ಸಂಜೆಯ ಚಹಾ ಅಥವಾ ಕಾಫಿಯೊಂದಿಗೆ ಬಿಸಿಬಿಸಿಯಾದ ಸಮೋಸಾ, ಆಲೂ ಟಿಕ್ಕಿ ಅಥವಾ ಪಕೋಡ ತಿನ್ನುವುದು ಬಹುತೇಕರ ನೆಚ್ಚಿನ ಅಭ್ಯಾಸ. ಆದರೆ ಆರೋಗ್ಯ ಮತ್ತು ಫಿಟ್‌ನೆಸ್ ಬಗ್ಗೆ ಗಮನಹರಿಸುವವರು ಆಲೂಗಡ್ಡೆಯಿಂದ ದೂರವಿರಲು ಬಯಸುತ್ತಾರೆ. ಅಂತಹವರಿಗೆ ಸಿಹಿಗೆಣಸು (Sweet Potato) ಅತ್ಯುತ್ತಮ ಹಾಗೂ ಪೌಷ್ಟಿಕ ಪರ್ಯಾಯ ಆಹಾರವಾಗಿದೆ.
ವಿಟಮಿನ್ 'ಎ' ಹಾಗೂ ಆ್ಯಂಥೋಸಯಾನಿನ್, ಕ್ಯಾರೊಟಿನಾಯ್ಡ್‌ಗಳಂತಹ ಶಕ್ತಿಶಾಲಿ ಆ್ಯಂಟಿಆಕ್ಸಿಡೆಂಟ್‌ಗಳಿಂದ ಸಮೃದ್ಧವಾಗಿರುವ ಸಿಹಿಗೆಣಸು, ದೇಹದಲ್ಲಿನ ಫ್ರೀ ರ್ಯಾಡಿಕಲ್‌ಗಳನ್ನು ನಿಯಂತ್ರಿಸಿ ಹೃದಯ ಸಂಬಂಧಿ ಕಾಯಿಲೆ ಹಾಗೂ ಮಧುಮೇಹದ ಅಪಾಯವನ್ನು ತಗ್ಗಿಸಲು ಸಹಕಾರಿಯಾಗಿದೆ. ಸಂಜೆಯ ಚಹಾ ಜೊತೆಗೆ ಆಸ್ವಾದಿಸಬಹುದಾದ ಸಿಹಿಗೆಣಸಿನ 8 ವಿಶಿಷ್ಟ ಖಾದ್ಯಗಳ ವಿವರ ಇಲ್ಲಿದೆ:
1. ರೋಸ್ಟೆಡ್ ಸ್ವೀಟ್ ಪೊಟೇಟೋ ಚಾಟ್ (ಹುರಿದ ಗೆಣಸಿನ ಚಾಟ್)
ಸಾಮಾನ್ಯವಾಗಿ ಚಾಟ್ ಪ್ರಿಯರು ಆಲೂಗಡ್ಡೆ ಇರುತ್ತದೆಂಬ ಕಾರಣಕ್ಕೆ ತಿನ್ನಲು ಹಿಂದೇಟು ಹಾಕುತ್ತಾರೆ. ಆದರೆ ಬೇಯಿಸಿದ ಸಿಹಿಗೆಣಸಿನ ತುಂಡುಗಳನ್ನು ಲಘುವಾಗಿ ಹುರಿದು, ಅದಕ್ಕೆ ಈರುಳ್ಳಿ, ಹಸಿರು ಚಟ್ನಿ, ಹುಣಸೆ ಚಟ್ನಿ, ಚಾಟ್ ಮಸಾಲ, ಮೊಸರು, ನಿಂಬೆರಸ ಮತ್ತು ಸೇವ್ ಸೇರಿಸಿ ತಯಾರಿಸುವ ಚಾಟ್ ಸಂಜೆಯ ವೇಳೆಗೆ ಆರೋಗ್ಯಕರ ರುಚಿ ನೀಡುತ್ತದೆ.
2. ಸ್ವೀಟ್ ಪೊಟೇಟೋ ಫ್ರೈಸ್
ಸಾಮಾನ್ಯ ಆಲೂ ಫ್ರೆಂಚ್ ಫ್ರೈಸ್‌ಗೆ ಇದು ಅತ್ಯುತ್ತಮ ಪರ್ಯಾಯ. ಸಿಹಿಗೆಣಸನ್ನು ತೆಳುವಾಗಿ ಉದ್ದುದ್ದ ಕತ್ತರಿಸಿ, ಅದಕ್ಕೆ ಉಪ್ಪು ಮತ್ತು ಖಾರದ ಪುಡಿ (ಪ್ಯಾಪ್ರಿಕಾ) ಬೆರೆಸಿ ಬೇಕ್ ಅಥವಾ ಏರ್ ಫ್ರೈ ಮಾಡುವ ಮೂಲಕ ಗರಿಗರಿಯಾದ ಫ್ರೈಸ್ ತಯಾರಿಸಬಹುದು. ಇದನ್ನು ಪುದೀನಾ-ಮೊಸರಿನ ಡಿಪ್‌ನೊಂದಿಗೆ ಸವಿಯಬಹುದು.
3. ಸಿಹಿಗೆಣಸಿನ ಟಿಕ್ಕಿ (Sweet Potato Tikki)
ಬೇಯಿಸಿದ ಸಿಹಿಗೆಣಸನ್ನು ಮ್ಯಾಶ್ ಮಾಡಿ ಅದಕ್ಕೆ ಜೀರಿಗೆ, ಕೊತ್ತಂಬರಿ ಸೊಪ್ಪು, ಖಾರದ ಪುಡಿ ಮತ್ತು ಸ್ವಲ್ಪ ಕಾರ್ನ್‌ಫ್ಲೋರ್ ಬೆರೆಸಿ ಸಣ್ಣ ಉಂಡೆಗಳನ್ನಾಗಿ (ಪ್ಯಾಟೀಸ್) ತಟ್ಟಿ, ಗೋಲ್ಡನ್ ಬ್ರೌನ್ ಬಣ್ಣ ಬರುವವರೆಗೆ ಶಾಲೋ ಫ್ರೈ ಮಾಡಿ ಗ್ರೀನ್ ಚಟ್ನಿಯೊಂದಿಗೆ ಬಿಸಿಯಾಗಿ ಸವಿಯಬಹುದು.
4. ಸ್ವೀಟ್ ಪೊಟೇಟೋ ಟೋಸ್ಟ್
ಬ್ರೆಡ್ ಬದಲು ಬೇಯಿಸಿದ ಸಿಹಿಗೆಣಸಿನ ದಪ್ಪ ವೃತ್ತಾಕಾರದ ಹೋಳುಗಳನ್ನೇ ಬೇಸ್ ಆಗಿ ಬಳಸುವ ನವೀನ ತಿಂಡಿ ಇದು. ಇದರ ಮೇಲೆ ಪೀನಟ್ ಬಟರ್, ಮೊಸರು ಅಥವಾ ಆವಕಾಡೊ ಹಚ್ಚಿ ಸೇವಿಸಿದರೆ ಸಂಜೆಯ ಹೊಟ್ಟೆಹಸಿವಿಗೆ ಪೌಷ್ಟಿಕ ಆಹಾರವಾಗುತ್ತದೆ.
5. ಬೇಕ್ಡ್ ಸ್ವೀಟ್ ಪೊಟೇಟೋ ಕ್ಯೂಬ್ಸ್
ಸಿಹಿಗೆಣಸನ್ನು ಸಣ್ಣ ಘನಾಕಾರದಲ್ಲಿ ಕತ್ತರಿಸಿ ಆಲಿವ್ ಎಣ್ಣೆ, ಜೀರಿಗೆ ಪುಡಿ ಮತ್ತು ಚಿಲ್ಲಿ ಫ್ಲೇಕ್ಸ್ ಜೊತೆಗೆ ಮಿಶ್ರಣ ಮಾಡಿ ಚೆನ್ನಾಗಿ ಬೇಕ್ ಮಾಡಿದರೆ, ಕಾರಮೆಲೈಸ್ಡ್ ಆಗಿ ಗರಿಗರಿಯಾದ ಲಘು ಉಪಹಾರ ಸಿದ್ಧವಾಗುತ್ತದೆ. ಇದು ಚಹಾದೊಂದಿಗೆ ಗರಿಗರಿಯಾಗಿ ಮೆಲ್ಲಲು ಹೇಳಿಮಾಡಿಸಿದ ತಿಂಡಿ.
6. ಸಿಹಿಗೆಣಸಿನ ಕಟ್ಲೆಟ್
ಮ್ಯಾಶ್ ಮಾಡಿದ ಸಿಹಿಗೆಣಸಿನೊಂದಿಗೆ ತುರಿದ ಕ್ಯಾರೆಟ್ ಮತ್ತು ಸಾಂಬಾರ ಪದಾರ್ಥಗಳನ್ನು ಬೆರೆಸಿ, ಹೊರಭಾಗ ಗರಿಗರಿಯಾಗುವಂತೆ ಪ್ಯಾನ್‌ನಲ್ಲಿ ಬೇಯಿಸಿದರೆ ರುಚಿಕರ ಕಟ್ಲೆಟ್ ತಯಾರಾಗುತ್ತದೆ. ಇದನ್ನು ಟೊಮೆಟೊ ಕೆಚಪ್ ಅಥವಾ ಪುದೀನಾ ಚಟ್ನಿಯೊಂದಿಗೆ ತಿನ್ನಬಹುದು.
7. ಸೌತ್ ಇಂಡಿಯನ್ ಸ್ಟೈಲ್ ಸುಂಡಲ್
ದಕ್ಷಿಣ ಭಾರತೀಯ ಶೈಲಿಯಲ್ಲಿ ಬೇಯಿಸಿದ ಸಿಹಿಗೆಣಸಿನ ತುಂಡುಗಳಿಗೆ ಸಾಸಿವೆ, ಕರಿಬೇವಿನ ಸೊಪ್ಪು, ಹಸಿಮೆಣಸಿನಕಾಯಿ ಒಗ್ಗರಣೆ ನೀಡಿ, ತುರಿದ ತೆಂಗಿನಕಾಯಿ ಮತ್ತು ನಿಂಬೆರಸ ಸೇರಿಸಿದರೆ ಲಘುವಾದ ಹಾಗೂ ಆರೋಗ್ಯಕರವಾದ ಸುಂಡಲ್ ಸಿದ್ಧವಾಗುತ್ತದೆ.
8. ಸಿಹಿಗೆಣಸಿನ ಹಲ್ವಾ
ಸಿಹಿ ತಿನ್ನಲು ಬಯಸುವವರಿಗೆ ಇದು ಹೇಳಿಮಾಡಿಸಿದ ತಿನಿಸು. ತುರಿದ ಸಿಹಿಗೆಣಸನ್ನು ತುಪ್ಪ, ಹಾಲು ಮತ್ತು ಬೆಲ್ಲದೊಂದಿಗೆ ಬೇಯಿಸಿ ಹಲ್ವಾ ಹದಕ್ಕೆ ತಂದು, ಗೋಡಂಬಿ-ಬಾದಾಮಿಗಳಿಂದ ಅಲಂಕರಿಸಿದರೆ ಸಂಜೆಯ ಚಹಾಕ್ಕೆ ಸಿಹಿಯಾದ ಸಾಥ್ ಸಿಗುತ್ತದೆ.
