ಒಂದೇ ಮದುವೆ, ಎರಡೇ ಮಕ್ಕಳನ್ನು ಹೆರಬೇಕು ಎಂಬ ಕಾನೂನು ಜಾರಿ

ಬಾಗಲಕೋಟೆ :
ದೇಶದಲ್ಲಿ ಏಕರೂಪ ನಾಗರಿಕ ಸಂಹಿತೆ ಕಾನೂನು ಜಾರಿಗೊಳ್ಳುತ್ತದೆ. ಅದರ ಪ್ರಕಾರ ಎಲ್ಲರೂ ಒಂದೇ ಮದುವೆಯಾಗಬೇಕು, ಎರಡೇ ಮಕ್ಕಳನ್ನು ಹೆರಬೇಕು ಎಂಬ ಕಾನೂನು ಜಾರಿಯಾಗುತ್ತದೆ ಎಂದು ವಿಜಯಪುರ ಬಿಜೆಪಿ ಶಾಸಕ ಬಸನಗೌಡ ಪಾಟೀಲ ಯತ್ನಾಳ ಹೇಳಿದ್ದಾರೆ.
ಪತ್ರಕರ್ತರ ಜತೆ ಮಾತನಾಡಿ,
ವಕ್ಫ್ ಕಾನೂನನ್ನು ರದ್ದು ಮಾಡಿದಂತೆ ದೇಶದಲ್ಲಿ ಒಂದೇ ಕಾಮನ್ ಸಿವಿಲ್ ಕೋಡ್ ಜಾರಿಗೆ ತರುತ್ತೇವೆ. ಅಯೋಧ್ಯೆಯಲ್ಲಿ ರಾಮಮಂದಿರ, ಮಥುರಾದಲ್ಲಿ ಕೃಷ್ಣ ಮಂದಿರವನ್ನು ಕಟ್ಟುತ್ತೇವೆ. ಈಗ ನಮ್ಮ ದೇಶಕ್ಕೆ ಒಳ್ಳೆ ಪ್ರಧಾನಿ ಸಿಕ್ಕಿದ್ದಾರೆ. ದೇಶ ಇಂದು ಬಹಳ ಸದೃಢವಾಗಿದ್ದು ಜಗತ್ತಿನ ಐದನೇ ಸದೃಢ ಆರ್ಥಿಕ ಶಕ್ತಿಯಾಗಿ ಹೊರಹೊಮ್ಮಿದೆ. ಈ ಮೂಲಕ ಇಂಗ್ಲೆಂಡ್ ಅನ್ನು ಹಿಂದೆ ಹಾಕಿ ನಾವು ಆರ್ಥಿಕತೆಯಲ್ಲಿ ಈಗ ಮುಂದೆ ಬಂದಿದ್ದೇವೆ ಎಂದು ಹೇಳಿದರು.

ಪಿಎಫ್ ಐ ನಿಷೇಧ ಕುರಿತು ಪ್ರತಿಕ್ರಿಯಿಸಿದ ಅವರು ಪಿಎಫ್ ಐ ನಿಷೇಧ ಆಗಿರುವ ಬಗ್ಗೆ ಕಾಂಗ್ರೆಸ್‌ಗೆ ಒಳಗಿಂದ ಒಳಗೆ ಸಂತೋಷವಾಗಿದೆ. ದುರ್ದೈವ ಎಂದರೆ ದೇಶಕ್ಕಿಂತ ಮುಸ್ಲಿಂ ಓಟುಗಳಿಗಾಗಿ ಟೀಕೆ ಮಾಡುತ್ತಿದ್ದಾರೆ. ಪಿಎಫ್ ಐನಿಂದ ಕಾಂಗ್ರೆಸ್ ಮತ ಬ್ಯಾಂಕ್ ಒಡೆದು ಹೋಗಿತ್ತು. ಕಾಂಗ್ರೆಸ್ಸಿಗೆ ಈಗ ಜೀವನ ಬಂದಂತಾಗಿದೆ. ಪಿಎಫ್ ಐ ಜತೆಗೆ ಆರೆಸ್ಸೆಸ್ ಸಂಘಟನೆಯನ್ನು ಬ್ಯಾನ್ ಮಾಡಬೇಕು ಎಂದು ಕಾಂಗ್ರೆಸ್ಸಿಗರು ಹೇಳುತ್ತಿದ್ದಾರೆ. ಆರೆಸ್ಸೆಸ್ ದೇಶಭಕ್ತ ಸಂಘಟನೆ ಎಂದು ಸುಪ್ರೀಂಕೋರ್ಟ್ ಹೇಳಿದೆ. ದೇಶಭಕ್ತರನ್ನು ತಯಾರಿಸುವ ಕಾರ್ಖಾನೆ ಆರೆಸ್ಸೆಸ್ ಆಗಿದೆ. ಆದರೆ ಪಿಎಫ್ಐ ದೇಶದಲ್ಲಿ ಹಿಂದುಗಳ ಹತ್ಯೆಗೈಯುವುದು, ಹಿಂದೂ ನಾಯಕರ ಕೊಲೆಗೈಯುವುದು, ಲವ್ ಜಿಹಾದ್ ಕುತಂತ್ರಗಳಿಗೆ ಸಾಕ್ಷಿಯಾಗಿದೆ. ಸುಮ್ಮನೆ ನಿಷೇಧ ಹೇರುವಂತಹ ಕೆಲಸ ಮಾಡಿಲ್ಲ. ಸಾವಿರಾರು ಕೋಟಿ₹ಹಣವನ್ನು ಅರಬ್ ದೇಶಗಳಿಂದ ತಂದು ಇಲ್ಲಿ ದೇಶದ್ರೋಹಿ ಚಟುವಟಿಕೆಗಳಿಗೆ ಪಿಎಫ್ಐ ತೊಡಗಿಸಿರುವ ಬಗ್ಗೆ ದಾಖಲೆ ಸಿಕ್ಕಿದೆ ಎಂದು ಅವರು ಹೇಳಿದರು.