*खानापूरच्या ताराराणीच्या तारका हॉकीत चमकल्या*

खानापूर : राष्ट्रीय क्रीडा दिनाचे औचित्य साधून आयोजित करण्यात आलेल्या मेजर ध्यानचंद चषक आंतरशालेय व आंतरमहाविद्यालयीन हॉकी स्पर्धेत खानापूरच्या ताराराणी हायस्कूलच्या मुलींनी दमदार कामगिरी करत विजेतेपद पटकावले. अंतिम सामन्यात ताराराणी हायस्कूलच्या संघाने भंडारी स्कूलचा ३-० असा स्पष्ट पराभव करत चषकावर आपले नाव कोरले.

अंतिम सामन्यात ताराराणीच्या खेळाडूंनी सुरुवातीपासूनच आक्रमक आणि शिस्तबद्ध खेळाचे दर्शन घडविले. मैदानावर चेंडूवरील नियंत्रण, अचूक पासिंग आणि गोल करण्यासाठी केलेले नियोजन यामुळे प्रतिस्पर्धी संघावर सातत्याने दबाव निर्माण झाला.

सामन्याच्या सुरुवातीच्या टप्प्यातच ताराराणीच्या खेळाडूंनी आक्रमणाची धार दाखवली. अनुश्री अंधारेच्या अचूक पासचा फायदा घेत नंदिनी गुरवने दहाव्या मिनिटाला गोल करत संघाला आघाडी मिळवून दिली. त्यानंतरही ताराराणीच्या खेळाडूंनी आक्रमक खेळ कायम ठेवला.

नेहाच्या पासवर सविता गोरलने १५व्या मिनिटाला शानदार गोल करत संघाची आघाडी वाढवली. त्यानंतर ताराराणीच्या खेळाडूंनी बचाव आणि आक्रमण यामध्ये उत्तम समन्वय साधत सामन्यावर आपली पकड मजबूत केली.

सामन्यातील प्रत्येक मिनिटाला ताराराणीच्या खेळाडूंचा आत्मविश्वास वाढताना दिसला. नंदिनीच्या पासवर अश्विनीने केलेल्या प्रभावी प्रयत्नामुळे आणखी एक गोल नोंदवला गेला आणि अखेर ताराराणीने ३-० अशा फरकाने विजय मिळवत मेजर ध्यानचंद चषकावर कब्जा केला.

या विजयामागे विद्यार्थिनींच्या सातत्यपूर्ण सरावासोबतच शाळेचे मार्गदर्शन आणि क्रीडा प्रशिक्षणाची महत्त्वाची भूमिका राहिली. मराठा मंडळ बेळगावच्या अध्यक्षा डॉ. राजश्रीताई नागराजू, श्री. शिवाजीराव पाटील, श्री. परशराम अण्णा गुरव तसेच संस्थेचे संचालक मंडळ यांचे मार्गदर्शन विद्यार्थिनींना मिळाले.

शाळेचे मुख्याध्यापक राहुल जाधव यांच्या प्रेरणादायी मार्गदर्शनामुळे विद्यार्थिनींना विविध क्षेत्रांत उल्लेखनीय कामगिरी करण्यासाठी प्रोत्साहन मिळत आहे. तर संघाला कठोर सराव आणि योग्य प्रशिक्षण देत विजयासाठी तयार करण्यात क्रीडा शिक्षिका अश्विनी पाटील यांचे योगदानही महत्त्वाचे ठरले.

ताराराणी हायस्कूल आणि महाविद्यालयाने शिक्षणासोबतच कला, क्रीडा आणि सांस्कृतिक क्षेत्रात सातत्याने आपली वेगळी ओळख निर्माण केली आहे. हॉकीतील या विजयानंतर खानापूर तालुक्यातून विद्यार्थिनींचे अभिनंदन होत असून, त्यांच्या या कामगिरीकडे आगामी काळातील नव्या क्रीडा यशाची सुरुवात म्हणून पाहिले जात आहे.

एक ध्यास, एक श्वास आणि एक विश्वास—याच जोरावर ताराराणीच्या मुलींनी मैदान गाजवत खानापूरच्या क्रीडा क्षेत्रात अभिमानाची नवी नोंद केली आहे.

Also read

*आशियाई पॅरा गेम्समध्ये कांस्यपदक जिंकणाऱ्या स्वातिक पाटील यांचा बेळगावात भव्य सत्कार!*