बेळगाव | प्रतिनिधी
राज्याचे पोलीस महासंचालक अलोककुमार यांनी मंगळवारी बेळगावातील हिंडलगा मध्यवर्ती कारागृह येथे अचानक भेट देत सुरक्षा व्यवस्थेचा सखोल आढावा घेतला. या पाहणीदरम्यान कारागृहातील अंतर्गत आणि बाह्य सुरक्षा यंत्रणा, कैद्यांवरील देखरेख, तसेच कर्मचाऱ्यांच्या कामकाजाची पद्धत याबाबत त्यांनी तपशीलवार माहिती घेतली.
यावेळी कोणत्याही प्रकारचे बेकायदेशीर कृत्य आढळल्यास संबंधित अधिकाऱ्यांनाच थेट जबाबदार धरण्यात येईल, असा स्पष्ट इशारा डीजीपींनी दिला. कारागृह प्रशासनातील हलगर्जीपणाला अजिबात थारा दिला जाणार नाही, असे त्यांनी ठामपणे नमूद केले.
📶 5G प्रणाली असूनही नेटवर्कची तक्रार
कारागृह परिसरात 5G जॅमर प्रणाली कार्यान्वित असतानाही मोबाईल नेटवर्क उपलब्ध होत असल्याच्या तक्रारी समोर आल्या आहेत. तसेच बाहेरून मोबाईल फोन व अंमली पदार्थ भिंतीवरून आत फेकले जात असल्याचे आरोपही बैठकीत चर्चिले गेले.
या पार्श्वभूमीवर अशा प्रकारांना आळा घालण्यासाठी कठोर आणि तातडीच्या उपाययोजना राबविण्याचे निर्देश अलोककुमार यांनी अधिकाऱ्यांना दिले. सुरक्षा व्यवस्थेत कोणतीही त्रुटी राहू नये, यासाठी नियमित तपासणी आणि जबाबदारी निश्चितीची प्रक्रिया अधिक काटेकोर करण्याचे आदेश देण्यात आले आहेत.
