राणी चन्नम्मा विद्यापीठाच्या दीक्षांत समारंभात पीएचडी पदवी न मिळाल्याने मानसिक तणावात आलेल्या सुझाता बेंडी या संशोधक विद्यार्थिनीने आत्महत्येचा प्रयत्न केल्याची धक्कादायक घटना समोर आली आहे. सुजाता यांना तातडीने बेळगावातील बीम्स रुग्णालयात दाखल करण्यात आले असून त्यांच्यावर उपचार सुरू आहेत. वैद्यकीय सूत्रांनी तिची प्रकृती चिंताजनक असल्याचे सांगितले आहे.
मिळालेल्या माहितीनुसार, सुजाता बेंडी यांनी सुमारे सहा महिन्यांपूर्वी रायबाग प्रदेशाच्या इतिहासावरील व्यापक संशोधन प्रबंध विद्यापीठात सादर केला होता. दीक्षांत सोहळ्यात पीएचडी पदवी प्राप्त होईल, अशी अपेक्षा होती. मात्र समारंभात त्यांचे नाव नसल्याचे दिसताच त्या तीव्र मानसिक तणावात गेल्या.
कुटुंबीय आणि सहशिक्षकांच्या म्हणण्यानुसार,
“विद्यापीठात जाणूनबुजून अडथळे निर्माण केले जात आहेत,”
असा संशय व्यक्त करण्यात येत आहे.
सुजाता यांनी यापूर्वीही विद्यापीठातील एका वरिष्ठ अधिकाऱ्याच्या वर्तणुकीबद्दल कुलगुरू तसेच सचिवांकडे लिखित तक्रार केली होती. त्यावेळी हे प्रकरण "निवारण" करण्यात आल्याचे सांगण्यात आले होते. आता पुन्हा तिचे नाव अंतिम यादीत नसल्यामुळे तणाव वाढल्याचे जवळच्या सूत्रांचे म्हणणे आहे.
विद्यापीठाचे कुलगुरू सी. एम. त्यागराज यांनी पीएचडी प्रदान करण्यास नकार दिल्याची माहितीही समोर आली आहे. या पार्श्वभूमीवर या घटनाक्रमाने संशोधन क्षेत्रातील विविध प्रक्रिया, पारदर्शकता आणि प्रशासनिक पद्धतींवर प्रश्नचिन्ह निर्माण केले आहे.
दरम्यान, विद्यार्थिनीने अत्यंत तणावपूर्ण स्थितीत आत्महत्येचा प्रयत्न केल्याचे कळताच कुटुंबीयांनी तिला तातडीने रुग्णालयात दाखल केले. पोलीस आणि विद्यापीठ प्रशासनानेही या घटनाक्रमाची वेगळी नोंद घेतली असून पुढील तपास सुरू आहे.
