून रात्री उशिरापर्यंत भक्तांना देवीचे दर्शन मिळणार आहे. ओटी पूर्ण झाल्यानंतर इतर सुहासिनी ओटी भरण्याचा विधी करू शकतील.
बुधवारी सकाळी ९ वाजता दुसरा गाऱ्हाणा तसेच एकत्रित गाऱ्हाणा पार पडेल. त्यानंतर इंगळा कार्यक्रमाचे आयोजन आहे. दिवसभर सुहासिनींना ओटी भरणे व दर्शन यासाठी विशेष व्यवस्था करण्यात आली आहे.
यात्रेनिमित्त गावात खेळणी, प्रसाद, ओटीचे साहित्य, खाद्यपदार्थ, पाळणे यांसह विविध स्टॉल्स सजू लागले आहेत. अपेक्षित गर्दी लक्षात घेऊन परिसरात सीसीटीव्ही कॅमेरे, पोलीस अधिकारी व स्वयंसेवक तैनात राहणार आहेत. यात्रेदरम्यान शांतता, सुव्यवस्था आणि पारंपरिक उत्साह राखण्यासाठी समितीने सर्व भाविकांना सहकार्याचे आवाहन केले आहे.
