स्थानिक क्रीडापटूंना आपल्या क्रीडा कौशल्यांचे प्रदर्शन करता यावे, यासाठी गोकाक येथील वाल्मीकी क्रीडांगणात आवश्यक मूलभूत सुविधा उपलब्ध करून देत त्याचा विकास करण्यात आला असल्याचे प्रतिपादन सार्वजनिक बांधकाम मंत्री सतीश जारकीहोळी यांनी केले.
गोकाक शहरातील वाल्मीकी क्रीडांगणात के.बी. ग्रुपच्या वतीने आयोजित करण्यात आलेल्या २०२५-२६ च्या श्री. लक्ष्मणराव आर. जारकीहोळी मेमोरियल स्मारक क्रिकेट ट्रॉफीच्या उद्घाटनप्रसंगी ते बोलत होते.
सतीश जारकीहोळी म्हणाले की, प्रत्येक स्थानिक क्रीडापटूला बेंगळुरूसारख्या मोठ्या शहरांत जाऊन खेळणे शक्य होत नाही. त्यामुळे शहरांमध्ये उपलब्ध असलेल्या सुविधा तालुका स्तरावरच कमी खर्चात मिळाव्यात, या उद्देशाने वाल्मीकी क्रीडांगणात प्रकाशव्यवस्था (लाईटिंग सिस्टीम) उभारण्यात आली आहे. याशिवाय बेळगाव येथे सुमारे ५० कोटी रुपयांच्या खर्चातून अत्याधुनिक क्रीडांगणाचे काम सुरू आहे, अशी माहितीही त्यांनी दिली.
पूर्वी गोकाकमध्ये प्रामुख्याने क्रिकेटलाच प्राधान्य दिले जात होते. मात्र आता काळ बदलत असून, सर्व प्रकारच्या खेळांना समान संधी देण्याचा शासनाचा प्रयत्न असल्याचेही त्यांनी स्पष्ट केले.
या कार्यक्रमास विधानपरिषद सदस्य लखन जारकीहोळी, कर्नाटक राज्य क्रिकेट संघटनेचे धारवाड विभागीय संयोजक वीरन्ना सवडी, बीडीसीसी बँक प्रतिनिधी, केपीसीसी युवा आघाडीचे सरचिटणीस राहुल जारकीहोळी, आदित्य जारकीहोळी, किशोर शेट्टी, बसवराज कल्याण शेट्टी, हिरगौडा नाईकर, शिवानंद गुंजाळ, अनिल भवानी, शिशिर भवानी यांच्यासह अनेक मान्यवर उपस्थित होते.
क्रिकेट ट्रॉफीच्या उद्घाटनावेळी मंत्री सतीश जारकीहोळी यांनी स्वतः फलंदाजी केली, तर त्यांचे बंधू लखन जारकीहोळी यांनी गोलंदाजी करत उपस्थित प्रेक्षकांचे विशेष लक्ष वेधून घेतले.
