बेळगाव : दक्षिण महाराष्ट्र शिक्षण मंडळ संचलित ज्योती सेंट्रल स्कूल, कॅम्प येथे शिकणाऱ्या वेदांत आनंद मिसाळेने राष्ट्रीय स्तरावर चमकदार कामगिरी करत ऐतिहासिक नोंद केली आहे. ६९व्या SGFI नॅशनल्स जलतरण स्पर्धेत त्याने ‘4×100 मीटर मेडले रिले’ प्रकारात सुवर्णपदकाची कमाई करत शाळा आणि राज्याचा मान उंचावला आहे.
सीबीएसई शाळांचे प्रतिनिधित्व करणाऱ्या या संघाने ४:२०:६० मिनिटांची वेळ नोंदवून मागील ४:२५:४५ मिनिटांचा राष्ट्रीय विक्रम मोडीत काढला. या उल्लेखनीय विजयात वेदांतने १०० मीटर ‘बटरफ्लाय स्ट्रोक’ उत्कृष्ट वेगाने पूर्ण करून महत्त्वपूर्ण भूमिका बजावली.
या यशानंतर ज्योती सेंट्रल स्कूलमध्ये आनंदाचे वातावरण असून विद्यार्थ्याच्या चिकाटी, शिस्त आणि खेळावरील निष्ठेचे सर्व स्तरांतून कौतुक होत आहे.
शाळेच्या एस्.एम्.सी. कमिटीचे चेअरमन आणि ज्योती कॉलेजचे माजी प्राचार्य आर. के. पाटील, व्हाइस चेअरमन प्रो. आर. एस. पाटील, सचिव प्रो. नितीन घोरपडे, शालेय अॅडव्हायझरी डायरेक्टर श्रीमती मायादेवी अगसगेकर आणि मुख्याध्यापिका श्रीमती सोनाली कंग्राळकर यांनी वेदांतचे अभिनंदन करत त्याच्या पुढील वाटचालीस शुभेच्छा दिल्या.
वेदांतचा हा राष्ट्रीय दर्जाचा विक्रम बेळगावातील जलतरणक्षेत्रासाठी प्रेरणादायी मानला जात आहे.

