नंदगड (प्रतिनिधी):
नंदगड येथे दरवर्षीप्रमाणे यावर्षीही दीपावली निमित्ताने क्रीडामहोत्सवाचे आयोजन करण्यात आले होते. या पारंपरिक क्रीडामहोत्सवाचा हा 66 वा वर्ष ठरला असून, उदघाटन खानापूर तालुक्याचे आमदार श्री. विठ्ठल हलगेकर यांच्या हस्ते 22 ऑक्टोबर रोजी करण्यात आले. कार्यक्रमाच्या अध्यक्षस्थानी श्री. पी. के. पाटील होते.
यावर्षीच्या कै. एम. के. पाटील स्मृती चषक स्पर्धेत प्रथमच महिला कबड्डी स्पर्धा घेण्यात आल्या. पावसाच्या अडथळ्यामुळे पहिल्या दिवशी सामने न होऊ शकल्याने, दुसऱ्या दिवशी म्हणजेच 23 ऑक्टोबर रोजी महिला गटातील सामने पार पडले. या स्पर्धांमध्ये आजरा संघाने विजेतेपद, तर नंदगडच्या झुंजवाडकर संघाने उपविजेतेपद पटकावले.
दरम्यान, पावसाच्या जोरदार सरींमुळे पुरुष गटातील कबड्डी सामने पुढे ढकलण्यात आले असून, त्याची पुढील तारीख आयोजकांकडून लवकरच जाहीर करण्यात येणार आहे, अशी माहिती देण्यात आली.
कार्यक्रमावेळी व्यासपीठावर सूर्याजी पाटील, के. पी. पाटील, धनंजय पाटील, मल्लाप्पा मारिहाळ, सदानंद पाटील, यल्लाप्पा गुरव, भरमाजी पाटील, लक्ष्मण पाटील, नारायण (पप्पू) पाटील, रणजित पाटील, भरमानी पाटील, सुनीता पाटील, वैष्णवी पाटील, अडली मॅडम आदी मान्यवर उपस्थित होते.
पंच म्हणून के. व्ही. पाटील, के. आर. पाटील, पी. आर. पाटील, उमेश धबाले, अशोक पाटील यांनी जबाबदारी पार पाडली. तर स्पर्धा यशस्वी करण्यासाठी राजू पाटील, नागेंद्र पाटील, किरण पाटील, दिलीप पाटील, के. एम. पाटील यांच्यासह अन्य कार्यकर्त्यांनी परिश्रम घेतले.
नंदगडमधील हा क्रीडामहोत्सव स्थानिक तरुणांना खेळाची प्रेरणा देणारा ठरला असून, महिला खेळाडूंच्या सहभागामुळे कार्यक्रमात नवचैतन्याचे वातावरण निर्माण झाले.
