गावातील महिला बचत गट, आशा कार्यकर्त्या, संजीवनी गटाच्या सदस्य, तसेच जनजागरण योजनेच्या महिलांनी मोठ्या संख्येने या कार्यक्रमात सहभाग घेतला. श्रमिक अभिवृद्धी संघटनेच्या वतीने जिल्हा संयोजक अँथोनी जेकब, यशवंत भांदुर्गे आणि पिराजी माहूत यांच्या संयुक्त पुढाकारातून या कार्यक्रमाचे आयोजन करण्यात आले.
कार्यक्रमात कोटक बँकेच्या प्रतिनिधी पियांगू पोरवाल यांनी महिलांना अल्प बचतीचे महत्त्व आणि त्यातून दीर्घकालीन आर्थिक सुरक्षितता कशी मिळू शकते याबाबत मार्गदर्शन केले. तसेच मंगल कोरे यांनी सकारात्मक विचारसरणी आणि प्रयत्नांच्या माध्यमातून आनंदी जीवन कसे जगता येते यावर विचार मांडले.
यावेळी डॉ. स्नेहा पाटील यांनी महिलांनी आपल्या आरोग्याची काळजी कशी घ्यावी, नियमित तपासणीचे महत्त्व आणि निरोगी जीवनशैली याविषयी उपयुक्त माहिती दिली.
या कार्यक्रमाला गावातील विविध सामाजिक संस्था, ग्रामस्थ तसेच विद्यार्थिनी मोठ्या संख्येने उपस्थित होत्या. महिला सक्षमीकरण आणि जागरूकतेचा संदेश देणारा हा उपक्रम उत्साहात पार पडला.
