कंग्राळी बी.के. गावातून तीन वर्षांतून एकदा निघणारी पारंपरिक फरशी आज बुधवार, दि. 31 डिसेंबर रोजी मोठ्या भक्तिभावात व उत्साहात सौंदत्ती येथील श्री रेणुका यल्लम्मा देवीच्या यात्रेसाठी रवाना झाली.
या यात्रेसाठी गावातील रेणुका भक्त महिला भगिनींसह ग्रामस्थांनी मोठ्या संख्येने सहभाग नोंदवला. ठरल्याप्रमाणे सकाळी चव्हाटा सर्कल येथून यात्रेची सुरुवात करण्यात आली. यावेळी कलमेश्वर मंदिर, लक्ष्मी मंदिर, गणपती मंदिर तसेच लक्ष्मी पावले असलेल्या स्थळांवर विधीपूर्वक पूजा, कापूर आरती व उद्गार घालून धार्मिक परंपरेनुसार देवांना पाणी ठेवण्याचा विधी पार पाडण्यात आला.
या भक्तिमय सोहळ्याला देवस्थान पंच कमिटीचे अध्यक्ष मारुती पाटील, मल्लाप्पा पाटील, यल्लाप्पा हारजे, बाळू पाटील, राजू चव्हाण, महादेव पाटील, राजू तलवार यांच्यासह देवस्थान पंच समिती, देवस्थान सेवा समिती, लक्ष्मी उत्सव कमिटी तसेच ग्रामपंचायत सदस्यांची उपस्थिती लाभली.
लक्ष्मी उत्सव कमिटीचे अध्यक्ष जयराम पाटील, सदस्य अनिल पावशे, नवनाथ पुजारी, उमेश पाटील, दत्ता पाटील , नेताजी पाटील आदींसह अनेक ग्रामस्थ या प्रसंगी सहभागी झाले होते.
देवस्थान पंच कमिटी व ग्रामस्थांच्या वतीने देण्यात आलेल्या माहितीनुसार, शनिवार दि. 3 जानेवारी (पौर्णिमा) रोजी सर्व भाविक सौंदत्ती येथे एकत्र पडल्या भरण्याचा कार्यक्रम, तर मंगळवार दि. 6 जानेवारी रोजी गावात परतल्यानंतर कंग्राळी बी.के. येथे पारंपरिक पडल्या भरणे जत्रोत्सवाचे आयोजन करण्यात येणार आहे.
ही यात्रा गावाच्या श्रद्धा, परंपरा व एकात्मतेचे दर्शन घडविणारी ठरत असून संपूर्ण परिसरात भक्तीमय वातावरण निर्माण झाले आहे.
