*मराठा मंडळ पॉलिटेक्निकमध्ये नवमतदार नोंदणीला उत्स्फूर्त प्रतिसाद*

बेळगाव, दि. २२ सप्टेंबर २०२६ :
मराठा मंडळ पॉलिटेक्निक, बेळगाव येथे भारत निवडणूक आयोगाच्या मतदार जनजागृती उपक्रमांतर्गत नवमतदार नोंदणी व मतदानाबाबत जनजागृती कार्यक्रमाचे आयोजन करण्यात आले. बेळगाव महानगरपालिकेच्या निवडणूक विभागाच्या सहकार्याने हा कार्यक्रम यशस्वीपणे पार पडला.

या उपक्रमात महाविद्यालयातील २०० हून अधिक विद्यार्थ्यांनी उत्स्फूर्त सहभाग नोंदवला. विद्यार्थ्यांना ऑनलाइन पद्धतीने मतदार नोंदणीची प्रक्रिया समजावून सांगण्यात आली. त्यानंतर अनेक विद्यार्थ्यांनी ऑनलाइन माध्यमातून आपली मतदार म्हणून नोंदणी केली.

मतदानाचा अधिकार हा लोकशाही व्यवस्थेचा महत्त्वाचा आधार असून, तरुणांनी आपल्या मतदानाच्या अधिकाराबाबत जागरूक राहणे आवश्यक आहे, असा संदेश यावेळी देण्यात आला. मजबूत राष्ट्रनिर्मितीसाठी जबाबदार नागरिक म्हणून मतदान प्रक्रियेत सहभागी होण्याचे महत्त्वही विद्यार्थ्यांना पटवून देण्यात आले.

महाविद्यालयाचे प्राचार्य आर. एस. सूर्यवंशी तसेच विविध विभागांचे विभागप्रमुख यांनी विद्यार्थ्यांना मतदानाचे महत्त्व समजावून सांगितले. लोकशाही बळकट करण्यासाठी प्रत्येक पात्र नागरिकाने मतदानाचा अधिकार बजावणे गरजेचे असल्याचे त्यांनी नमूद केले.

कार्यक्रमाच्या यशस्वी आयोजनासाठी NSS समन्वयक जी. के. शिवयोगीमठ तसेच विद्यार्थी सचिवांनी विशेष पुढाकार घेतला. त्यांच्या नियोजनातून नवमतदार नोंदणी आणि मतदार जनजागृती कार्यक्रम प्रभावीपणे पार पडला.

Also read

*सीबीएसईचा अभ्यास होणार अधिक सोपा! ज्योती सेंट्रल स्कूलच्या नाविन्यपूर्ण उपक्रमांचे पालकांकडून कौतुक*