*गणेश विसर्जनाच्या पार्श्वभूमीवर बेळगावात RAF चे पथसंचलन; सुरक्षा व्यवस्था कडक*

बेळगाव : गणेशोत्सवाच्या पार्श्वभूमीवर गणेशमूर्तींचे विसर्जन आणि मिरवणुका शांततेत पार पडाव्यात, यासाठी बेळगाव शहरातील सुरक्षा व्यवस्था अधिक बळकट करण्यात आली आहे. खबरदारीचा उपाय म्हणून शहरातील संवेदनशील भागांमध्ये रॅपिड अॅक्शन फोर्स (RAF) आणि पोलिसांनी पथसंचलन केले.

न्यू गांधी नगर परिसरात करण्यात आलेल्या या पथसंचलनातून कायदा व सुव्यवस्था राखण्यासाठी पोलीस यंत्रणा सज्ज असल्याचा संदेश देण्यात आला. गणेशोत्सवादरम्यान कोणताही अनुचित प्रकार घडू नये तसेच नागरिकांमध्ये सुरक्षिततेची भावना निर्माण व्हावी, हा या रूट मार्चचा प्रमुख उद्देश होता.

गणेशमूर्ती विसर्जनाच्या काळात विविध भागांतून मिरवणुका निघणार असल्याने पोलिसांकडून संवेदनशील परिसरावर विशेष लक्ष ठेवण्यात येत आहे. गर्दीच्या ठिकाणी तसेच मिरवणूक मार्गांवर सुरक्षा व्यवस्था वाढविण्यात आली आहे.

नागरिकांमध्ये विश्वासाचे वातावरण निर्माण करणे आणि कायदा हातात घेणाऱ्यांना स्पष्ट इशारा देणे, या उद्देशाने RAF आणि स्थानिक पोलीस कर्मचाऱ्यांनी पथसंचलन केले.

गणेशोत्सव हा शांतता, सौहार्द आणि बंधुभावाचा सण असल्याने नागरिकांनी प्रशासनाला सहकार्य करावे, तसेच मिरवणुका आणि विसर्जन शांततेत पार पाडावे, असे आवाहन करण्यात आले आहे.

Also read

*ज्योती सेंट्रल स्कूलच्या फुटबॉल संघाचा दिमाखदार विजय!*