*भक्त कनकदास जयंतीनिमित्त बेळगावात भव्य शोभायात्रा*

बेळगाव (प्रतिनिधी) — भक्ती, संस्कृती आणि एकतेचा संगम घडवणारी भक्त कनकदास जयंती उत्साहात साजरी करण्यात आली. या निमित्ताने बेळगाव शहरात भव्य शोभायात्रेचे आयोजन करण्यात आले होते. शहराच्या विविध भागांतून निघालेल्या या शोभायात्रेत विविध कलापथके, ढोल-ताशांचे गजर आणि भक्तिमय घोषणांनी वातावरण दुमदुमून गेले.

शोभायात्रेची सुरुवात किल्ला येथील सम्राट अशोक चौकातून झाली तर सांगता कुमार गंधर्व रंगमंदिराजवळ करण्यात आली.
भक्त कनकदासांच्या जीवनकार्याचे दर्शन घडवणारे सुंदर चित्ररथ शोभायात्रेचे मुख्य आकर्षण ठरले. तसेच धनगरी ढोल पथक आणि मोठ्या हलगीवर वादन करणाऱ्या कलाकारांनी उपस्थितांचे लक्ष वेधून घेतले.

शोभायात्रेच्या अग्रभागी भक्त कनकदासांच्या वेशभूषेत सजलेली व्यक्ती चालत होती. ट्रॅक्टरवर ठेवलेली भक्त कनकदासांची भव्य मूर्ती आणि तिच्या मागोमाग चालणारी कलापथके हा दृश्य वैभवपूर्ण आणि भक्तिभावाने ओथंबलेला होता.

या शोभायात्रेत बेळगावकरांनी मोठ्या संख्येने सहभाग घेतला असून, शहरात सर्वत्र भक्तीमय वातावरण निर्माण झाले होते.